Síðasta fimmtudag var farin hin árlega ferð þar sem Verkalýðsfélag Akraness býður eldri félagsmönnum í dagsferð. Tæplega 50 eldri félagsmenn þáðu boð félagsins og komu með í þessa ferð sem heppnaðist eins og ætíð mjög vel en þetta kemur fram á vefsíðu félagsins.

Í árlegri ferð eldri félaga var farið að þessu sinni vestur á Snæfellsnes. Gísli S. Einarsson leiddi ferðina eins og honum er einum lagið. Fyrsta stopp var í gestastofu Snæfellsness á Breiðabliki og þar var skoðuð sýning um sjókonur á Snæfellsnesi. Þaðan lá svo leiðin í Stykkishólm og í Stykkishólmskirkju tók sóknarpresturinn séra Gunnar Eiríkur Hauksson á móti hópnum og sagði frá kirkjunni. Stykkishólmskirkja var vígð árið 1990, teiknuð af Jóni Haraldssyni arkitekt og altaristaflan María með barnið er eftir Kristínu Gunnlaugsdóttur. Í kirkjunni er glæsilegt pípuorgel af Klais gerð sem var tekið í notkun árið 2012.

Tekið var vel á móti hópnum í hádegisverði á Fosshótel Stykkishólmi. Allir gátu tekið vel til matar síns en boðið var upp á lambakjöt og meðlæti og sorbet ís í eftirrétt. Gísli spilaði á harmonikkuna og hópurinn söng með. Ætlunin var að fara í gestastofu Snæfellsjökulsþjóðgarðs á Hellissandi en mikill vindur var á norðanverðu nesinu. Því var planinu breytt og ákveðið að fara í gestastofu Snæfellsjökulsþjóðgarðs á Malarrifi í staðinn.

Á Malarrifi er þema sýningar vermaðurinn og náttúran. Hópurinn fékk stutta kynningu á staðnum frá starfsmanni Snæfellsjökulsþjóðgarðs og varð einhvers vísara um staðinn. Boðið var upp á kaffi og köku á Snjófelli Restaurant á Arnarstapa áður en haldið var heim á leið eftir góðan en vindasaman dag.

*Á Snjófelli Restaurant var boðið upp á kaffi og köku.*

Vel heppnuð ferð eldri félagsmanna hjá VLFA