Domus Nova opnaði skrifstofu í Borgarnesi síðastliðinn föstudag en opið hús var fyrir gesti og gangandi síðdegis. Skrifstofan er að Borgarbraut 61. Domus Nova er ein af stærri fasteignasölum landsins, með höfuðstöðvar sínar að Hlíðarsmára 4 í Kópavogi en er með útibú á Selfossi, Akranesi og nú í Borgarnesi.

Blaðamaður Skessuhorns náði tali af Ragnheiði Rún Gísladóttur fasteignasala. „Við verðum fjögur hér á skrifstofunni. Við byrjum á að vera hér þrjá daga vikunnar; þriðjudaga, fimmtudaga og föstudaga frá klukkan 12.00-15.00 og þá getur fólk komið í spjall augliti til auglitis,“ segir Ragga Rún. En verður Domus Nova með einhverja nýbreytni á markaðinum? „Við viljum bjóða upp á betri, persónulegri og faglegri þjónustu fyrir íbúa og verðum með gullkortið okkar sem er afsláttarkjör fyrir okkar viðskiptavini og með fagljósmyndara sem mun taka myndir af eignum fyrir okkur. Okkur fannst vanta upp á samkeppni hér í Borgarbyggð. Ég held að það sé hollt og gott að hafa samkeppni en við erum að koma með mikla reynslu inn á þennan markað. Við sem verðum hér höfum öll okkar vinkil. Hrannar fasteignasali hefur gríðarlega mikla þekkingu á sumarhúsahverfunum hér í Borgarbyggð, Sverrir hefur verið með annan fótinn í Borgarnesi síðustu fjögur árin og fengist við ýmis fasteignatengd verkefni á þeim tíma. Soffía fasteignasali er úr sveitinni og þekkir vel til og ég hef persónulega verið í þessu í 18 ár og hlakka til að kynnast Borgnesingum betur,“ segir Ragga.

En hvernig er staðan á fasteignamarkaðinum í dag? „Nýbyggingarnar, sem eru að fara að detta inn á skrá, verða á hærra verði en þær sem eru núna og á eftir að verða keðjuverkun á markaðinum. Eignir eiga því eftir að hækka í verði. Nú er því tími til að gera góð kaup þó svo að fólki finnist verðið vera hátt. Það er ekki langt í að allt hækki enn meira,“ segir Ragga að lokum.

*Ragnheiður Rún Gísladóttir fasteignasali hjá Domus Nova.*

Domus Nova opnar fasteignasölu í Borgarnesi