Rætt við Jón Theodór Jónsson framkvæmdastjóra knattspyrnudeildar Skallagríms

Veturinn hjá meistaraflokki karla í Skallagrími fór seint af stað. „Þjálfararáðningin gekk hægt fyrir sig þannig að við vissum að við værum að fara seint af stað. Æfingar hjá meistaraflokki Skallagríms geta ekki farið fram í Borgarnesi yfir veturinn þar sem hér er engin aðstaða. Flokkurinn hefur æft yfir veturinn í Akraneshöllinni seint á kvöldin, einu sinni til tvisvar í viku. Þá er auðvitað mjög erfitt að mynda bæði stemningu og búa til hóp þegar við æfðum bæði lítið og óreglulega, þannig að við vissum að við kæmum illa undirbúnir inn í tímabilið,“ segir Jón Theodór í samtali við Skessuhorn. Ráðinn var erlendur þjálfari, Scott Bowen, en honum var sagt upp starfi eftir tapleik í Vestmannaeyjum 21. júlí. „Scott Bowen gerði margt mjög vel stærstan hluta tímabils og við erum viss um að hann muni gera góða hluti í framtíðinni, en þetta var bara passaði ekki, því miður. Við hefðum þurft að ráða þjálfara sem þekkir deildina og kúltúrinn á Íslandi betur,“ segir Jón.

*Liðsmynd frá leik Skallagríms í sumar. Ljósm. eag.*

Markmiðið var að enda um miðja deild

Þegar komið var fram í lok júní mánaðar var liðið aðeins með tvo sigurleiki á móti sex tapleikjum. „Við spiluðum marga leiki á þessu tímabili þar sem boltinn var alltaf stöngin út en ekki inn. Það sást alveg að það bjó hellingur í liðinu en undir lok júní var það ljóst að hlutirnir voru ekki að ganga. Við vildum samt halda áfram á sömu braut og treysta á að hlutirnir færu að ganga betur,“ segir Jón. Hlutirnir gengu því miður ekki betur og voru þeir Declan Redmond og Carlos Saavedra ráðnir inn sem leikmenn og þjálfarar liðsins. „Declan og Carlos voru þeir einu sem við ræddum við. Mórallinn í hópnum var ekki góður á þeim tímapunkti tímabilsins en þeir félagar eru miklir Skallagrímsmenn, sem vita hvernig íslenskur neðri deildar bolti virkar og vissum við alveg hvað við vorum að fá í þessari ráðningu. Þeir myndu létta á öllu samhliða því að ætlast til þess að hver einasti leikmaður gæfi 100% í alla leiki og æfingar,“ segir Jón. Þrír sigurleikir, eitt jafntefli og tvö töp í síðustu sex leikjum liðsins þýddi að liðið féll niður í 5. deild karla.

Baksýnisspegillinn

En þegar horft er til baka, hefði verið hægt að gera eitthvað öðruvísi fyrir keppnistímabilið eða á miðju keppnistímabilinu? „Hópurinn okkar í sumar tók í raun litlum breytingum frá fyrsta leik til þess síðasta. Við söknuðum auðvitað þeirra Declan Redmond og Viktors Inga Jakobssonar framan af sumri. Í síðustu leikjum sumarsins vorum við alveg á pari við þau lið sem voru að berjast um að fara upp um deild. Skallagrímsvöllur stóð fyrir sínu eins og alltaf en grasið var gott þó svo að veðrið hafi oftar en ekki verið leiðinlegt á heimaleikjum í sumar. Varðandi stuðningsmenn vil ég sérstaklega nefna Elínborgu Þórðardóttur. Hún lét vel í sér heyra í stúkunni í sumar en það vantaði fleiri börn og forráðamenn í yngri flokkum Skallagríms á heimaleiki okkar. Í sveitarfélaginu er margt fólk sem á börn í fótbolta og vonandi munu sem flest þeirra eiga leiki með meistaraflokkum félagsins í framtíðinni. Mér finnst við eiga skilið meiri stuðning frá fólkinu okkar,“ segir Jón en er eitthvað jákvætt hægt að taka úr þessu sumri? „Meðalaldur liðsins í öllum leikjum var mjög lágur, við viljum alltaf vera félag sem gefur ungum leikmönnum sviðið. Í sumar sáum við marga unga drengi verða að mönnum. Ellefu heimamenn spiluðu leik eða leiki fyrir félagið, en samhliða því eru Skagastrákarnir okkar komnir með stórt Skallagrímshjarta og það er ánægjulegt að sjá hópinn okkar stækka svona statt og stöðugt,“ segir Jón.

Fimmta deild næsta sumar

Nú þegar keppnistímabilinu er lokið, hefur Jón náð að halda utan um hvernig næsta tímabil muni líta út? „Við ætlum bara að spyrna okkur upp aftur! Við förum niður saman og við förum aftur upp saman. Núna er markmiðið að rústa 5. deildinni næsta sumar og við komum svo fljúgandi inn í sumarið 2026 eftir að hafa æft allan veturinn í nýju knattspyrnuhúsi í Borgarnesi. Við stefnum á að halda í alla okkar leikmenn áfram og viljum auðvitað gefa ennþá fleiri ungum strákum tækifæri næsta sumar. Það getur verið fínt að byrja á botninum þegar maður ætlar að byggja eitthvað upp,“ segir Jón í lokin.

Við ætlum að spyrna okkur upp af botninum

Rætt við Jón Theodór Jónsson framkvæmdastjóra knattspyrnudeildar Skallagríms

Rætt við Jón Theodór Jónsson framkvæmdastjóra knattspyrnudeildar Skallagríms