Rætt við Valdísi Sigurvinsdóttur, umsjónarmanni Kviku – Skapandi rýmis í Borgarnesi

Valdís Sigurvinsdóttir er fædd og uppalin á Akranesi. Hún fann eiginmann sinn, Reyni Jónsson, inni í matsal Fjölbrautaskóla Vesturlands á Akranesi þegar hún var 19 ára gömul og býr hún ásamt Reyni og fjórum börnum þeirra á Akranesi. Valdís sá auglýsingu um splunkunýtt starf við Menntaskóla Borgarfjarðar vorið 2022, auglýsingin tikkaði í öll box sem henni langaði til að gera, hún sótti um og tók við rými Kviku haustið 2022.

*Hópur kvenna frá Zonta klúbbi Borgarfjarðar að störfum.*

Mikinn áhuga á tækni og stafrænni vinnu

Valdís er grunnskólakennari í grunninn og lærði myndmenntakennarann þó svo að hún hafi lítið unnið sem slíkur. „Ég starfaði sem umsjónarkennari í Grundaskóla á Akranesi í mörg ár en svo hafði ég mikinn áhuga á nýsköpun og Fab Lab vinnu. Ég tók nokkur námskeið og áfanga í Fab Lab en seinna meir var ég fengin til að taka við gamalli smíðastofu og breyta henni í nokkurs konar Fab Lab smiðju,“ segir Valdís og bætir við: „Ég er mikið sjálfmenntuð, hef mikinn áhuga á tækni og stafrænni vinnu,“ bætir hún við.

Fab Lab kemur af ensku orðunum Fabrication Laboratory eða eins konar framleiðslu tilraunasmiðja. Smiðja sem er með tækjum og tólum til að búa til nánast hvað sem er en Fab Lab smiðjur gefa ungum sem öldnum, einstaklingum, félagasamtökum og fyrirtækjum tækifæri til að þjálfa sköpunargáfuna og hrinda hugmyndum sínum í framkvæmd. Fjöldi starfandi Fab Lab smiðja á Íslandi er nú 13. En hvernig er þróunin í til dæmis smíðastofum í dag? „Í mörgum skólum hafa breytingar átt sér stað. Margar smíðastofur hafa bætt við sig tækjum eins og vínylskera og 3D prentara, flestir leggja þó í grunninn áherslu á handverkið þ.e. nemendur fá að kynnast smíðakennslu eins og við þekkjum flest en í framhaldi af því fá nemendur kennslu í nýsköpunarmennt ásamt kennslu á þau tæki og forrit sem standa til boða.

Smíðaverkstæði eru að þróast í þessa átt, mikil vinna fer fram í hugbúnaði sem tengjast tölvustýrðum tækjum sem t.d. fræsa og skera út í timbur. Tæknikunnáttan er orðin ótrúlega stór partur af okkar daglega lífi,“ nefnir Valdís.

*Meðlimir ungliðadeildarinnar Glanna útbýr peysur með sérhönnuðu lógói.*

Rýmið var hálf tómt

Valdís mætti til vinnu í Menntaskóla Borgarfjarðar en þurfti að koma sér fljótt til verka. „Ég byrjaði að setja upp tæki og tól, það var búið að kaupa inn ýmis tæki en það tók mig fyrstu önnina að koma mér inn í tæknimálin, gerði nokkur tilraunaverkefni í tengslum við skólann en svo fór ég inn í STEAM kennsluna sem skólinn er nú í,“ segir Valdís.

STEAM stendur fyrir Science, Technology, Engineering, Arts and Mathematics eða á íslensku Vísindi, Tækni, Verkfræði, Listir og Stærðfræði en þessir STEAM áfangar eru hluti af stærra þróunarverkefni hjá MB sem kallast Menntun fyrir störf framtíðar. Boðið er upp á þrjá áfanga á fyrsta, öðru og þriðja þrepi og er kennslan verkefnamiðuð.

Greinarnar eru samþættar og er lögð áhersla á að kenna skapandi og gagnrýna hugsun í gegnum verkefni sem eru þverfagleg og geta byggt á áhugasviði nemenda sjálfra. „Þetta eru skylduáfangar til stúdentsprófs og er grunnurinn lagður í fyrsta áfanga. Krakkarnir hér í skólanum eru ótrúlega klárir, þekking þeirra er ávallt að aukast og það er ávallt líf og fjör hérna hjá okkur,“ segir Valdís og brosir.

