Lokaumferðin í B riðli 5. deildar karla fór fram um helgina og í Ólafsvík mættust tvö neðstu liðin í riðlinum, Reynir Hellissandi og Afríka. Fyrir leik höfðu heimamenn unnið einn leik í deildinni sem var á móti Afríku og gert þrjú jafntefli á meðan lið Afríku hafði tapað öllum leikjum sínum í sumar. Benedikt Osterhammer Gunnarsson kom Reyni yfir á 22. mínútu og Úlfur Ingi Þrastarson bætti síðan við öðru marki á 35. mínútu og staðan 2-0. Tveimur mínútum fyrir hálfleik minnkaði Roderik Jesus Zamora muninn fyrir gestina í 2-1 og þannig var staðan þegar liðin fengu sér hressingu í hálfleik.