Fjölmenni mætti á baráttufund á Austurvelli á þingsetningardegi

Þrjú af stærstu launþegasamtökum landsins; Alþýðusamband Íslands, BSRB og Kennarasamband Íslands, boðuðu síðdegis í gær til mótmæla á Austurvelli í Reykjavík. Sama dag var Alþingi sett, en hlé var gert á þingfundi meðan mótmælafundurinn stóð yfir. Mótmæli félaganna beindust gegn skeytingarleysi stjórnvalda gagnvart hárri verðbólgu og vöxtum. Forystufólk samtakanna flutti ávörp og KK söng. Ragnar Þór Ingólfsson formaður stjórnar VR stýrði fundinum, en auk hans ávörpuðu gesti þau Halla Gunnarsdóttir varaformaður VR, Sonja Ýr Þorbergsdóttir formaður BSRB, Þórarinn Eyfjörð og Magnús Þór Jónsson formaður Kennarasambandsins.

Fjöldi fólks lagði leið sína á Austurvöll og lét vel í sér heyra. Krafan var skýr; launafólk hefur lagt sitt af mörkum og nú verða stjórnvöld að standa með heimilum landsins. „Launafólk sættir sig ekki við aðgerðarleysi og innantóm loforð. Nú er nóg komið,“ sagði m.a. í ályktun fundarins. „Það sem á sér stað í íslensku samfélagi akkúrat núna er enn ein eignatilfærslan. Tilfærsla á eignum og fjármagni frá fólkinu sem skapar verðmætin og vinnur störfin til þeirra sem mest eiga. Enn á ný horfum við upp á varðstöðu um fjármagnsöflin og hver á að borga? Það erum við. Við sem vinnum. Við sem leigjum. Við sem skuldum,“ sagði Halla Gunnarsdóttir varaformaður VR í ávarpi sínu og bætti við: „Við viljum samfélag fyrir fólk, ekki fjármagn.“

„Viljum samfélag fyrir fólk, ekki fjármagn“

Fjölmenni mætti á baráttufund á Austurvelli á þingsetningardegi

Fjölmenni mætti á baráttufund á Austurvelli á þingsetningardegi