Körfuboltatímabilið hefst 4. október næstkomandi þegar 1. deild karla og 1. deild kvenna fer af stað. Þrjú lið af Vesturlandi keppa í 1. deild karla og eitt lið í 1. deild kvenna. Skessuhorn hafði samband við þjálfara liðanna og fór yfir komandi tímabil.

*Alejandro Rubiera er nýr þjálfari kvennaliðs Snæfells.*

Snæfell í 1. deild kvenna

Nýr þjálfari er kominn til starfa hjá Snæfelli en Alejandro Rubiera var ráðinn aðalþjálfari liðsins. Honum til halds og trausts verður Óttar Sigurðsson aðstoðarþjálfari. Rubiera mun einnig spila með karlaliði Snæfells en kvennalið Snæfells spilar í 1. deild í ár eftir að hafa spilað til undanúrslita um sæti í Subway deildinni í ár. En hvernig hefur undirbúningstímabilið gengið hjá liðinu? „Hjá mér byrjaði undirbúningstímabilið 15. ágúst en ég kom fyrr til að kynnast öllum leikmönnum og byrjaði með æfingar. Undirbúningur hefur gengið mjög vel, leikmenn hafa verið að slípa sig saman á æfingum og í æfingaleikjum og verður spennandi að byrja tímabilið, 12. október,“ segir Rubiera þjálfari.

Fyrsti leikur liðsins verður gegn Stjörnunni U og spilað verður í Stykkishólmi, en hvernig hefur gengið að koma sér inn í samfélagið í Stykkishólmi? „Ég er mjög ánægður með hvernig mér hefur verið tekið síðan ég kom í Stykkishólm. Fólkið í kring um félagið hefur hjálpað mér að komast inn í samfélagið og ég er mjög ánægður með hvernig umgjörðin er í kring um félagið,“ segir Rubiera. Auk nýs þjálfara, hafa orðið breytingar á leikmannahópnum síðan í fyrra. „Í ár erum við með nýtt lið. Stjórn Snæfells vildi gera breytingar og erum við í ár með mjög ungt lið sem mun spreyta sig á stóra sviðinu og verður spennandi að fylgjast með því í vetur. Við bættum við okkur tveimur erlendum, reynslumiklum leikmönnum sem vonandi gerir liðið að sterkum andstæðingi í 1. deildinni í vetur,“ segir Rubiera. En eru einhverjir leikmenn sem áhorfendur ættu að fylgjast vel með í vetur? „Ég held að ungu stelpurnar úr Stykkishólmi eigi eftir að standa sig vel í ár. Eins held ég að erlendu leikmennirnir okkar, þær Daniel Shafer og Carlotta Ellenreider eigi eftir að vera mjög áberandi í vetur. Annars held ég að allt liðið muni verða umtalað í vetur, vegna vinnuseminnar sem við munum sýna á vellinum, hvernig við munum spila hraðan körfubolta og tökum góðar ákvarðanir á vellinum,“ nefnir Rubiera.

Ungir og efnilegir leikmenn mynda sterkan kjarna liðs Snæfells í vetur. Auk þess hafa þrír ungir leikmenn frá Skallagrími bæst í hópinn og hefur Rubiera þjálfari skýr markmið fyrir tímabilið. „Markmið okkar er að láta ungu leikmenn okkar vaxa og þróa sinn leik, á þessu tímabili og fyrir framtíðina. Við ætlum að búa til góðan kjarna af íslenskum leikmönnum en ég hef mikla trú á þeim ungu leikmönnum sem eru nú í liðinu og sé fyrir mér að þær eigi eftir að blómstra í vetur,“ nefnir Rubiera þjálfari en sér hann fyrir sér hvernig 1. deild kvenna muni spilast í vetur? „Hún verður mjög sterk en þar er að finna mikið af ungum leikmönnum sem spilað hafa með yngri landsliðum Íslands í bland við reynslumikla leikmenn. Af þeim liðum sem ég hef séð spila á undirbúningstímabilinu lítur út fyrir að KR og Ármann séu með sterkustu liðin, bæði lið eru með mikla reynslu og hæfileika. En í ár er Snæfell með sterkt lið, af ungum og efnilegum leikmönnum í bland við reynslumikla leikmenn og við vonumst til að vinna leiki strax í byrjun, láta vel í okkur heyra og þannig fáum við stemningu í samfélagið og komum okkur þannig af stað á tímabilinu,“ segir Alejandro Rubiera þjálfari kvennaliðs Snæfells.