Gaman að sjá þau blómstra hér inni

Blaðamaður og Valdís sitja inn í rými og spjalla, rými þar sem myndavélar, upptökutæki og ýmsar tölvur eru til staðar. Nemendur MB eru allan veturinn að vinna verkefnavinnu og nýta þeir aðstöðu Kviku mikið. „Í öllum áföngum skólans er lögð áhersla á að nemendur öðlist leikni í að setja fram og miðla hugmyndum sínum og þekkingu með faglegum hætti í gegnum stafrænar leiðir. Stór hluti af verkefnavinnunni fer fram hér og hafa nemendur meðal annars hannað alls konar námsspil sem þeir skáru út í lasertækinu og þrívíddarprentaranum. Svo er lítil listasmiðja hér sem þeir hafa aðgang að. Ef nemendur eru með hugmynd, þá geta þeir framkvæmt hana hér. Og ef við eigum ekki rétta efnið eða græjurnar, þá reynum við að útvega þeim það,“ segir Valdís. Nemendur hafa oft val þegar kemur að því að skila inn verkefnum. „Þeir geta t.d. skilað inn ritgerð eða búið til hlaðvarp. En stundum átta nemendur sig ekki á því að það er heljarinnar vinna á bakvið hlaðvörp. Þeir geta komið hingað inn og tekið upp, verða að vera tilbúnir með handrit en síðan er hellings stafræn vinna eftir, klippivinna við eftirvinnslu og setja inn ýmsa hljóðbúta. Það versta við það er að ég sé aldrei útkomuna, því krakkarnir fara með verkefnið og skila því til kennara,“ segir Valdís og hlær en bætir við: „Ég held að mörg séu ánægð með það að geta skilað inn verkefnum þannig og er það sem ég hef séð og heyrt mjög flott hjá þeim. Að krakkar geti tjáð sig á fjölbreyttan hátt er mikilvægt og þessi aðstaða hjálpar þeim í því,“ nefnir Valdís.

*Ungmennaráð Borgarbyggaðr í peysum, merktum Borgarbyggð og Ungmennaráði.*

Borgarbyggð nýtir rýmið vel

Aðspurð um nýtingu á rýminu segir Valdís að margir aðilar í Borgarbyggð hafi nýtt aðstöðuna. „Hér hafa kennarar komið og tekið upp og búið til námsefni. Leikskólar hafa verið að koma hingað til að taka upp myndbönd og söngatriði en einnig var Aldan með fasta tíma hér en þau eru nú komin með flotta aðstöðu upp á Sólbakka hér í Borgarnesi. Á Barnamenningarhátíð var verkefni fyrir börnin að búa til leirkarla sem þau komu með hingað og við skönnuðum og prentuðum í þrívíddarprentara. Ýmis félagasamtök úr Borgarbyggð hafa verið að nýta aðstöðuna líka ásamt grunnskólum en það er ávallt gaman að kynna fyrir krökkunum tækin sem hér eru innanhúss,“ segir Valdís og brosir.

*Krakkar taka upp í mynd- og hljóðveri Kviku.*

Rými í stöðugri þróun

Kvika – Skapandi rými hefur upp á að bjóða ýmis tæki og tól sem rýmið hefur fengið frá ýmsum samtökum. „Megnið af tækjunum hér inni hafa komið með styrkjum til Kviku en til dæmis hafa kvenfélög og Lions klúbbar styrkt starfið hér og mér finnst svo gaman að fá gesti hingað inn sem eru forvitnir um allt sem er í gangi hér. En við hugsum þetta þannig að þetta rými sé stöðugt í þróun og við erum alltaf að bæta við okkur tækjum og tólum. Okkur langar til að verða Fab Lab og er það svona í framtíðarplaninu en þá þurfum við að bæta ýmsu við,“ nefnir Valdís. Nýbúið er að kaupa CAD prentara sem prentar út stórar arkir sem er nýttur við stafræna miðlun í skólanum en Valdís nefnir að hugsanlega verði almenningi einnig gefinn aðgangur að honum.

*Ungliðadeildin Glanni undirbýr peysur.*

Opið fyrir alla á miðvikudögum

Kvika – Skapandi rými er opið öllum áhugasömum milli klukkan 16.00 og 19.00 alla miðvikudaga í vetur. „Ég verð hér að hjálpa til, leiðbeina fólki með forritin og tæknina. Áhugasamt fólk kemur hingað en til dæmis var einn aðili sem kom með lógó sem hann hannaði sjálfur í einu forritinu sem við notum. Lógóið prentaði hann út á þrívíddar prentaranum og bjó til stimpil úr lógóinu, sem hann svo stimplaði á leður sem hann setti á flíkur en þessi aðili hannaði allt sjálfur. Það eru fastagestir sem koma og nýta þessa aðstöðu en það kostar ekkert að koma hingað með sínar hugmyndir. Það eru allir velkomnir hingað þó svo að fólk kunni ekki á nein tæki, ég reyni að hjálpa til eins og mikið og ég get. Skólinn á lager af efni og við seljum það út á sama verði og við kaupum það inn. Enginn hagnaður af neinu og við veitum aðgang að öllum tækjum,“ segir Valdís að lokum.

*Nemendur að taka upp viðtal við Oddnýju Kristínu Guðmundsdóttur frá Ráðgjafarmiðstöð landbúnaðarins.*

Ef hugmynd kviknar þá getum við framkvæmt hana hér

Rætt við Valdísi Sigurvinsdóttur, umsjónarmanni Kviku - Skapandi rýmis í Borgarnesi

Rætt við Valdísi Sigurvinsdóttur, umsjónarmanni Kviku - Skapandi rýmis í Borgarnesi