Athugun Gæða- og eftirlitsstofnunar (GEV) velferðarmála á gæðum barnaverndarþjónustu í sveitarfélaginu Borgarbyggð leiddi m.a. í ljós óskýra verkferla, skort á leiðbeiningum til starfsfólks og brot gegn málsmeðferðarreglum barnaverndarlaga. Þetta kemur fram í skýrslu sem birt var á vef GEV í dag. GEV tók ákvörðun í mars 2023 um að hefja frumkvæðiseftirlit í formi athugunar á gæðum barnaverndarþjónustu Borgarbyggðar. Tilefnið var fjöldi erinda sem borist höfðu stofnuninni og alvarleiki þeirra, bæði ábendingar og kvartanir er sneru að gæðum barnaverndarþjónustu Borgarbyggðar. Markmið athugunarinnar var að kanna starfsemi barnaverndarþjónustunnar, vinnubrögð og málsmeðferð og annað sem varpað gæti ljósi á gæði þjónustunnar og hvernig og hvort hún samræmist lögum, reglugerðum, reglum og leiðbeiningum sem fylgja skal við vinnslu barnaverndarmála. Athugunin var afmörkuð við þjónustu sem veitt var á tímabilinu 1. janúar 2022 til 1. apríl 2023. Margvísleg gögn voru tekin til skoðunar í athuguninni auk þess sem rætt var við starfsfólk og stjórnendur. Niðurstöður GEV sýna töluverðan og alvarlega misbrest við vinnslu mála hjá barnaverndarþjónustu Borgarbyggðar á tímabilinu sem athugunin náði til.