Samkvæmt nýjustu mælingum verðlagseftirlits ASÍ hefur verðlag á matvöru nú hækkað hratt, eða um 0,65% milli mánaða. Þetta gerir 9,2% á ársgrundvelli. Hækkanirnar eru mestar í þremur verslunareiningum Samkaupa; Kjörbúðinni, Nettó og Krambúðinni. Skiptir þetta Vestlendinga miklu máli því Nettó er rekið í Borgarnesi, Krambúðin á Akranesi og í Búðardal og Kjörbúðin í Grundarfirði.

Á heimasíðu Samkaupa kemur fram að félagið rekur um sextíu smávöruverslanir víðs vegar um landið og að viðskiptavinir Samkaupa geti valið á milli helstu verslunarkeðja þess, Nettó, Kjörbúðarinnar, Krambúðarinnar og Iceland verslananna. Tekið er fram að félagið bjóði uppá fjölbreytt vöruúrval og sanngjarnt verð.

Verðlag í matvöruverslunum hefur hækkað um 1,45% frá undirritun kjarasamninga, sem jafngildir 4,0% á ársgrundvelli. Um helmingur hækkunarinnar hefur orðið á undanförnum vikum og skorðast kippurinn að miklu leyti við verslanir Samkaupa. Þegar stærstu fjórar verslanir landsins eru skoðaðar sést að hækkunartaktur verðlags í Bónus, Krónunni og Hagkaupum hefur verið á bilinu 0-0,6% á mánuði, og sama gilti um Nettó þar til nú. Fram kemur í verðkönnuninni að almennt lækki verðlag í Heimkaupum, einni verslana og að aðrar verslanir séu á svipuðu róli og í fyrri mánuðum

Margar af þeim verslunum sem Samkaup rekur voru upphaflega reknar af kaupfélögum og Samkaup hefur í gegnum tíðina gert samninga um afsláttarkjör fyrir félagsmenn þeirra á starfssvæðum verslana félagsins. Um 30.000 félagar kaupfélaga nýta sér þessi afsláttarkjör í verslunum Samkaupa víða um land.

Markmið verðlagseftirlitsins er annars vegar að auka upplýsingastreymi til neytenda og efla þannig neytendavitund og hins vegar að veita fyrirtækjum og stofnunum aðhald. Megináherslan hefur verið lögð á að skoða matvörumarkaðinn. Nánar má sjá um verðhækkanirnar á vefsíðu ASÍ, asi.is (verðlagseftirlit ASÍ).

gj

Verðhækkanir mestar í verslunum Samkaupa