Rætt við Þóru Margréti Birgisdóttur skólastjóra Grunnskóla Stykkishólms

Þóra Margrét Birgisdóttir er að hefja sitt fyrsta ár sem skólastjóri Grunnskóla Stykkishólms. „Ég ætlaði að koma og prófa að vera út á landi í eitt ár en það eru liðin 15 ár síðan. Þannig að þú getur nú reiknað,“ segir Þóra og hlær, þegar hún sest niður með blaðamanni.

Reynslumikil kona

Þóra býður blaðamanni upp á Dolce Gústó kaffi og við tyllum okkur inn á kaffistofu grunnskólans. „Ég er alin upp í Mosfellsdal og var þar í skóla í Varmárskóla og Gaggó Mos. Ég útskrifast sem kennari 2001 og fer þá að vinna hjá ÍTR sem verkefnastjóri í félagsmiðstöðinni Þróttheimum og síðar meir í Bústöðum. Mér finnst rosalega gaman að vinna með fólki en ég vann einnig sem verslunarstjóri hjá fataverslun og kenndi í Vesturbæjarskóla en svo prófaði ég að sækja um hérna í Stykkishólmi sem kennari og tók við tveimur frábærum bekkjum í umsjón á mínu fyrsta á í GSS. Þú segir bara ekki nei við Gunnar Svanlaugsson. Ég var svo aðallega að kenna á unglingastigi og tók svo við stöðu aðstoðarskólastjóra fyrir þremur árum og er núna komin í stól skólastjóra,“ segir Þóra.

Metnaðarfull fyrir skólaþróun

Þóra Margrét og kærasti hennar, Arnþór Pálsson, búa í Stykkishólmi og eiga þau einn góðan dreng, Ísleif Narfa ásamt kisunni Snæbjörtu. „Mér finnst geggjað að kenna en það býr í mér mikill námsmats púki, ég elska að vinna með fjölbreytt námsmat. Skemmtilegast er að útbúa verkefni sem kveikja og vekja áhuga og um leið koma til móts við ólíkar þarfir nemenda og leyfa svo nemendum að blómstra með því að skila niðurstöðum með sínum hætti. Það gleður mig mikið. Stjórnun er líka mjög skemmtileg en þar fæ ég tækifæri til að hafa áhrif og vinna að alls konar umbótum; fyrir nemendur, kennara og annað starfsfólk. Ástæðan fyrir því að ég sótti í þetta er að ég er með metnað og áhuga á skólaþróun og svo finnst mér ótrúlega vænt um GSS. Ég lifi og nærist í því að reyna að afla mér upplýsinga um nýjungar tengt skólaþróun og reyni að finna leiðir til að komast til móts við alla nemendur hér í skólanum,“ segir Þóra.

Starfsfólkið og nemendur

Hvernig er hlutfall nemenda og starfsfólks í skólanum? „Við erum með á milli 40 og 50 starfsmenn en við teljum okkur heppin því við erum með margt starfsfólk sem er með réttindi, er að klára réttindanám eða er að byrja í réttindanámi. Miðað við að vera lítill skóli úti á landi þá erum við með mjög hátt menntunarstig starfsfólks hérna í skólanum,“ segir Þóra. 180 nemendur eru skráðir í grunnskólann á þessu skólaári en á þessu ári er skólinn í fyrsta sinn að taka á móti flóttafólki. „Fjölskylda er að koma frá Palestínu en þau voru að flytja í bæinn og við munum gera allt sem í okkar valdi stendur til að taka vel á móti þeim enda starfar við skólann frábært fólk,“ nefnir Þóra.

Innleiðingar en ekkert róttækt

Blaðamaður spyr hvort Þóra komi með róttækar breytingar inn í skólastarfið. „Nei, nei, nei, það verða engar róttækar breytingar hér. Við erum í ýmsum innleiðingarferlum eins og til dæmis tækjainnleiðingu, leiðsagnarnám og svo erum við að taka upp nýtt kennsluumsjónarkerfi, INNA, en það er alveg takmarkað sem hægt er að leggja á kennara sem hafa nú þegar nóg að gera. Við viljum koma þessum innleiðingum í gegn áður en við setjum fleiri verkefni í hendurnar á starfsfólkinu. Við erum það heppin að vera með svipaðan kjarna af starfsfólki og því er þægilegra að reyna að innleiða þessar breytingar frá ári til árs,“ segir Þóra.

