Hátíðin Hvalfjarðardagar var fyrst haldin árið 2008 og hefur stækkað og þróast í gegnum árin. Skessuhorn náði tali á Andreu Ýr Arnarsdóttur oddvita Hvalfjarðarsveitar en hún er ein af skipuleggjendum hátíðarinnar í ár. „Hátíðin hefur þróast mikið, hún byrjaði sem eins dags hátíð en er nú orðin hátíð með fjölbreyttri helgardagskrá,“ segir Andrea.

Skipulagning í ár

Menningar- og markaðsnefnd Hvalfjarðarsveitar sér um skipulagningu hátíðarinnar en auk þess koma fjölmargir að skipulagningu og viðburðahaldi. „Ég hef fengið tækifæri til að taka þátt í skipulagningunni, ásamt frístunda- og menningarfulltrúa Hvalfjarðarsveitar. Þar að auki koma margir aðrir að hátíðinni, hvort sem það er með því að standa fyrir eða taka þátt í viðburðum eða öðrum verkefnum. Það er einmitt þessi fjölbreytta þátttaka sem gerir hátíðina svo sérstaka, því hún gefur okkur tækifæri til að koma saman sem samfélag, vinna saman og skapa ógleymanlegar minningar,“ nefnir Andrea og bætir við: „Þetta er stórt verkefni og langar mig til að þakka þeim sem hafa komið að skipulagningu hátíðarinnar í ár fyrir frábært samstarf og þakka þeim styrktaraðilum sem styrkt hafa hátíðina fyrir þeirra framlag,“ segir Andrea.

Hátíðin í ár

Verða viðburðir þá víða um sveitarfélagið? „Viðburðir hátíðarinnar verða haldnir víðs vegar um sveitina, flestir viðburðir verða þó í Melahverfi og þá aðallega á nýlega græna svæðinu okkar sem hefur fengið nafnið Vinavöllur. Svæðið hefur upp á margt að bjóða til útiveru, en þar má finna körfuboltavöll, ærslabelg, ýmis leiktæki fyrir alla aldurshópa, grillskála með góðu útigrilli, bekkjum og borðum, auk þess sem er gott svið og áhorfendapallur á svæðinu,“ nefnir Andrea.

En verður einhver viðburður sem gestir mega alls ekki missa af? „Ég á mjög erfitt með að velja einn viðburð, þar sem þeir eru allir svo spennandi og fjölbreyttir. Það gleður mig þó alltaf sérstaklega mikið þegar einstaklingar, hópar eða félög taka sig til og skipuleggja viðburði, og er það virkilega ánægjulegt að slíkir viðburðir eru þó nokkrir á hátíðinni í ár. Þar má nefna eigendur jarðarinnar Leirár í Leirársveit en það eru Anna Leif Auðar Elídóttir og Ásgeir Kristinsson, en einnig Ungmenna- og íþróttafélag Hvalfjarðarsveitar, Skógræktarfélag Skilmannahrepps, Hollvinafélag Hallgrímskirkju í Saurbæ, Hernámssetrið að Hlöðum, Kvenfélagið Lilju og listafólk í sveitinni sem ætla að bjóða heim. Þetta sýnir hversu kraftmikið og samhent samfélag við eigum hér í Hvalfjarðarsveit, þar sem fjöldi fólks er tilbúið að leggja sitt af mörkum til að skapa ógleymanlega upplifun fyrir íbúa og gesti,“ segir Andrea.

Hápunkturinn á hátíðinni

Þemalitir hátíðarinnar í ár eru einkennislitir sveitarfélagsins, rauður og hvítur. Sigurvegari fyrir bestu skreytinguna fær vegleg verðlaun en Andrea á erfitt með að velja hápunkt hátíðarinnar í ár. „Það er svo sannarlega mikið af skemmtilegum viðburðum í boði á hátíðinni og því erfitt að velja einn hápunkt. Eins og fyrri ár, verður skemmtunin í Melahverfi á laugardeginum líklega fjölmennasti viðburður hátíðarinnar. Dagurinn byrjar á afhjúpun á sjötta sögu- og merkisstaðaskiltinu á Laxárbakka kl 11:00, boðið verður upp á veitingar á Hótel Laxárbakka að afhjúpun lokinni. Klukkan 13:30 hefst svo skemmtun í Melahverfi, en þar verður eitthvað fyrir alla; skemmtiatriði með Bestu lögum barnanna, Bolla og Bjöllu, Dreyri hestamannafélag mun teyma undir og markaðstjaldið hjá kvenfélaginu Lilju verður á sínum stað. Ekki má gleyma SS pyslupartýinu, þar sem gestum verður boðið upp á pylsu, kókómjólk og krap,“ segir Andrea og bætir við að lokum: „Ég hlakka til að gleðjast með sveitungum mínum og öllum þeim gestum sem munu koma í heimsókn í Hvalfjarðarsveit.“

*Andrea Ýr Arnarsdóttir oddviti og ein af skipuleggjendum Hvalfjarðardaga.*

Hvalfjarðardagar haldnir víða um sveitina