Rætt við Teit Björn Einarsson alþingismann

Kosið verður til Alþingis á næsta ári. Tæknilega séð lýkur kjörtímabilinu næsta haust en margir eru þeirrar skoðunar að það henti betur hér á landi að kjósa að vori, eins og tíðkaðist áður fyrr. Um það er forystufólk í sitjandi ríkisstjórn að vísu ekki á einu máli, en Svandís Svavarsdóttir matvælaráðherra og verðandi formaður VG, hefur lýst því afdráttarlaust yfir að kjósa eigi næsta vor, það sé ekki lengur til setunnar boðið. Forystumenn hinna flokkanna hafa þó heldur talað fyrir því að stjórnin sitji út kjörtímabilið. Hvað sem því líður er ljóst að stjórnmálaflokkar eru farnir að brýna sverðin fyrir komandi átakavetur á þingi og framboð sín. Sömuleiðis eru nokkrir sitjandi þingmenn farnir að auka við greinaskrif, mæta við ýmsa viðburði eða boða til funda með kjósendum. Slíkt gerði einmitt Teitur Björn Einarsson alþingismaður Sjálfstæðisflokksins í Norðvesturkjördæmi síðastliðinn föstudag. Hann hafði það sem kallað er opna skrifstofu í hádeginu á Breið þróunarsetri á Akranesi og bauð gestum í spjall. Nokkrir þáðu boðið og líflegar umræður spunnust. Teitur Björn kom í framhaldinu við í stutt spjall á ritstjórn Skessuhorns.

*Síðastliðinn föstudag bauð Teitur Björn upp á opna skrifstofu, að þessu sinni á Breið á Akranesi.*

Býður sig fram

Fyrst að máli málanna, munt þú gefa kost á þér til áframhaldandi starfa fyrir Sjálfstæðisflokkinn? „Já, ég mun gefa kost á mér til áframhaldandi þingsetu fyrir Sjálfstæðisflokkinn í Norðvesturkjördæmi. Ég gaf kost á mér í prófkjöri árið 2021 og hafnaði í þriðja sæti listans og tók síðan sæti á Alþingi þegar Haraldur Benediktsson sagði af sér þingmennsku til að taka við starfi bæjarstjóra á Akranesi,“ segir Teitur Björn. „Það verður hins vegar í höndum kjördæmisráðs Sjálfstæðisfélaganna í Norðvesturkjördæmi að ákveða með hvaða hætti framboðslisti verður settur saman.“ Aðspurður um hvort Skagakonan Þórdís Kolbrún R. Gylfadóttir utanríkisráðherra og oddviti Sjálfstæðismanna í Norðvestur muni áfram bjóða fram í kjördæminu, svarar Teitur því til að því verði hún sjálf að svara. „Landsfundur Sjálfstæðisflokks verður haldinn um miðjan febrúar og þá mun væntanlega skýrast hvort einhver breyting verður á forystu flokksins.“

Kjörtímabilinu lýkur næsta haust

Komandi þingvetur, býstu við að þetta verði átakasamt þing? „Já, það er nokkuð ljóst. Það verður tekist á um strauma, stefnur og leiðir. Þingveturinn mun örugglega litast af komandi kosningum. Hins vegar ríkir skilningur um að klára þurfi ákveðin brýn mál sem eru í gangi. Náðst hefur breið sátt í þinginu á undanförnum árum þegar mikið liggur við. Nærtækasta dæmið eru líklega viðbrögð við náttúruhamförum á Reykjanesi og málefnum Grindavíkur sérstaklega. Vonandi nær þingið þannig lendingu í þeim mikilvægu málum sem nú liggja fyrir.“

Aðspurður um hvort kosið verði í vor eða næsta haust svarar Teitur Björn því að allir flokkar á þingi þurfi að taka þetta samtal um hvenær skynsamlegt sé að rjúfa þing og boða til kosninga. „Kjörtímabilinu lýkur hins vegar ekki fyrr en næsta haust. En auðvitað eru ákveðin rök með því að kjósa fremur að vori eins og hefð hefur verið fyrir. Það er því ekki hægt að útiloka að það verði niðurstaðan.“ Blaðamaður bendir á að Svandís Svavarsdóttir verðandi formaður VG hafi sagt það skoðun sína að kjósa eigi í vor. „Ég held nú að þetta útspil Svandísar hafi verið meira til heimabrúks. Framundan er landsfundur VG og hún vildi greinilega varpa þessum bolta fram á þessum tímapunkti. Umræðan á hins vegar eftir að fara fram um þetta milli stjórnarflokkanna og annarra flokka á þingi. Ríkisstjórnin hefur sett ákveðin mál á oddinn sem hún vill klára. Nefni ég áherslur í ríkisfjármálum og að ná böndum á verðbólguna sem fyrst. Þá eru útlendingamál og orkumál ofarlega á baugi. Það er alveg ljóst að nú í haust þarf að ljúka við og samþykkja samgönguáætlun sem og fjárlagafrumvarpið. Ég er hins vegar á því að ákvörðun um hvenær á að kjósa þarf að liggja fyrir fljótlega. Almenningur á rétt á að vita þetta í tíma til að geta tekið upplýsta afstöðu.“

