Rætt við Guðlaugu Erlendsdóttur nýjan skólastjóra Grunnskóla Borgarness

Guðlaug Erlendsdóttir tók á mánudaginn á móti blaðamanni í húsakynnum Grunnskóla Borgarness. Guðlaug tók í byrjun mánaðarins formlega til starfa sem skólastjóri en hún hefur góða reynslu af stjórnun og kennslu. Hún er með M.ed í stjórnun menntastofnana frá HÍ, MA í félagsfræði frá sama skóla og BA í sálar- og afbrotafræði frá háskóla í Pretoríu í Suður Afríku. Auk þess er hún með kennsluréttindi frá Kennaraháskóla Íslands og stundar nú doktorsnám við HÍ. „Ég var aðstoðarskólastjóri í Grunnskóla Grindavíkur ásamt því að vera deildarstjóri miðstigs frá árinu 2019,“ segir Guðlaug í upphafi spjallsins. Það er með miklum söknuði sem Guðlaug kveður Grunnskóla Grindavíkur en hún lítur björtum augum á framtíðina í Borgarnesi.

Vön keyrslu

Guðlaug er búsett í Reykjavík en er í leit að húsnæði á Borgarfjarðarsvæðinu. „Ég er vön því að keyra en ég keyrði ávallt úr Reykjavík til Grindavíkur. Nú tekur við mér öðruvísi umhverfi í umferðinni og hef ég útvegað mér herbergi í vetur svona til öryggis ef ég verð ekki búin að finna húsnæði og veðrið er leiðinlegt, því ég vil ekki þurfa að keyra á milli í mjög slæmu veðri,“ nefnir Guðlaug og brosir.

Samheldinn starfsmannahópur

Guðlaug tekur við stöðu skólastjóra af Júlíu Guðjónsdóttur og segir Guðlaug að hún taki við góðu búi. „Ég var komin hingað um miðjan maí og fylgdist með Júlíu og kynntist starfinu í gegnum hana ásamt stjórnendateyminu. Ég gat því tekið þátt í að skipuleggja þetta skólaár sem er framundan. Einnig hitti ég flest starfsfólk skólans og náði aðeins að kynnast því og þeirra starfi,“ nefnir Guðlaug en bætir við: „Þetta er öflugur starfsmannahópur og samheldinn.“ Starfsmenn grunnskólans eru 65 og er nemendafjöldi á þessu skólaári alls 335. „Mér skilst að fjöldi nemenda við skólann hafi ekki áður verið svo mikill,“ segir Guðlaug.

Engar stórar breytingar

Aðspurð um hvort að það verði stórar breytingar vegna komu nýs skólastjóra svarar Guðlaug: „Ekki til að byrja með. Ég tel það ekki heillavænlegt að nýr stjórnandi komi inn og ætli sér að breyta einhverju strax. Það er mikilvægt að ég gefi mér tíma til að kynnast skólabragnum og skólastarfinu vel áður en ákvarðanir um breytingar verða teknar. Ég hlakka til dæmis mikið til að kynnast leiðsagnarnáminu sem er núna í innleiðingarferli í skólanum. Þetta er þriggja ára þróunarverkefni sem hófst á síðasta skólaári og það verður gaman að sjá hvernig því vindur fram. Eins höldum við áfram með byrjendalæsi fyrir yngsta stigið og svo hefur verið ráðinn verkefnastjóri með tölvuumsjón og mun viðkomandi til dæmis kynna fyrir okkur nýjungar í kennsluforritum. Jafnframt erum við að stækka tungumálaverið til að sinna enn frekar þeim ört vaxandi hópi erlendra nemenda sem er að koma til okkar. Þannig að það er heilmikið í gangi í skólanum,“ segir Guðlaug.

Allt klárt fyrir 22. ágúst

Nú hefur húsnæði Grunnskóla Borgarness verið á miklu framkvæmdastigi undanfarin ár en Guðlaug segir að spenningur sé fyrir nýju álmunni sem vonandi verður opnuð á þessu skólaári. „Það má segja með kennarastéttina að aðlögunarhæfnin er ótrúleg. Við náum alltaf að laga okkur að aðstæðum og gera það besta úr því sem við höfum, með jákvæðnina að leiðarljósi. Þetta skólaár hefst eins og því lauk, þ.e. við þurfum að notast við útistofur til að byrja með en við bíðum spennt eftir að fá þessa álmu,“ segir Guðlaug. En er allt klárt fyrir skólaárið? „Já, nú er ég bara að leggja lokahönd á skipulagið og við hlökkum til að fá starfsfólkið okkar í hús 15. ágúst og að taka svo á móti nemendum 22. ágúst þegar skólasetningin verður,“ segir Guðlaug að lokum.

Aðlögunarhæfni kennara er ótrúleg

Rætt við Guðlaugu Erlendsdóttur nýjan skólastjóra Grunnskóla Borgarness

Rætt við Guðlaugu Erlendsdóttur nýjan skólastjóra Grunnskóla Borgarness