Fjölbreytt kennsla

Þóra segir að þó svo að það sé þröngt á þeim í grunnskólanum séu kennarar, starfsfólkið og stjórnendur lausnamiðuð og bjóða upp á fjölbreytta kennslu. „Við erum til dæmis með útikennslu hér fyrir 1.- 4. bekk allt skólaárið og geggjaða útikennslustofu í Nýræktinni. Sama hvernig viðrar þá fer sá hópur út í náttúruna frá klukkan átta til hádegis að tína ber, býr til kofa eða hengirúm eða bara snjókarla. Koma börnunum í tengingu við náttúruna hér í Hólminum og kynnast umhverfi sínu. Á unglingastigi erum við með StykkisMix lotur tvisvar til þrisvar sinnum yfir árið en þá er kennt þvert á bekki og námsgreinar og nemendur vinna saman að stærri verkefnum og þurfa að kynna niðurstöðu og afrakstur vinnunnar í lok hverrar StykkisMix lotu. Nemendur á miðstigi og unglingastigi fá mjög fjölbreytt val og í lok hvers skólaárs þá hafa nemendur á unglingastigi til dæmis klárað tólf val-námskeið en þeir hafa mikið um það að segja í undirbúningi hvers skólaárs hvaða námskeið verða í boði á því næsta,“ segir Þóra.

Húsnæði fyrir löngu sprungið

Eins og fyrr segir er þröngt á þeim í Grunnskólanum í Stykkishólmi og Þóra sýnir blaðamanni hvar verið er að búa til nýtt rými sem gæti nýst til að vinna með smærri hópa. „Við erum hér að fara að rífa út af strákaklósettinu og búa til kennslurými. Okkur vantar alls kyns rými til að koma til móts við fjölbreyttan hóp nemenda,“ segir Þóra áður en hún sýnir blaðamanni skrifstofu stjórnenda. „Hér erum við þrjár; Silja Sigurjónsdóttir aðstoðarskólastjóri og Íris Fönn Pálsdóttir deildarstjóri stoðþjónustu en við ákváðum að færa okkur saman og losa um rými sem geta nýst sem fundaaðstaða, sérkennslurými, fyrir heimsóknir sérfræðinga og þess háttar,“ nefnir Þóra.

„Fyrir tveimur árum sameinuðum við myndmenntastofuna og smíðastofuna til að búa til rými fyrir Regnbogaland sem er lengd viðvera fyrir 1. -3. bekk. Við nýttum tækifærið og endurskipulögðum smíðakennsluna í leiðinni og erum því með nýja smíðastofu í kjallaranum en við köllum hana núna Snillistofuna. Þar er að finna þrívíddarprentara, laserskera, rennibekki og alls kyns annan búnað sem gerir þetta að algerri snillistofu,“ segir Þóra þegar við göngum inn í Snillistofuna.

„Bræðurnir Guðjón og Egill Hjaltalín vinna svo náið saman í sameinuðu list- og verkgreinarými og það hefur gengið mjög vel. Við höfum þurft að gera nokkrar breytingar á húsnæðinu en það gengur sinn vanagang. Með alls konar hagræðingu þá hafa einhver rými minnkað eins og til dæmis list- og verkgreinarýmin en þá brugðum við á það ráð að bjóða upp á fjölbreytt val á miðstigi og unglingastigi. Nemendur hafa val um að fara í þessar hefðbundnu list- og verkgreinar en svo höfum við bætt við STEAM og forritun til dæmis og þá náum við að dreifa fjöldanum betur. Smíðastofan tekur eingöngu við 8-10 nemendum, heimilisfræðistofan tekur á móti tólf nemendum en með því að hugsa í lausnum og vinna með það sem við höfum, þá gengur þetta allt einhvern veginn upp hjá okkur,“ nefnir Þóra.

Tilhlökkun fyrir skólaárið

Er allt tilbúið fyrir skólaárið? „Við höldum að við séum tilbúin. Það verður gaman að fylgjast með nýjum árgangi koma inn í skólann frá leikskólanum og svo eigum við von á a.m.k. tólf nýjum nemendum í skólann og munum við taka vel á móti þeim og aðstoða þau við að fóta sig í nýjum skóla. Við erum bara spennt fyrir komandi skólaári og áframhaldandi góðu samstarfi við foreldra hér í Stykkishólmi,“ segir Þóra að lokum.

Við erum svakalega lausnamiðuð hérna í skólanum

Rætt við Þóru Margréti Birgisdóttur skólastjóra Grunnskóla Stykkishólms

Rætt við Þóru Margréti Birgisdóttur skólastjóra Grunnskóla Stykkishólms