Víðfeðmt kjördæmi

En að störfum þingmanns í Norðvesturkjördæmi. Þú tekur sæti á þingi þegar Haraldur Benediktsson segir af sér þingmennsku og er ráðinn í stöðu bæjarstjóra á Akranesi fyrir hálfu öðru ári síðan. Hvernig hefur þér gengið að setja þig inn í hlutina? „Það hefur verið áhugavert að kynnast þeim stóru málaflokkum sem þingmenn almennt þurfa að kunna góð skil á. Við erum til að mynda í miklum samskiptum við sveitarfélög og landshlutasamtök þeirra. Svo eru það heilbrigðismál, menntamál og samgöngumál, þar með talin hafnarmál og flugvellir. Störf okkar þingmanna hverfast í raun mikið um alla grunnþjónustu og samskipti við stofnanirnar sem veita hana,“ segir Teitur Björn og heldur áfram: „Það liggur fyrir að Norðvesturkjördæmi er einstaklega erfitt yfirferðar í ljósi þess hversu stórt og víðfeðmt það er. Af landfræðilegum ástæðum er kjördæmið mjög hólfaskipt og atvinnustarfsemi innan þess fjölbreytt. Því hefur það oft reynst þingmönnum kjördæmisins erfitt að vera í beinum og milliliðalausum samskiptum við íbúa. Á næstu vikum og mánuðum langar mig að efla tengslin og vera með opna skrifstofu, eins og það er kallað, víða um kjördæmið, þangað sem fólk getur mætt og farið yfir málin. Auðvitað geta þingmenn, líkt og aðrir, notast við samfélagsmiðla og tölvupósta til að rækta samskipti við fólk, en sjálfur er ég hrifnari af því að ræða við fólk í eigin persónu. Þá finnur maður best hvað það er sem raunverulega brennur á fólki.“

Samgöngur sameiginlegt hagsmunamál

Segja má að heita kartaflan á meðal íbúa sé vegamálin. „Góðar og skilvirkar samgöngur eru sameiginlegt hagsmunamál fólks í kjördæminu. Það liggur fyrir að Norðvesturkjördæmi situr svolítið eftir, í samanburði við suma landshluta, þegar kemur að ástandi vegakerfisins og fjármögnun nýframkvæmda. Undanfarið hafa mestar framkvæmdir verið á suðursvæði Vestfjarða sem orsakast af þeirri miklu innviðaskuld sem safnast hafði upp á því svæði í gegnum áratugina. Á móti má segja að Norðurland vestra og Vesturland beri skarðan hlut frá borði. Það má því til sanns vegar færa að nú gætir ósanngirni og ákveðinnar misskiptingar í uppbyggingu stofnvegakerfisins í kjördæminu. Ég bind hins vegar vonir við að nú í haust verði úthlutað meiri fjármunum úr svokölluðum tengivegapotti sem gæti haft jákvæð áhrif á til að mynda Borgarfjörð, Dali og Norðurland vestra. Samgönguáætlun, sem lögð verður fyrir þingið í október, verður vonandi afgreidd í breiðri sátt þannig að framkvæmdir árið 2025 komist á góðan rekspöl.“

Aðspurður játar Teitur Björn því að ástæða þess að samgönguáætlun var ekki samþykkt á vorþingi hafi verið framúrkeyrsla við brúun og vegagerð á Hornafjarðarfljóti. Framkvæmd sem upphaflega stóð til að yrði samvinnuverkefni, en verktakar vildu ekki taka þátt í slíku, en engu að síður var farið af stað með verkefnið fyrir nánast opinn reikning Ríkissjóðs.

En við ljúkum þessu síðdegisspjalli blaðamanns og Teits Björns Einarssonar. Hann var á leið norður í Skagafjörð til að verja helginni þar með fjölskyldunni. Hann sagði að framundan væri annasamur vetur á Alþingi Íslendinga en sjálfur væri hann bara rétt að byrja. Ætlar ótrauður að gefa kost á sér til áframhaldandi starfa fyrir Sjálfstæðisflokkinn í Norðvesturkjördæmi.

Mun gefa kost á sér að nýju

Rætt við Teit Björn Einarsson alþingismann

Rætt við Teit Björn Einarsson alþingismann