Rætt við Brynjar Kristmundsson þjálfara Víkings um nýliðið tímabil

Víkingur Ólafsvík varð í fjórða sæti í 2. deild karla í knattspyrnu í sumar. Liðið fékk 42 stig úr 22 leikjum, vann tólf, gerði sex jafntefli og tapaði fjórum. Víkingur var á sínu þriðja ári í 2. deild og endaði í fimmta sæti á síðasta tímabili. Brynjar Kristmundsson var þjálfari liðsins í sumar eins og í fyrra. Blaðamaður Skessuhorns heyrði í honum í síðustu viku til að ræða tímabilið eins og það gekk fyrir sig. Brynjar sagði í viðtali við Skessuhorn fyrir mót að markmiðið væri að komast upp úr deildinni og þegar tímabilinu lauk voru þeir aðeins einu stigi frá því.

*Lið Víkings Ó. tímabilið 2024. Ljósm. tfk*

Þokkalega sáttur við byrjunina

Í maí spilaði lið Víkings fimm leiki þar sem það vann góða sigra á Völsungi og Þrótti Vogum en gerði jafntefli við KFA, Selfoss og Reyni Sandgerði. Varstu sáttur við þessa byrjun? „Ég var þokkalega sáttur við þessa byrjun. Eftir góðan sigur í 1. umferð fannst okkur mjög sterkt að fara austur og ná í eitt stig þar, sérstaklega eftir að hafa lent 2-0 undir. Við vorum að koma okkur í frekar erfiðar stöður í þessum jafnteflisleikjum en vorum að sýna mikinn karakter að vera að koma til baka og jafna leikina seint í leikjunum.“

Þið byrjið júní mjög vel, þrír góðir sigrar í röð á móti KF, Haukum og Hetti/Hugin og síðan gerið þið jafntefli við KFG í markaleik á útivelli, 4:4, þar sem þið skorið tvö mörk í uppbótartíma. Þarna eruð þið í öðru sæti deildarinnar og þremur stigum á eftir Selfossi. Var ekki ljóst þarna að markmiðið væri að reyna að halda sér í toppbaráttunni allt til enda? „Jú, markmiðið var svo sem allan tímann að vera í toppbaráttu. Þarna sáum við hins vegar virkilegan möguleika að vera að berjast um þessi efstu tvö sæti.“

Júlí byrjar á jafntefli á móti Kormáki/Hvöt, síðan kemur sigur gegn Ægi og tap á móti Völsungi. Eftir það vinnið þið KFA heima og júlí lýkur með 3:2 tapi á móti Þrótti Vogum. Hvernig var staðan á liðinu þarna? „Staðan á hópnum á þessum tíma var bara þokkaleg. Meiðsli og leikbönn voru farin að tikka inn en við vorum ekki eina liðið sem var að lenda í því og það fylgir bara.“

Gaman að vera hluti af toppbaráttunni

Fyrsti leikur í ágúst er tapleikur gegn Selfossi, þið vinnið síðan nauman sigur á botnliði Reynis en tapið síðan illa á móti KF, 4:1. Síðan fylgja tveir sterkir sigrar gegn Haukum og Hetti/Hugin og þegar aðeins þrjár umferðir eru eftir af mótinu eruð þið í baráttu við Völsung og Þrótt um að komast upp. Það er óhætt að segja að deildin hafi verið spennandi í sumar? „Já, deildin var bara virkilega jöfn og skemmtileg. Á þessum tímapunkti voru Þróttur Vogum og Völsungur á þvílíku skriði á meðan við vorum svolítið að vinna og tapa til skiptis. Það var ótrúlega gaman að vera hluti af þessari toppbaráttu. Það var mikið stress og adrenalín í gangi allan tímann sem maður var bara orðinn háður og mikið hrós til Selfoss og Völsungs sem áttu bara mest skilið að fara upp úr þessari deild.“

