Eins og fram hefur komið verður Unglingalandsmót UMFÍ haldið í Borgarnesi um komandi helgi og er skráningu lokið. Þátttakan er góð enda telst mótið vera ein fjölmennasta samkoma landsins og hefur átt sér stað um Verslunarmannahelgina allar götur síðan árið 1992.

Unnið er hörðum höndum að undirbúningi og máttarvöldin hafa gengið í lið með ungmennafélagsfólki með því að skapa hlýtt og þurrt veður þessa undirbúningsdaga auk þess sem veðurspáin er góð fyrir mótið.

Það er Ómar Bragi Stefánsson sem er framkvæmdastjóri móta UMFÍ og annast skipulag mótsins ásamt Silju Úlfarsdóttur frjálsíþróttakonu sem er verkefnisstjóri. Þau segja þetta risaviðburð fyrir alla fjölskylduna. Þetta er 24. Unglingalandsmót UMFÍ og Ómar hefur skipulagt þau í 20 ár. „Við fundum það í íþróttahreyfingunni að eftir COVID-faraldurinn dró mjög úr þátttöku á mótum og stórum viðburðum. Miðað við skráningarnar nú hefur það gengið til baka að stórum hluta þótt auðvitað hafi mynstrið breyst. Fólk skráir sig sem dæmi mun seinna á viðburði en áður. Við vitum líka af mörgum sem ætla að kíkja við á mótið enda góður bíltúr frá höfuðborgarsvæðinu til Borgarness og því hægðarleikur að mæta á mótið að morgni og fara heim að kvöldi eftir tónleika, sem verða á hverju kvöldi,“ segir Ómar.

Mótið um helgina hefst á fimmtudag með keppni í golfi og allskonar afþreyingu. Blásið verður til keppni í fleiri greinum strax á föstudagsmorgun. Þá verður keppt í körfubolta, grashandbolta, upplestri, pílukasti, bogfimi og mörgu fleiru. Frjálsar íþróttir eru þar á meðal. Allskonar afþreying verður í boði fyrir alla fjölskylduna. Á tjaldsvæðinu við Kárastaði hefur verið komið upp stóru skemmtitjaldi þar sem tónleikar fara fram á hverju kvöldi. Þar koma meðal annars fram bræðurnir Jón Jónsson og Friðrik Dór, GDRN, Júlí Heiðar, Björgvin Þór sem sló í gegn í Idolinu og mörg fleiri.

Unglingalandsmót UMFÍ er ætlað 11 – 18 ára keppendum og hefur alltaf höfðað vel til fjölskyldufólks. Mótið er nú haldið í samstarfi við Borgarbyggð og Ungmennasamband Borgarfjarðar auk þess sem mörg hundruð sjálfboðaliðar úr Borgarfirði taka bæði þátt í undirbúningi og framkvæmd þess.

„Það er gríðarlega góð stemning fyrir mótinu í Borgarnesi,„ segir Ómar. „Þarna hittast svo margir af öllu landinu að keppa og skemmta sér. Vinahópar koma saman og eignast aðra vini sem þau hitta svo öll á öðrum mótum í vetur. Við höfðum auðvitað áhyggjur af tjaldsvæðinu við Kárastaði enda hefur íslenska sumarið vökvað grasið ágætlega. En nú er aðeins spáð vætu fram að fimmtudegi. Fínasta veður verður um helgina og fínn hiti, í kringum 15 gráður. Þetta er frábært keppnisveður með smá andvara sem kælir keppendur,“ segir Ómar og bætir við að fyrirtækið Borgarverk vinni nú að því að laga burðarlag vega á tjaldsvæðinu. Búið er að leggja rafmagn og gera klárt fyrir mótið. „Ef eitthvað kemur upp á þá erum við með aukatjaldsvæði á kantinum sem við getum fullbúið með litlum fyrirvara ef á þarf að halda.“

gj

Unglingalandsmót UMFÍ – góð þátttaka