medium

large

thumbnail

1536x1536

small

custom-size

Fjölmenni skemmti sér á árlegu Sverrismóti – Myndasyrpa

2048x2048

Að hlaupa til ömmu og til baka var upphafið

Leggja til stórfelldar breytingar á Jaðarsbakkasvæðinu

Helstu seglar Vesturlands kynntir

Hnúfubak komið til bjargar í Steingrímsfirði

Frestuðu ákvörðun um deiliskipulagsbreytingu á Grjóthálsi

core/paragraph

Kærustuparið Aron Snær Einarsson og Dalrós Líf Richter frá Akranesi eru stoltir fósturforeldrar æðarfugls sem þau hafa haft hjá sér undanfarinn einn og hálfan mánuð. Blaðamaður Skessuhorns hitti á þau á Langasandi í liðinni viku og fékk að heyra söguna og fylgjast með þeim fara út í sjó með fuglinn, sem þau nefna Dúdú, til að gefa honum að borða og taka hann í smá sundsprett.

Hefði endað sem fúlegg úti í fjöru

En hvernig hófst þessi saga? Dalrós Líf segir að fyrir 44 dögum hafi þau verið að láta hundinn hennar hlaupa og hreyfa sig í fjöru rétt hjá álverinu á Grundartanga. ,,Ég sá nokkur hreiður sem voru öll tóm og ungarnir í kring voru allir nánast fullvaxnir. Svo var eitt hreiður með þremur eggjum þar sem engin mamma var sýnileg í kring. Æðarfuglavörp koma í bylgjum þannig að það var furðulegt að þetta var eina hreiðrið eftir með egg. Ég ályktaði að eitthvað hefði verið að eggjunum svo ég ákvað að taka eitt af þremur eggjunum með heim til mín og skilja hin tvö eftir ef mamman væri enn á svæðinu. Ég náði síðan að láta þetta egg ungast út en unginn kom þremur dögum of seint svo það þurfti að hjálpa honum mjög mikið með flísatöng. Ég þurfti að opna eggið fyrir hann af því að eggjahimnan var þreföld. Eggjahimnan á að vera eins og að stinga tannstöngli í gegnum klósettpappír en hans himna var eins og að brjóta saman covid grímu í tvennt, pússa niður tannstöngul og reyna svo að stinga í gegn, það bara gekk ekki. Systir mín fór svo og kíkti á hin tvö eggin í hreiðrinu. Annað eggið hafði klakist út en hitt var kalt og yfirgefið. Hún tók það heim og spurði mig hvort það væri lifandi. Þegar ég sagði henni að það væri það ekki þá krufði hún eggið varlega með flísatöng. Unginn var full stálpaður en hafði ekki náð að komast í gegnum himnuna og dó þess vegna í egginu. Eggið okkar hefði líka endað sem fúlegg úti í fjöru ef við hefðum ekki ákveðið að taka það heim.“

core/image

<figure class="wp-block-image size-large is-style-default"><img src="https://umsjon.skessuhorn.is/wp-content/uploads/2024/09/Toku-ad-ser-aedarfugl-i-fostur2-1200x900.jpg" alt="" class="wp-image-82221" /><figcaption>Dalrós Líf að reyna að koma Dúdú í sjóinn á Langasandi. Ljósm. vaks</figcaption></figure>

Á erfitt með að vera einn heima

Aron Snær kemur inn í samtalið og nefnir að Dalrós Líf hefði sofið ansi lítið á þeim tíma sem unginn var að koma úr egginu og Dalrós Líf tekur undir það: ,,Ég var ekki með útungunarvél svo ég gekk með eggið inn á mér fyrir hitann og ég hef eiginlega ekki sofið almennilega síðan þetta gerðist, eða í yfir mánuð. Þetta er eins og að vera með lítið barn, hann þarf að synda, það þarf stundum að skera niður matinn fyrir hann, hafa hann í bleyju, hleypa honum út, leika við hann, baða hann og gefa honum nóg af athygli.“

En hvernig er venjulegur dagur hjá honum þessa dagana? ,,Það er erfitt fyrir hann að vera einn heima, hann vill ekki vera í hundabúri og fær enga ró þar. Það var pöntuð bleyja fyrir hann svo hann gæti verið heima frjáls á gólfinu með hundinum og kettinum sem eru hin heimilisdýrin og honum finnst það vera mun betra. Það var einnig reynt að hafa hann inni í hænsnakofanum fyrstu dagana en það gekk ekki alveg upp því hænurnar gogguðu bara í hann. Hann á erfitt með að vera einn, hann er vanur að vera mikið með öðrum og hann saknar mín ef ég er í burtu. En ég reyni að kíkja á hann í pásum í skólanum þegar ég get,“ segir Dalrós Líf.

