Verkefni í Grundarfirði og á Grundartanga hljóta styrki

Guðlaugur Þór Þórðarson, umhverfis-, orku- og loftslagsráðherra hefur staðfest tillögu Orkusjóðs um að veita 1.342 milljónum króna í almenna styrki til orkuskipta á þessu ári. Þar af renna þrír styrkir á Vesturland, alls að upphæð um 100 milljónir króna. Hefur heildarupphæð styrkveitinga úr sjóðnum aldrei verið hærri. Styrkveitingarnar nú hafa þau áhrif að áætlaður samdráttur í notkun jarðefnaeldsneytis vegna þeirra verkefna sem styrk hljóta hefur aldrei verið meiri, eða sem nemur 11 milljón olíulítrum á ári.

Samtals fengu 53 verkefni styrk úr Orkusjóði að þessu sinni. Verkefnin eru af ýmsum stærðum og koma til framkvæmda víða um land og hafa það að markmiði að draga hratt úr losun. Alls bárust 154 umsóknir að upphæð rúmlega 6,7 milljarða króna og því ljóst að mikil eftirspurn er eftir styrkjum sem þessum. Áætlaður heildarkostnaður allra þeirra verkefna sem sótt var um styrki fyrir nam rúmum 30 milljörðum kr. Þau 53 verkefni sem styrkt eru (utan innviðaverkefna) eru metin á 8,4 ma. kr., en hver styrkupphæð getur hæst numið einum þriðja af heildarkostnaði verkefna.

Auglýst var eftir styrkveitingum í þremur flokkum. Fyrir innviði fyrir rafknúin farartæki, raf- og lífeldsneytisframleiðslu og lausnir sem draga úr notkun jarðefnaeldsneytis. Innviðalausnir sem hlutu styrk eiga að gera það að verkum að rafbílar í ýmsum stærðum munu geta ferðast víðar um land en áður. Eins eiga verkefni sem draga úr notkun jarðefnaeldsneytis að hafa það í för með sér að framboð á lausnum fyrir starfsemi sem nú þarf mikla olíu muni aukast, t.d. varðandi fiskmjölsverksmiðjur og rafkyntar varmaveitur.

Orkusjóður úthlutar nú verulegum upphæðum sem styðja við orkuskipti landsins. Styrkveitingarnar eru hluti af markmiðum stjórnvalda í loftslagsmálum og orkuskiptum. „Verkefnin eru afar fjölbreytt og snúa að öllum sviðum orkuskipta á sjó og landi. Stutt er við innlenda eldsneytisframleiðslu, stórtæka innviðauppbyggingu, bætta orkunýtni og raforkuframleiðslu og kaup á fjölbreyttum tækjum sem nýta munu innlenda og endurnýjanlega orku í stað jarðefnaeldsneytis. Verkefnin munu stuðla að minnkun á losun gróðurhúsalofttegunda, bættu orkuöryggi landsins auk þess að vera innspýting í íslenskt atvinnulíf,“ segir í tilkynningu frá ráðuneytinu.

Alls hlutu 43 verkefni styrk að upphæð 649 m.kr. í flokknum innviðir fyrir rafknúin farartæki, skip og flugvélar. 29 verkefni í flokknum lausnir sem minnka eiga notkun jarðefnaeldsneytis hlutu samtals styrki að upphæð 468 m.kr. og þá hlutu sjö verkefni styrki að upphæð 225. m.kr vegna raf- og lífeldsneytisframleiðslu.

Styrkir á Vesturland

Þrír styrkir renna á Vesturland, en þeir eru:

Þróunarfélag Grundartanga fékk 47 milljóna króna styrk til lausnar sem á að minnka notkun jarðefnaeldsneytis. Beisla á varmaveitu á Grundartanga með nýtingu glatvarma.

Grundarfjarðarbær hlaut 40 milljóna króna styrk til lausnar sem á að minnka notkun jarðefnaeldsneytis. Styrkurinn er til orkuskipta í sundlaug, grunnskóla og íþróttahúsi Grundarfjarðar.

Hægt og hljótt ehf fékk styrk til að byggja upp hraðhleðslustöð í ferðaþjónustu í Grundarfirði. Styrkupphæð var 12,4 milljónir króna.

*Haraldur Benediktsson, formaður Orkusjóðs, kynnir úthlutanir sjóðsins.*

Úthlutað úr Orkusjóði

Verkefni í Grundarfirði og á Grundartanga hljóta styrki

Verkefni í Grundarfirði og á Grundartanga hljóta styrki