*Þjálfari karlaliðs Snæfells, Gunnlaugur Smárason, er á sínu þriðja ári með liðið.*

Snæfell í 1. deild karla

Gunnlaugur Smárason er að byrja sitt þriðja tímabil með meistaraflokk Snæfells en hann kom liðinu upp úr 2. deild karla fyrir tveimur árum síðan. Tveir aðstoðarmenn verða með Gunnlaugi í vetur, þeir Guðni Sumarliðason og Baldur Þorleifsson. „Við byrjuðum að æfa strax eftir Verslunarmannahelgina en eins og gengur eru menn að vinna mikið á sumrin og því var ekki margt um manninn fyrstu vikurnar. Við fengum erlendu leikmenn okkar inn í æfingahópinn í byrjun september og þá fóru leikar að æsast örlítið á æfingum. Við erum komnir á ágætis skrið núna og það hefur gengið vel að manna æfingar og fín ákefð hefur verið á æfingum. Við erum nokkuð sáttir en auðvitað erum við ekki komnir á þann stað sem við viljum vera sem lið á þessum tímapunkti,“ segir Gunnlaugur í samtali við Skessuhorn.

Nokkrar mannabreytingar hafa orðið á liðinu á milli ára. „Ellert Þór, Ólafur Birgir og Jónas Már leituðu á önnur mið og við endursömdum ekki við erlendu leikmennina frá því í fyrra. Við fengum þrjá nýja erlenda leikmenn til liðs við okkur auk þess sem í íslenska kjarnann bættust þeir Alex Rafn og Ísak Örn sem eru öflugir Snæfellingar og hafa þeir styrkt hópinn. Við munum leggja upp með að spila körfubolta sem við ráðum við, að hreyfa boltann mikið því við erum með mörg vopn sóknarlega. Annars ætlum við að spila sem lið, sóknarlega og varnarlega í vetur,“ segir Gunnlaugur.

Markmið tímabilsins er að gera betur en á síðasta tímabili segir Gunnlaugur en hvernig líst honum á 1. deildina í ár? „Deildin er sterk og nokkur lið sem eru algjör spurningarmerki en sögurnar á götum bæjarins segja að bæði lið KV og KFG séu að safna í frábær lið þannig að þetta verður hörku deild þar sem allt getur gerst. Fjölnir og Hamar eru liðin sem margir spá toppbaráttu og ég held að Sindri verði þar líka. Erfitt er að segja með neðri helming deildarinnar þar sem ég held að liðin séu það jöfn,“ nefnir Gunnlaugur.

Erfiðlega hefur gengið hjá ýmsum liðum úti á landi að fiska til sín unga íslenska leikmenn. „Ég tel að við séum að gera þetta vel hérna í Stykkishólmi, við byggjum okkar lið upp á heimamönnum sem komu liðinu upp úr 2. deild fyrir tveimur árum og fáum svo erlenda leikmenn til þess að styðja við þá. Ég tel okkur heppna að hafa þann mannskap sem við erum með og ég tel þá heppna að fá að æfa við frábærar aðstæður og með frábært fólk á bak við sig. Við erum að reyna að halda umgjörðinni á úrvalsdeildarplani þó svo við séum ekki þar þessa stundina en ég hvet fólk sem vill starfa í kringum heimaleiki, grill og annað til að setja sig í samband við Danna Kazmi,“ segir Gunnlaugur.

Mikil spenna er komin í liðsmenn Snæfells til að hefja tímabilið og vonast Gunnlaugur til þess að brottfluttir Hólmarar ásamt heimafólki fylli áhorfendastúkurnar í vetur. „Við spilum fyrsta leik okkar gegn Fjölni í Grafarvoginum og vonumst við til að sjá okkar fólk þar. Annars er áhuginn mikill heima í Stykkishólmi fyrir að tímabilið byrji en körfuboltinn skiptir öllu máli fyrir samfélagið, að mínu mati. Heimaleikir Snæfells eru líklega stærstu samverustundir bæjarbúa yfir veturinn og langar mig til að hvetja Hólmara, nær og fjær, að mæta vel á leiki hjá okkur í vetur og styðja liðið því það skiptir ótrúlega miklu máli. Að lokum langar mig til að þakka öllum þeim sjálfboðaliðum sem vinna fyrir félagið og að ársmiðasalan er í fullum gangi. Áfram Snæfell,“ segir Gunnlaugur að lokum.

*Þjálfari Skallagríms, Pétur Már Sigurðsson, snýr aftur í Borgarnes.*

Skallagrímur í 1. deild karla

Pétur Már Sigurðsson er nýr þjálfari Skallagríms í 1. deild karla í vetur. Pétur spilaði fyrir Skallagrím á sínum tíma en hefur verið þjálfari hjá til dæmis Stjörnunni og Vestra auk þess sem hann hefur verið öflugur landsliðsþjálfari yngri flokka Íslands. „Mér finnst eins og ég sé að koma aftur heim og mér hefur verið tekið afar vel af öllu fólkinu í Borgarnesi,“ nefnir Pétur. Undirbúningstímabilið hafi gengið ágætlega að sögn Péturs. „Við byrjuðum 12. ágúst og hefur gengið ágætlega. Við höfum lent í nokkrum meiðslum en höfum lagt mikið upp með líkamlega þjálfun og erum við komnir á gott ról með það. Það hafa orðið breytingar á mannskapnum síðan í fyrra, nýir erlendir leikmenn hafa komið inn í hópinn auk þess sem við erum með reynslubolta í Orra Jónssyni og Ragnari Magna en einnig skrifaði Magnús Engill Valgeirsson undir samning í sumar og er það mikill happafengur fyrir félagið. Svo erum við með afar efnilega leikmenn sem fá eldskírn í vetur,“ nefnir Pétur.

