Drífa Harðardóttir frá Akranesi náði þeim frábæra árangri að verða þrefaldur Evrópumeistari í badminton á Evrópumótinu í flokki 35 ára og eldri sem fram fór í Belgíu 25. til 31. ágúst síðastliðinn. Drífa keppti í öllum þremur greinunum; einliða- tvíliða- og tvenndarleik, og sigraði í þeim öllum.

Á vef Badmintonsambands Íslands kemur fram að í fyrstu leikjum mótsins lenti Drífa á móti talsvert lakari mótherjum. „Það var ágætis æfing að halda haus allan leikinn og einbeita sér,“ segir Drífa. Fínir leikir komu í 8- liða úrslitum og út mótið. Á föstudeginum voru spilaðar tvær umferðir í 8-liða og undanúrslit. Það gerði það að verkum að Drífa var í höllinni frá níu um morguninn til ellefu um kvöldið og spilaði sex leiki sem var býsna strembið en úrslitaleikirnir þrír voru svo á laugardeginum, á lokadegi mótsins.

„Þetta er búið að vera mjög gott mót, vel staðið að öllu. Þetta er víst stærsta Evrópumót sem hefur verið haldið með tæplega 1600 spilurum. Þar sem ég er ein frá Íslandi þá hafa Danirnir tekið mér mjög vel og ég verið hluti af þeim hópi sem er ágætlega stór. Ég þekki einnig marga úr mínu félagi í Hvidovre,“ segir Drífa á vef BSÍ.

Í einliðaleik spilaði Drífa á móti Stefanie Zubek frá Þýskalandi og vann hana í oddaleik, 21-15, 16-21 og 21-7. Í tvíliðaleik spilaði hún með Gry Hermansen frá Danmörku og sigruðu þær Helene Dijoux og Audrey Petit frá Frakklandi í tveimur lotum í hörkuleik, 21-17 og 21-15. Í tvenndarleik var meðspilari Drífu Skotinn Mark Mackay og þau unnu Alex Marritt og Rebeccu Pantaney frá Englandi nokkuð örugglega í tveimur lotum, 21-8 og 21-17. Drífa, sem er fædd árið 1977, keppti í einliðaleik í flokki 40 ára og eldri og í hinum tveimur greinunum í flokki 45 ára og eldri.

Aðstæðurnar í keppnishöllinni, Sportcomplex Velodroom, voru mjög áhugaverðar. Sjálf höllin er hjólahöll og fyrir utan höllina er kappakstursvöllur. Fyrsta keppnisdaginn var 24 tíma kappakstur í gangi og því mikill hávaði sem barst inn. Það eru 16 badmintonvellir í höllinni og sjálf höllin er mjög stór þar sem hjólabrautin er í kringum badmintonvellina. Hjólabrautin er ljós á litinn, áhorfendastúkan hvít að lit og ljós yfir miðjum velli. Það var því margt sem þurfti að venjast en það gekk alveg ágætlega, að sögn Drífu, þrjú gull í vasann staðfesta það!

Drífa hvetur leikmenn sem eru orðnir 35+ að þeir prófi að fara á svona mót, hvort sem það er EM eða HM. „Því það er mikill og góður félagsskapur og góð skemmtun,“ segir hún.

Drífa þrefaldur Evrópumeistari í badminton