Vegleg dagskrá í Saurbæ og Vatnaskógi sunnudaginn 27. október

Dánardagur Hallgríms Péturssonar var 27. október. Um langt árabil hefur hann verið haldinn hátíðlegur sem Ártíðardagur Hallgríms Péturssonar. Stuðst er við ártíðardag í ljósi þess að fæðingardagur Hallgríms er ekki kunnur. Í Hallgrímskirkju í Saurbæ hefur jafnan verið messa næsta sunnudag á eftir, ef dagurinn er í miðri viku. Síðustu ár hefur einnig verið lítil dagskrá á daginn sjálfan. Í ár verður sérstök hátíð en nú er 350 ára ártíð Hallgríms en hann lést árið 1674 og af því tilefni verður blásið til Hallgrímshátíðar í Saurbæ sunnudaginn 27. október.

Að sögn séra Þráins Haraldssonar sóknarprests hefur undirbúningur staðið yfir í langan tíma. „Eitt af þeim verkefnum sem ráðist var í af þessu tilefni var að láta semja ný lög við texta Hallgríms. Fékkst styrkur úr Tónlistarsjóði Þjóðkirkjunnar og voru tvö tónskáld fengin til verksins og sömdu þau sitthvort lagið fyrir Kór Saurbæjarprestakalls. Annars vegar er það Högni Egilsson en hann samdi lag við ljóðið Hugbót og ljóðið samdi Hallgrímur árið 1662 en þá höfðu bæjarhúsin í Saurbæ brunnið, sem var mikið áfall fyrir Hallgrím og fjölskyldu hans. Hins vegar er það tónskáldið Eygló sem er þekkt fyrir klassíska tónlist en hún samdi lag við öllu þekktara ljóð Hallgríms – Heilræðavísur. Til er eldra þekkt lag við ljóðið en hér er um að ræða afskaplega fallegt nútímalegt lag við þetta þekkta ljóð Hallgríms. Ég er þess fullviss að fleiri kórar munu syngja þessi tvö nýju lög seinna meir,“ segir Þráinn. Lögin verða frumflutt af Kór Saurbæjarprestakalls í Hátíðarmessu sem hefst kl. 14 sunnudaginn 27. október. Þar mun biskup Íslands þjóna, prestar prestakallsins, Kristján Valur ábúandi á Saurbæ og sr. Sigurður Grétar Sigurðsson, en hann er sóknarprestur á Hvalsnesi þar sem Hallgrímur var prestur áður en hann kom í Saurbæ. Forseti Íslands verður heiðursgestur í guðsþjónustunni.

Að lokinni guðsþjónustu í Saurbæ er boðið til kirkjukaffis í Sumarbúðum KFUM og KFUK í Vatnaskógi en þangað er um fimm mínútna akstur. Dagskránni verður fram haldið í Saurbæ eftir kaffið. „Hátíðardagskrá hefst svo kl. 16.30. Þar munum við hlýða á tvö erindi, annars vegar mun forseti Íslands flytja ávarp og hins vegar mun Kristján Valur Ingólfsson segja frá ævi Hallgríms og Guðríðar. Þess á milli mun Kór Saurbæjarprestakalls flytja aftur nýju lögin tvö og svo tríóið Hvalreki flytja tónlist. Tríóið er frá Hvalsnesi og flytur lög við veraldleg ljóð Hallgríms, en Hallgrímur var bæði trúarlegt og veraldlegt ljóðskáld. Birgir Þórarinsson formaður Hollvinafélags Hallgrímskirkju í Saurbæ mun síðan loka dagskránni.“

Þeir staðir sem tengjast Hallgrími Péturssyni eru allir með einhverja dagskrá þetta árið til að heiðra minningu skáldsins. Það er Hallgrímskirkja í Reykjavík, Hólar í Hjaltadal, Hvalsneskirkja og Hallgrímskirkja í Saurbæ. „Í Saurbæ átti Hallgrímur sín bestu ár og þar samdi hann Passíusálmana, sitt þekktasta verk, svo það eru fáir staðir sem hæfa betur undir hátíðarhöldin en Saurbær á Hvalfjarðarströnd,“ segir séra Þráinn Haraldsson.

Minnast 350 ára ártíðar Hallgríms Péturssonar

Vegleg dagskrá í Saurbæ og Vatnaskógi sunnudaginn 27. október

Vegleg dagskrá í Saurbæ og Vatnaskógi sunnudaginn 27. október