Rigningatíð sumarsins hefur gert nokkurn óskunda í búskap á Vesturlandi, en þó er það misjafnt eftir svæðum. Nefna má að heyskapur er nú loks hafinn á Grund í Skorradal og hefur ekki byrjað þetta seint síðan árið 1967. Þetta kemur fram í Facebook færslu Pétur Davíðssonar bónda á Grund í morgun. Hann segir enn fremur að árið í ár slái árinu 1979 við, en þá var byrjað 25. júlí.

Að sögn Þuríðar Guðmundsdóttur á Sámsstöðum í Hvítársíðu eru bændur þar einnig við langþráðan slátt, sem dregist hefur von úr viti sökum rigningatíðar. Hún telur flesta þó langt komna með heyskap og vonandi sé farið að sjá fyrir endann á þessum hörmungar heyskap. Heyið sem náðst hefur á Sámsstöðum er rakt, hálf blautt og með vatni og verður ekki skemmtilegt í vetur á garðanum. En hún vonast til að einhverjir dagar náist þurrir í næstu viku til að klára. Þuríður fletti upp í dagbók síðan 2014 sem Ólafur Guðmundsson bóndi hennar hefur skráð og segir að þá hafi fyrri sláttur klárast 27. júlí, sem sagt aðeins fyrr en núna. Það er sem sagt 10 ár á milli svo slæmra rigningasumra í Síðunni. Hún segir að staðan sé verst hjá þeim sem eru með blaut tún og komast ekki um þau eftir allar þessar rigningar.

Blaðamaður heyrði einnig í Þóreyju Björk Þórisdóttur á Leiðólfsstöðum 2 í Laxárdal og hún segir að þar á bæ hafi allt náðst upp í byrjun júlí og það fari að líða að seinni slætti. En hún sagðist vita að það væru bændur vestar sem væru að byrja meðan aðrir væru að klára á seinni slátt. Veðrið sé ekki búið að vera skemmtilegt en þau hafi náð nokkurra daga glugga. Þeir sem ætli að heyja þurr hey hafi ekki fengið nógu góða tíð.

Laufey Bjarnadóttir bóndi á Stakkhamri í Miklaholtshreppi segir að þar hafi fyrri sláttur náðst í þurrkinum um mánaðamótin júní júlí, en háin sé eftir.

Það er vonandi að betri tíð sé í vændum og góð hey náist sem víðast næstu daga.

Ljósmynd (PD) heyskapur er loks að hefjast á Grund í Skorradal á þessu rigningarsumri.

Ekki slegið svo seint frá árinu 1967