Rætt við Patrek Hall Einarsson Norðurlandameistara í bogfimi

Patrek Hall Einarsson tók þátt í Norðurlandamóti ungmenna í bogfimi en mótið var haldið í Óðinsvéum í Danmörku helgina 3-8. júlí í sumar. Patrek æfir hjá Bogfimifélaginu Boganum í Kópavogi en hann kynntist íþróttinni fyrir nokkrum árum. „Ég byrjaði snemma árs 2021 en ég sá myndband um enska langbogann og hugsaði að mig langaði að gera þetta,“ segir Patrek þegar blaðamaður heimsótti hann nýverið á Hvanneyri. Patrek kom heim frá Danmörku með gullpening í farteskinu, sem Norðurlandameistari í langboga U-18 ára. „Ég hef alltaf verið heillaður af víkingum en víkingarnir voru, að talið er, með svona hestboga. Hestbogar eru minni útgáfa af langboga,“ útskýrir Patrek en hann er vel skreyttur, með ýmislegt víkingaskart á fingrum og um háls sem hann keypti á víkingahátíð sem haldin var í Hafnarfirði í fyrra.

Langbogi er prik

Keppt er með mismunandi tegundir boga í keppnum sem þessari en þar er m.a. hægt að sjá keppni í trissubogfimi, sveigbogfimi og berbogafimi; en hver er þá munurinn á þessum boga og langboga? „Langbogi er einfalt prik, með smá áli en hinir bogarnir eru flestallir smíðaðir úr áli, plasti eða einhverju öðru. Langboginn er því tæknilega erfiðari að keppa með því það er ekkert mið eða hjálpartæki sem eru á langboganum,“ nefnir Patrekur en bætir síðan við: „Langbogarnir kosta um 30.000 krónur og ein ör kostar um þúsund krónur í hann. Ef maður vill færa sig yfir í hina bogana, eins og til dæmis trissuboga, þá kostar hann eina milljón króna og ein ör kostar um þrettán þúsund. Þetta er því líka gert af því að ég nískur maður,“ segir Patrek og hlær.

Æfingar og markmið

Tal okkar berst nú að æfingum. „Pabbi útbjó fyrir mig æfingamark. Hann tók frauðplast, skar það í ákveðna stærð og setti saman svo að það yrði nægilega þykkt. Við máluðum það, límdum það saman og gerðum það klárt. Ég er með það hérna í garðinum heima. Ég set það svo út á tún, mæli vegalengdina og æfi mig á því reglulega en ég passa vel upp á það að enginn sé nálægt en ef það eru einhverjir með mér, þá er viðkomandi fyrir aftan mig,“ segir Patrek áður en faðir hans, Einar Örn Einarsson kemur inn í eldhúsið og býður upp á kaffi. „Hann hefur ávallt haft mikinn áhuga á víkingum og vopnum en þegar hann var mjög ungur voru víkingar eða eitthvað slíkt, á einhverri hátíð í Borgarnesi og ég man að hann Patrek var mjög áhugasamur um útbúnað víkinga og sögu þeirra. Ég setti saman þetta æfingamark fyrir hann og hann hefur verið duglegur að æfa sig á því,“ segir Einar.

*Patrek á verðlaunapalli í Danmörku nú í sumar. Ljósm. Einar Örn Einarsson.*

Norðurlandamótið

Mjög stór hópur frá Íslandi keppti á Norðurlandamótinu í ár og komu Íslendingar heim með fimm meistaratitla og fimm Norðurlandamet. Samtals urðu gullverðlaunin sex; þrettán silfuverðlaun og fjögur bronsverðlaun. „Það kom mér mjög á óvart hvað hópurinn var stór sem fór út að keppa fyrir Íslands hönd og held ég að við höfum verið yfir 30 sem kepptu og var um helmingurinn sem kom frá Bogfimifélaginu Boganum. Það var enginn sem keppti á móti mér í ár, ég var eini sem er að keppa í langboganum í mínum aldursflokki. Það voru nokkrir í fyrra sem kepptu á móti mér en flestir eru að keppa með aðra boga en ég. Það eru fleiri mót sem haldin eru með hina bogana en ég ætla að halda áfram með minn langboga,“ segir Patrek áður en blaðamaður spyr hvort að það sé einhver áhugi hjá honum að fara yfir í annan boga og þannig jafnvel keppa á stórum Evrópumótum og jafnvel Ólympíuleikum? „Nei, mig langar til að halda áfram að keppa með mínum langboga en líka að prófa að veiða með boganum. Það er ekki leyfilegt hér á Íslandi en mig langar til að fara út til Póllands eða Danmerkur til að prófa það,“ segir Patrek.

Útivistarmaður mikill

Að lokum förum við út að skoða æfingamarkið sem faðir hans Patrek útbjó og er spjallað um hið daglega líf. „Ég er að vinna hjá Gámastöðinni í dag og verð þar eitthvað áfram. Ég býst við að fara í skóla eftir ár en ég ætla að halda áfram að vera úti og leika mér að lifa og njóta náttúrunnar. Finnst mjög gaman að vera með sjálfum mér úti í náttúrunni, kynnast henni og geta lifað af náttúrunni. Það finnst mér heillandi og ætla ég að halda því sem lengst áfram,“ segir Patrek að lokum áður en hann mundar bogann og sýnir blaðamanni fimi sína.

*Patrek mundar bogann í keppninni. Ljósm. Einar Örn Einarsson.*

Áhugi frá víkingum kveikjan að langboganum

Rætt við Patrek Hall Einarsson Norðurlandameistara í bogfimi

Rætt við Patrek Hall Einarsson Norðurlandameistara í bogfimi