Ferðamálastofa, í samstarfi við Eyrúnu Jennýju Bjarnadóttur, hefur gefið út skýrslu þar sem kannað er viðhorf íbúa á landinu öllu til ferðamanna og ferðaþjónustu. Helstu niðurstöður hér á Vesturlandi, líkt og í öðrum landshlutum, var almenn ánægja með ástand innviða en þar snéru áhyggjur helst að salernismálum og samgöngum líkt og í fyrri könnunum sem gerðar hafa verið. Að mati íbúa hefur ástand vegakerfisins batnað og ánægja með bílastæði meiri á Vesturlandi í samanburði en annars staðar. Þrátt fyrir það komust vandamál í vegakerfinu og ófullnægjandi innviðir á lista yfir neikvæðustu áhrif ferðaþjónustunnar á Vesturlandi ásamt mengun, ágangi á náttúru og virðingarleysi ferðamanna.