Íslensku menntaverðlaunin eru árleg viðurkenning fyrir framúrskarandi skólastarf eða aðrar umbætur í menntamálum landsmanna. Tilnefningar voru kynntar á laugardaginn. Verðlaunin eru veitt árlega sem viðurkenning fyrir framúrskarandi skólastarf eða aðrar umbætur í menntamálum og verða afhent 5. nóvember á Bessastöðum.

Þóra Geirlaug Bjartmarsdóttir, grunnskólakennari við Grunnskóla Borgarfjarðar, er meðal þeirra einstaklinga sem tilnefndir eru sem framúrskarandi kennari. Hún hefur innleitt námskrá í kynheilbrigðisfræðslu með áherslu á sjálfs- og líkamsímynd. Þóra Geirlaug útskrifaðist með B.Sc. gráðu í líffræði frá Háskóla Íslands 2009 og lauk kennsluréttindanámi frá Háskólanum á Akureyri ári síðar. Árið 2013 lauk hún M.Ed í kennslu náttúrufræðigreina frá Háskóla Íslands en hún lauk diplómagráðu í kynfræðum frá HÍ vorið 2019, með áherslu á kynfræðum. Hún er nú náttúrufræðikennari við Grunnskóla Borgarfjarðar þar sem hún hefur starfað í um tíu ár.

Fljótlega eftir að Þóra Geirlaug hóf kennslu sá hún að æskilegt væri að bæta kynfræðslu í skólanum og hófst handa við að mennta sig frekar á því sviði með diplómanámi í kynfræði við HÍ. Markmið hennar var að finna leið til þess að kynfræðslan yrði markvissari, heildstæðari og árangursríkari en áður. Skólaárið 2021-2022 stýrði hún þróunarverkefninu „Við – kynheilbrigðisfræðsla með áherslu á sjálfsmynd og líkamsímynd.“ Verkefnið, sem hlaut styrk úr Sprotasjóði, snerist um samfellda kynfræðslu frá leikskólastigi upp í 10. bekk og vakti verkefnið mikla athygli. Skólaárið 2024- 2025 er hún verkefnastjóri þróunarverkefnisins Framtíðarfólk í Grunnskóla Borgarfjarðar þar sem forvarnarverkefni og skólaþróunarverkefni tengd heilbrigði, sjálfsmynd og samvinnu eru sameinuð.

Þóra Geirlaug tilnefnd til Íslensku menntaverðlaunanna