Sveitarfélögin þrjú á Snæfellsnesi leggja 30 milljónir króna til verkefnisins

Í gær var stór dagur hjá björgunarsveitinni Lífsbjörgu í Snæfellsbæ þegar nýtt björgunarskip kom í fyrsta sinn til heimahafnar. Skipið hefur fengið nafnið Björg, eins og fyrirrennari þess, og verður með aðsetur í Rifi. Áður en skipinu var siglt til Rifs var tekinn hringur í Ólafsvíkurhöfn. Þegar Björg sigldi inn í Rifshöfn, ásamt gömlu Björginni, tók Slökkvilið Snæfellsbæjar á móti þeim með vatnsbunum. Við athöfn á bryggjunni blessaði séra Ægir Örn Sveinsson skipið og sagði meðal annars að svona skip þyrftu allir að eiga og kunna á en enginn vonast svo til að þurfa að nota það.

Í Björgunarstöðinni Von var athöfn og boðið upp á kaffiveitingar. Meðal ræðumanna voru Kristinn Jónasson bæjarstjóri Snæfellsbæjar og Björg Ágústsdóttir bæjarstjóri í Grundarfirði. Nefndi Björg að fyrr í þessum mánuði hafi sveitarfélögunum á Snæfellsnesi borist erindi um aðstoð við fjármögnun á hluta björgunarsjóðs til að standa straum að kaupsverði nýrrar Bjargar. Sveitarfélögin þrjú á Snæfellsnesi ákváðu að í gegnum hafnarsjóði sína myndu þau leggja 30 milljónir króna til verkefnisins. Gert er ráð fyrir að gerður verði fimm ára styrktarsamningur þar af lútandi. Björg sagði ennfremur að við þessa ákvörðun hafi verið haft til hliðsjónar sambærilegir samningar í öðrum landshlutum og viðmið um íbúafjölda.

Fjölmargir bæjarbúar mættu til að taka á móti nýja skipinu og var það til skoðunar fyrir gesti.

*Vel var tekið á móti nýrri Björg og fylgdi gamla Björg henni til hafnar.*

*Björg Ágústsdóttir afhentir Halldóri Kristinssyni formanni bátasjóðs Snæfellsness styrk frá sveitarfélögunum þremur á Snæfellsnesi.*

*Fjölmargir bæjarbúar voru mættir til að samfagna með félögum í Lífsbjörgu.*

Ný Björg komin til heimahafnar í Rifi

Sveitarfélögin þrjú á Snæfellsnesi leggja 30 milljónir króna til verkefnisins

Sveitarfélögin þrjú á Snæfellsnesi leggja 30 milljónir króna til verkefnisins