Áhersla verði lögð á ákafan varnarleik í blandi við skipulagðan, hraðan sóknarleik. „Markmið okkar er að bæta sig með hverjum leik, bæði varnarlega og sóknarlega. Ég hef mikla trú á þessum hópi og held að strákar eins og Almar Orri, Eiríkur Frímann og Sævar Þór eigi eftir að springa út í vetur,“ bætir Pétur við. 1. deild karla hefst föstudaginn 4. október og er fyrsti leikur Skallagríms á útivelli gegn Ármanni í Reykjavík. „Deildin er sterk í ár og enginn leikur verður auðveldur. Þannig að við verðum að vera í toppstandi og vel einbeittir í hverjum leik. Í fljótu bragði myndi ég segja að Hamar, Fjölnir, Sindri og Breiðablik verði ofarlega en ég held að Ármenningar eigi eftir að koma á óvart. Annars er erfitt að segja um það því öll liðin eru sterk að mínu mati,“ segir Pétur.

Styrktarþjálfari frá Króatíu kom í heimsókn í Borgarnes í haust og hóf hann æfingar með liði Skallagríms. Jón Hrafn Baldvinsson aðstoðarþjálfari tók við af honum og hefur fylgt þeim æfingum eftir. „Ég er með einn aðstoðarþjálfara og einn liðsstjóra sem hjálpa með undirbúning og fleira. Allir eru orðnir mjög spenntir og geta ekki beðið eftir að byrja að spila en körfubolti skiptir miklu máli hér í Borgarnesi. Borgarnes er körfuboltabær, með mikla menningu og sögu þar á bak við, þannig að það skiptir máli að körfuboltaliðið okkar sé að gera vel. Áfram Skallagrímur,“ segir Pétur að lokum.

*Óskar Þór Þorsteinsson, þjálfari ÍA, kemur að norðan á Skagann.*

ÍA í 1. deild karla

Óskar Þór Þorsteinsson er nýr þjálfari ÍA í körfunni. Hann hefur undanfarin tvö ár verið þjálfari Þórs frá Akureyri en er nú fluttur á Skagann. „Ég er fluttur hingað og það hefur gengið vel að komast inn í samfélagið. Það er mikil íþróttahefð hér og ég er hægt og rólega að kynnast öllu því góða fólki sem starfar í kringum íþróttirnar hér,“ segir Óskar. Undirbúningstímabilið hjá ÍA hófst eftir verslunarmannahelgina og hafa æfingar gengið vel. „Við fengum nýja leikmenn en Victor Baffuto, stór strákur frá Brasilíu, verður undir körfunni hjá okkur, við fengum bandarískan leikstjórnanda í Kinyon Hodges og svo kom Kristófer Gíslason til okkar en hann spilaði með Fjölni í fyrra. Geradas Slapikas hélt aftur til Hauka og Jónas Steinarsson skipti yfir í ÍR,“ nefnir Óskar.

Markmið liðsins verði að berjast í efri hluta deildarinnar en hvernig körfubolta mun liðið spila í vetur? „Við munum spila hraðann og skemmtilegan körfubolta. Við viljum vera með hátt orkustig, bæði í vörn og í sókn og nýta þá dýpt sem við höfum í leikmannahópnum. Ég held að áhorfendur þurfi að fylgjast vel með bandaríska leikmanni okkar en hann mun án efa vera með nokkrar troðslur í vetur sem enda inn á tilþrifum vetrarins,“ segir Óskar.

En hvaða lið í 1. deild karla telur Óskar þau sterkustu? „Ég held að Fjölnir, Hamar og Sindri séu öll lið sem ætla sér að fara langt og sigrar gegn þessum liðum vega mikið. Það er erfiðara að spá fyrir um neðri hluta deildarinnar en ég tel að það muni ekki vera margir sigrar á milli liðanna sem enda í 4. sæti og 10. sæti. Það verður sérstaklega áhugavert að sjá hvernig KV og KFG líta út en við höfum ekki miklar upplýsingar um leikmannahópinn þeirra,“ segir Óskar.

Fyrsti leikur ÍA er föstudaginn 4. október en liðið fer þá í ferðalag til Hafnar í Hornafirði og leikur gegn Sindra. „Ég fæ daglega spurningar um hvenær tímabilið hefjist og við erum líka rosalega ánægð að fá aftur að æfa og spila á Vesturgötunni í vetur. Ég trúi ekki öðru en það verði mikil stemning á leikjum í vetur en körfubolti og íþróttir yfir höfuð skipta gífurlega miklu máli í að binda saman samfélagið,“ segir Óskar að lokum.

Körfuboltatímabilið að hefjast – Rætt við þjálfara Vesturlandsliðanna