Björgunarsveitir frá Drangsnesi og Hólmavík losuðu á miðvikudaginn hnúfubak sem hafði fest sig í veiðarfærum í Steingrímsfirði. Tilkynning um hvalinn barst Matvælastofnun og var hvalurinn þá talinn dauður. Myndir úr dróna samtakanna Whale Wise staðfestu hins vegar að dýrið væri lifandi en samtökin hafa verið við hvalarannsóknir á svæðinu. Var þá ráðist í björgunaraðgerðir að fengnu samþykki matvælaráðherra sem fer með málefni sjávarspendýra. Viðbragðsteymið „Hvalir í neyð“ var kallað kallað saman en teymið samanstendur af sérfræðingum og fulltrúum sex stofnana ríkisins auk Landsbjargar.