Púlsinn tekinn hjá skólameistara Menntaskóla Borgarfjarðar

Skessuhorn hafði samband við Braga Þór Svavarsson skólameistara Menntaskóla Borgarfjarðar. Hann segir að 16. ágúst hafi 203 nemendur verið skráðir í nám við skólann og 57 nýnemar væru væntanlegir. Um er að ræða metfjölda í skráningum og mikil gleði yfir þessari frábæru aðsókn. Um 30% nemenda eru skráðir í fjarnám við MB. „Enn fjölgar staðnemum í námi í MB og er það sérstaklega gleðilegt. Við skólann hófu tveir nýir starfsmenn störf, þær Elín Matthildur Kristinsdóttir sem verður kennslustjóri á Starfsbraut og Sigrún Baldursdóttir kennari sem kennir STEAM og dönsku,“ segir Bragi.

Áfram verður unnið í skólaþróun í MB, verkefnið er vel á veg komið en innleiðing þó enn í gangi á sumum þáttum. Verið er að kenna STEAM áfangana í annað skipti sem og Lífsnám. „Allir nemendur skólans taka þrjá STEAM áfanga en STEAM stendur fyrir vísindi, tækni, verkfræði, listsköpun og stærðfræði. Greinarnar eru samþættar og er eðli STEAM náms og kennslu að byggja á skapandi og gagnrýnni hugsun í gegnum verkefni sem eru þverfagleg. Þessir áfangar hafa mælst mjög vel fyrir og magnað að sjá og geta hvatt nemendur til skapandi verkefna,“ segir Bragi Þór.

Kvikan, skapandi rými, er sannkölluð miðja skólans og má segja að Kvikan sé ný tegund af bókasafni í skóla, staður þar sem nemendur geta lært og látið sig dreyma með aðstoð nýjustu tækni. Kvikan er einnig opin almenningi einu sinni í viku og er það gert með góðum stuðningi Borgarbyggðar. Valdís Sigurvinsdóttir er umsjónarmaður Kviku.

Nokkur fjölgun nemenda er við starfsbraut MB. „Það liggur fyrir að farið verður í endurskoðun þeirrar námsbrautar og sú vinna verður leidd af nýráðnum kennslustjóra Starfsbrautar; Elínu Matthildi. MB er skóli í sífelldri þróun og ég veit að starfsfólk og nemendur skólans munu saman halda áfram að prófa nýja hluti eins og hefð er fyrir allt frá stofnun skólans,“ segir Bragi.

Nemendagarðar í undirbúningi

Fram undan er bygging nemendagarða á vegum félagsins Nemendagarða MB. „Við erum gríðarlega spennt fyrir því verkefni en félagið er í eigu Menntaskóla Borgarfjarðar og Borgarbyggðar og stendur undirbúningur nú yfir í samvinnu við Brákarhlíð og verður það stórt stökk upp á við fyrir skólann að geta boðið upp á þessa Nemendagarða fyrir nemendur,“ segir Bragi að lokum.

Kvikan er ný tegund bókasafns í skóla

Púlsinn tekinn hjá skólameistara Menntaskóla Borgarfjarðar

Púlsinn tekinn hjá skólameistara Menntaskóla Borgarfjarðar