Í byrjun september kemur þriðji sigurinn í röð sem er gegn KFG og það er ljóst fyrir leik ykkar á móti Ægi í næstsíðustu umferðinni að með sigri gátuð þið náð öðru sætinu ef úrslitin yrðu jafntefli í leik Völsungs og Þróttar sem varð raunin. Þið gerið jafntefli við Ægi í leik sem þið voruð sterkari aðilinn en nýttuð ekki færin vel. Var ekki svekkjandi að missa af þessu gullna tækifæri að komast í annað sætið fyrir lokaumferðina? „Jú, það var að sjálfsögðu mjög svo svekkjandi. Mest svekkjandi var frammistaðan í þessum leik. Við þorðum ekki alveg að taka af skarið og taka yfir leikinn og hleypum þeim frekar auðveldlega inn í þann leik eftir ágætis byrjun hjá okkur.“

Þurfum að verða stærri á útivelli

Sigur í síðasta leik á móti Kormáki Hvöt skiptir engu því Völsungur rótburstar KFA 8:3 í sínum leik og tryggir sér sæti í Lengjudeildinni á næsta ári ásamt Selfossi. Þegar horft er yfir sumarið er ljóst að þið voruð gríðarlega sterkir á heimavelli, þið vinnið tíu leiki og gerið eitt jafntefli sem er á móti toppliði Selfoss. Hins vegar er árangur ykkar á útivelli alls ekki góður, þið vinnið aðeins tvo leiki, gerið fimm jafntefli og tapið fjórum leikjum. Hver er skýringin á þessu að þínu mati? „Við einhvern veginn náðum aldrei að vera við sjálfir á útivelli, sérstaklega á grasvöllum. Þetta var ef til vill komið aðeins of mikið í hausinn á okkur og við stigum aðeins of mikið í burtu frá því sem við vorum búnir að vera að gera vel á heimavelli og er það eitthvað sem við lærum bara af. Okkur líður ótrúlega vel á okkar heimavelli en við þurfum að verða aðeins stærri á útivelli ef við viljum ná að stíga þetta skref til fulls að fara upp úr þessari deild.“

Virkilega erfitt að missa Luke Williams út

Fyrirliðinn Luke Williams spilaði mjög vel í fyrstu sjö leikjum mótsins þar sem hann skorar sjö mörk sem er ansi gott af miðjumanni að vera. Hann meiðist síðan snemma í næsta leik á móti KFG í lok júní og spilar síðan ekki fyrr en seint í ágúst fyrri hálfleik á móti Haukum. Það hlýtur að hafa verið mikið áfall að missa svona sterkan leiðtoga úr liðinu? „Það var virkilega erfitt að missa Luke út. Hann er einstakur leikmaður og leiðtogi. Það er alltaf erfitt fyrir lið að missa út sína menn en þetta er bara hluti af leiknum og þurftum við að bregðast við því sem við gerðum að vissu leyti. En oft á tíðum fundum við fyrir því að það vantaði hans gæði inn á völlinn og það gerði vafalaust gæfumuninn í sumum leikjum.“

Það er ljóst að Kári mun spila í 2. deildinni á næsta ári. Verður ekki gaman að fá nágrannaslag aftur á dagskrá? „Það er virkilega skemmtilegt að fá Kára upp í 2. deild. Það er frábært starf sem þeir eru að vinna uppi á Skaga, mikið af ungum strákum sem eru að fá tækifærið og stórt hrós til allra þeirra sem eru í Kára.“

Nú er tveggja ára samningur þinn við Víking að renna út. Hefur þú áhuga á að vera áfram með liðið og hvernig er staðan á þessu? „Já, mér finnst mínu verki ekki vera lokið hjá Víkingi. Við erum í viðræðum um nýjan samning og vonandi komumst við að samkomulagi. Mér líður ótrúlega vel hérna og vil ég ná mínum markmiðum hjá félaginu áður en ég fer að hugsa um einhver önnur skref,“ segir Brynjar Kristmundsson þjálfari Víkings að lokum.

„Mér finnst mínu verki ekki lokið hjá Víkingi“

Rætt við Brynjar Kristmundsson þjálfara Víkings um nýliðið tímabil

Rætt við Brynjar Kristmundsson þjálfara Víkings um nýliðið tímabil