Guðlaugur Þór Þórðarson umhverfisráðherra hefur staðfest tillögu Umhverfisstofnunar að fyrirkomulagi rjúpnaveiða fyrir árið 2024. Tillögurnar voru unnar eftir nýju veiðistjórnunarkerfi sem tekið var upp með stjórnunar- og verndaráætlun rjúpu sem ráðherra undirritaði í haust. Veiðidagar verða heilir og heimilt er að veiða frá og með föstudögum til og með þriðjudögum innan veiðitímabils á hverju svæði. Landinu er skipt upp í sex mismunandi svæði og ný stofnlíkön hafa reiknað út ákjósanlega lengd tímabils á hverju svæði fyrir sig. Veiðitímabil verða því misjafnlega löng. Hér á Vesturlandi verður leyft að veiða í 20 daga á tímabilinu frá 25. október til 19. nóvember. Á Vestfjörðum og Austfjörðum verður veiðitímabilið lengra en annarsstaðar, eða 25 dagar á Vestfjörðum og 43 dagar á Austfjörðum þar sem tímabilinu lýkur 22. desember.