Bókin Búverk og breyttir tímar eru nýjasta afurðin úr ritsmiðju Bjarna á Hvanneyri

Fyrr í þessum mánuði kom út hjá bókaforlaginu Sæmundi ný bók eftir Bjarna Guðmundsson á Hvanneyri. Nefnist hún Búverk og breyttir tímar. Þar fjallar höfundur um nokkur verk og verkfæri sem alþekkt voru á síðustu öld en hafa nú ýmist horfið úr verkahring eða breyst í helstu atriðum. „Þannig er minnt á þungan straum tímans en líka þróun þekkingar og tækni. Verkmenning þessa tíma íslensks þjóðlífs breyttist, ýmist í hægum stíganda eða stórum stökkum. Saga varð til og í þessari bók eru brot af henni sögð,“ skrifar Bjarni á bókarkápu.

Við lestur bókarinnar er áhugavert að sjá hvernig Bjarni nálgast frásögn af ýmsum verkfærum með virðingu fyrir mikilvægi þeirra á sínum tíma. Mörg þessara tækja og tóla skiptu einfaldlega sköpum í búskap bænda og búaliðs þeirra. Hver gat til dæmis verið án vasahnífs, eða sjálfskeiðungsins, og gera menn sér grein fyrir fjölbreyttu hlutverki hans? Meðal annarra verkfæra sem Bjarni fjallar um í bókinni má nefna heykvísl, aktygi og mjaltavélar; skilvindu, sauðaklippur, vatnshrút, heyvagna og traktora á tveimur hjólum. Þá er sagt frá búnaði til sauðfjárböðunar, girðingarefni, steypta byggingarsteina og vindmyllur. Alls eru kaflar í bókinni 15 og er bókin ríkulega myndskreytt ýmist með ljósmyndum eða skýringarteikningum eftir Bjarna.

Bækur Bjarna Guðmundssonar um búnaðarsögulegt efni hafa notið mikilla vinsælda enda fjallar hann um sitthvað sem hann þekkir vel, allt frá bernsku vestur á Kirkjubóli í Dýrafirði, frá búnaðarnámi hér heima og erlendis og ekki síst frá búnaðarskólakennslu og fræðastörfum á Hvanneyri. Bjarni beitti sér fyrir stofnun Landbúnaðarsafns Íslands á Hvanneyri og fylgdi því verkefni úr hlaði. Segja má að þessi nýjasta bók hans tengist verkefnum safnsins, en allt er þetta samofið svo úr verður ein heild. Búverk og breyttir tímar á erindi til allra sem unna hag íslenskra sveita, samfélagsins þar fyrr og nú og ekki síst atvinnuháttum sem vissulega breytast líkt og við mennirnir.

Fjallað um allt frá sjálfskeiðungi til vatnshrúts í nýrri bók

Bókin Búverk og breyttir tímar eru nýjasta afurðin úr ritsmiðju Bjarna á Hvanneyri

Bókin Búverk og breyttir tímar eru nýjasta afurðin úr ritsmiðju Bjarna á Hvanneyri