Snæfell í Stykkishólmi gerði góða ferð í Grafarvoginn á föstudaginn þegar liðið heimsótti Fjölni í fyrstu umferð 1. deildar karla í körfuknattleik. Fjölni var fyrir tímabilið spáð einu af efstu sætum deildarinnar á meðan Snæfell var spáð áttunda sæti.

Leikurinn var í járnum á fyrstu mínútunum en þegar um fjórar mínútur voru eftir af fyrsta leikhluta náði Snæfell frábærum kafla. Eyþór Lár, Ísak Örn og Alex Rafn komu þá ferskir inn af bekk Snæfells og hjálpuðu liðinu að ná góðri forystu eftir leikhlutann. Staðan 14-20, Snæfelli í vil. Liðsmenn Snæfells voru að hreyfa boltann vel í sókn og uppskáru þeir stemningskörfu frá Sturlu Böðvarssyni sem kom Snæfelli í 15-23 snemma í öðrum leikhluta. Snæfell hélt uppi háu orkustigi og komst í stöðuna 16-31 en þá tók þjálfari Fjölnis leikhlé. Heimamenn í Fjölni komu úr leikhléi með mikla grimmd og náðu að saxa á forskot Snæfells með svakalegu áhlaupi, því á næstu fimm mínútum skoraði Fjölnir 21 stig gegn 8 stigum Snæfells og allt í einu var staðan orðin 37-39 fyrir Snæfelli. Gestirnir úr Stykkishólmi náðu að róa leikinn niður og með yfirvegun náðu þeir ágætis kafla undir lok fyrri hálfleiks og var staðan 37-43 Snæfelli í vil í hálfleik.

Aðeins höfðu liðið um þrjár mínútur af seinni hálfleik þegar Fjölnir var komið yfir í leiknum, 48-45 en aftur komu gæði Snæfells í ljós þegar varamenn stigu inn á völlinn. Snæfell náði að komast yfir þegar um þrjár mínútur voru eftir af leikhlutanum, 50-52 og spiluðu liðs körfubolta með dass af baráttu og gleði. Þjálfari Fjölnis brást við með að taka leikhlé en leikmenn Snæfells létu það ekki hafa nein áhrif á sig því þeir komu úr leikhléi staðráðnir í að bæta sinn leik sem og þeir gerðu. Snæfell náði 13 stiga forystu undir lok leikhlutans og gengu inn í fjórða og síðasta leikhlutann með stöðuna 52-65.

Í síðasta leikhlutanum náðu Snæfell ávallt að svara þeim áhlaupum sem Fjölnismenn reyndu. Gestirnir úr Stykkishólmi voru með átta til tíu stiga forystu í leikhlutanum og náðu þeir að klára fyrsta leik tímabilsins með frábærum átta stiga sigri. Lokatölur í Grafarvogi, Fjölnir 76 – Snæfell 84. Khalyl Waters var stigahæstur í liði Snæfells með 31 stig og sjö fráköst.

Næsti leikur Snæfells er föstudaginn 11. október en þá tekur Snæfell á móti Ármanni í íþróttahúsinu í Stykkishólmi kl. 19.15.

Snæfell byrjaði tímabilið með sterkum sigri