Ef borið er saman tímabilið janúar til og með ágúst árin 2023 og 2024 hefur gestum í baðlaugina Guðlaugu á Akranesi fækkað. Gestir á þessu ári voru 9.860, eða 41 að meðaltali á dag. Árið 2023 var heildarfjöldi á sama tímabili 15.290, eða 62 á dag.

Að sögn Daníels Sigurðssonar Glad, sem er forstöðumaður íþróttamála og íþróttamannvirkja hjá Akraneskaupstað, munar þar miklu um skólaheimsóknir sem eru vinsælar í lok maí og byrjun júní. „Vegna veðurfars í sumar var flestum þessara heimsókna aflýst. Fækkun gesta helst jafnframt í takti með veðurfari, sem hefur ekki verið hagstætt í sumar. Annað sem hefur áhrif á gestakomur í ár er aðgengið að Guðlaugu en vegna framkvæmda við nýtt íþróttahús hefur aðgengi verið með erfiðara móti allt þetta ár.“

Daníel segir hins vegar að mikil bæting sé á rekstri Guðlaugar. „Innkoman fyrir árið 2024 er rúmar 14 milljónir króna samanborið við rúmar fimm milljónir árið 2023. Heildarinnkoma 2023 voru rúmar sjö milljónir. Með þessu erum við að tryggja reksturinn til framtíðar og auk þess getum við boðið gestum upp á betri þjónustu. Gestir tala um að upplifa mikla ró þar sem hver og einn hefur nægt pláss til þess að njóta og heimsóknir eru að lengjast hjá hverjum og einum. Þá höfum við upplifað aukningu á heimamönnum í þessari þróun. Fleiri hafa keypt sér árskort í sund sem gilda jafnframt í Guðlaugu og mæta orðið reglulega til að njóta þess sem Guðlaug hefur upp á að bjóða.“

Daníel segir einnig hvað sundlaugina á Jaðarsbökkum varðar sjái þau töluverða aukningu á gestafjölda. „Mikil umræða var um breyttan opnunartíma sem tók gildi í apríl en ánægulegt er að sjá að gestakomum hefur fjölgað á kvöldin og sjáum við töluverða aukningu á börnum í sundi. Þá sjáum við mikla aukningu á sölu árskorta í sund það sem af er ári, eða tvöföldun í sölu.“

Ný rennibraut í kortunum?

Kostnaður við uppsetningu á kalda pottinum í Jaðarsbakkalaug var um 18 milljónir króna. Nýlega hafa verið settar upp nýjar vatnsrennibrautir í nágrannabæjunum Ólafsvík og í Stykkishólmi. Kostnaðurinn við að setja upp svona Polin rennibraut sem er 27 metra eins og er í Ólafsvík er um eða yfir 30 milljónir króna. Hefur eitthvað verið rætt nýlega hjá Akraneskaupstað að setja upp svipaða rennibraut í sundlaugina á Jaðarsbökkum? „Þegar ákvörðunin um að gera kalt kar var tekin var mikið ákall um slíka framkvæmd frá fastagestum laugarinnar. Með pottinum getum við nú boðið upp á eitt af flottari pottasvæðum sundlauga á landinu, með stórbrotnu útsýni út á flóann. Laugin fær mikið lof fyrir pottasvæðið frá gestum og mikil aðsókn er í kalda potta í sundlaugum landsins. Að því sögðu þurfum við klárlega að fara að horfa til uppbyggingar fyrir barnafjölskyldur í lauginni okkar. Vonandi auðnast okkur að koma því verki sem allra fyrst af stað en nú stendur yfir heildarendurskoðun á svæðinu á Jaðarsbökkum. Ekki hefur verið talið hægt að bæta við rennibraut álíka þeim sem hafa verið settar upp á Snæfellsnesi fyrr en heildarsamhengið verður tilbúið,“ segir Daníel að lokum.

Kaldi potturinn var settur upp í Jaðarsbakkalaug í desember 2022.

Gestum í Guðlaugu fækkar en reksturinn batnar