Í blíðskapar veðri í gær var Akrafjallið smalað og féð rekið til Reynisréttar. Af láglendinu var mikilfenglegt að fylgjast með þegar vaskir smalar hóuðu fénu af fjallsbrún og leið það smám saman niður snarbrattar hlíðar og skriður og áleiðis til réttar. Gangnamenn voru að þessu sinni heppnir með veður og áttu von á því að vel hafi smalast því skyggni var gott. Eftir að niður á láglendið var komið nærðust smalar áður en Lilja Guðrún Eyþórsdóttir réttarstjóri fyrirskipaði að nú skyldi hefjast handa við sundurdráttinn.