Dekraður í drasl

Hvað sjáið þið fram á að hann verði lengi hjá ykkur? ,,Hann er kominn með aðskilnaðarkvíða, segir Dalrós Líf, og það hefði verið best að sleppa honum þegar hann var yngri, sem við reyndum nokkrum sinnum en hann vildi ekki fara frá okkur. Meðalævi æðarfugla er 15-20 ár en það hefur frést af fimmtugri æðarkollu. Ég sé bara ekki fram á það að hann vilji fara.“

En þegar þið farið með hann í sjóinn eins og núna, eruð þið þá að reyna að sleppa honum? ,,Ég fór með hann um daginn á Langasand við klettana úti við sjóinn þar sem var fullt af æðarfugli. Ég fór með hann að þeim til að sjá hvað hann myndi gera en hann hafði engan áhuga á þeim og var bara hjá mér að leika sér að kafa.“ Aron Snær bætir við að það sé búið að dekra hann í drasl, hann veiði ekki oft matinn sinn sjálfur og oftast er allt gert fyrir hann. ,,En það er verið að reyna að kenna honum allavega. Við förum stundum með hann út á bryggju og hleypum honum þar út í sjó á meðan við veiðum fyrir hann. Svo förum við með hann út í fjöru svo hann geti farið í polla og veitt síli og ýmislegt annað.“

<figure class="wp-block-image size-large is-style-default"><img src="https://umsjon.skessuhorn.is/wp-content/uploads/2024/09/Toku-ad-ser-aedarfugl-i-fostur4-1200x2133.jpg" alt="" class="wp-image-82222" /><figcaption>Hreiðrið með eggjunum þremur. Ljósm. aðsend</figcaption></figure>

Stelst í hundamatinn

Hvað eruð þið að veiða fyrir hann? ,,Við erum að veiða krabba, snigla, rækjur, marflær, þorska, seiði, síli, kræklinga, hrúðurkarla og eiginlega bara allt í sjónum, nema marhnút, kola, krossfisk og marglyttur. Svo fær hann líka flugur, köngulær, orma, snigla, grápöddur, margfætlur, lirfur og mjölorma en hann veiðir það mest sjálfur. Svo finnst honum afskaplega gott að stelast í hundamatinn,“ segir Dalrós Líf. ,,Hann er núna um 30 cm á lengd og verður 50-71 cm fullvaxinn. Hann er ekkert auðveldur, hann þarf að borða tvisvar sinnum líkamsþyngd sína á dag á meðan hann er að vaxa og hann er í kringum tvö kíló. Svo þarf hann stundum mjög mikla athygli, annars er hann með stanslaus læti.“

En hvernig kemur honum saman við hundinn og köttinn á heimilinu? ,,Ef hundurinn kemur of nálægt, goggar unginn í hann. Þegar Aron Snær hleypir sínum hundi og unganum út í garð hleypur hundurinn í burtu af því að unginn hleypur á eftir honum. Kötturinn fylgist mikið með unganum og reynir reglulega að hlaupa að honum en fer aldrei of nálægt af því að hann er hræddur við ungann.“

Fer stundum í fýlu

Dalrós Líf heldur dagbók þar sem hún skráir daglegar breytingar á unganum. Ekki er enn vitað hvort um karl- eða kvenfugl er að ræða en Dalrós Líf segir að það verði ekki hægt að kyngreina hann fyrr en í fyrsta lagi í vetur. ,,Hann fer stundum í fýlu út í mig ef ég set hann niður og reyni að láta hann gera eitthvað sjálfur eins og til dæmis að borða mat. Svo er kannski fólk að labba fram hjá og þá hleypur hann að þeim og vill láta halda á sér. Það er mjög gaman að þessu en þetta er mjög bindandi að hafa fugl heima hjá sér. Hann er þessa dagana að byrja að læra að fljúga. Og kannski verður hann einn daginn búinn að fljúga frá okkur en mér finnst það mjög ólíklegt. Við þurfum líklega að fara með hann upp í sveit til að kenna honum að fljúga svo hann klessi ekki á bíl eða eitthvað. Annars verður bara að koma í ljós hvernig þetta fer en við munum gera okkar besta í uppeldinu þangað til,“ segja þau Dalrós Líf og Aron Snær að lokum.

<figure class="wp-block-image size-large is-style-default"><img src="https://umsjon.skessuhorn.is/wp-content/uploads/2024/09/Toku-ad-ser-aedarfugl-i-fostur3-1200x1500.jpg" alt="" class="wp-image-82223" /><figcaption>Dalrós Líf og Dúdú að viðra sig. Ljósm. aðsend</figcaption></figure>

Fréttaveita Vesturlands

Tóku að sér æðarfugl í fóstur