HK og ÍA áttust við í 15. umferð Lengjudeildar kvenna í knattspyrnu í gærkvöldi og var leikurinn í Kórnum í Kópavogi. Fyrir leik voru Skagakonur með 22 stig í 3.-5. sæti og með sigri gátu þær blandað sér af alvöru í toppbaráttuna á meðan heimakonur voru í 7. sæti með 18 stig.

HK byrjaði af krafti í leiknum og eftir aðeins sjö mínútna leik skoraði Olga Ingibjörg Einarsdóttir fyrsta mark leiksins. Yfirburðir HK voru miklir í fyrri hálfleik, þær rúlluðu hreinlega yfir gestina með góðum leik og bættu við tveimur mörkum fyrir hálfleik. Skagakonur voru ekki nógu skipulagðar varnarlega í fyrri hálfleik sem varð þeim að falli og heimakonur gengu á lagið. Eftir hálftíma leik bætti Brookelynn Paige Entz öðru marki við fyrir HK og þriðja markið kom á 40. mínútu þegar Hrafnhildur Salka Pálmadóttir setti pressu á varnarmann ÍA sem missti boltann frá sér og Hrafnhildur skoraði í kjölfarið. Staðan 3-0 í hálfleik og ljóst að Skagakonur voru ekki í góðum málum.

Skarphéðinn Magnússon, þjálfari ÍA, breytti um leikkerfi í hálfleik og fór í 3-5-2 sem skilaði strax árangri. Eftir rúmar tíu mínútur náði ÍA að minnka muninn í 3-1 þegar Juliana Marie Paoletti skoraði með skalla eftir hornspyrnu og síðan vildu Skagakonur fá vítaspyrnu þegar leikmaður HK virtist grípa boltann í vítateignum en ekkert var dæmt. Gestirnir voru áfram með yfirhöndina í seinni hálfleik en náðu ekki að minnka muninn enn frekar og svekkjandi tap í hús hjá ÍA, lokatölur 3-1 HK í hag.

Eftir leiki gærkvöldsins er FHL á toppnum með 37 stig og í 2.-3. sæti sæti eru Fram og Grótta með 25 stig. ÍBV og ÍA eru í 4.-5. sæti með 22 stig og HK og Afturelding eru með 21 stig í 6.-7. sæti. Grindavík er í 8. sæti með 17 stig, Selfoss í því níunda með 14 stig og ÍR er á botninum með aðeins fimm stig og er fallið í 2. deild. 15. umferðinni lýkur á laugardag með leik Gróttu og FHL á Vivaldivellinum á Seltjarnarnesi.

Næsti leikur ÍA er á móti Aftureldingu næsta fimmtudag í Akraneshöllinni og hefst klukkan 18.

Tap hjá Skagakonum gegn HK