Farið á rúntinn með Eggerti Emil Ólafssyni á Borgarnes skutlunni

Sendibílaþjónustan Borgarnes skutlan hóf rekstur í desember 2019 og var púlsinn tekin á Eggert á þeim tíma í blaði Skessuhorns. Eggert nefndi þá að viðtökurnar hafi farið fram úr sínum björtustu vonum og hann vonaðist til að geta farið að stækka við sig í náinni framtíð. Skessuhorn ákvað að nú, fimm árum síðar, að góður tími til að athuga hvernig staðan væri á rekstri fyrirtækisins.

*Eggert tekur á móti símtali á kaffistofunni. Costco stílabókin alltaf við höndina.*

Viltu kom á rúntinn?

Blaðamaður kemur sér fyrir inni á kaffistofu Borgarnes skutlunar. „Viltu mjólk í kaffið?“ spyr Eggert áður en Bjarni Guðmann Jónsson kemur inn á kaffistofuna. „Bjarni var að koma með tösku sem ég er svo að fara með út á Snæfellsnes. Vilt þú ekki bara koma með á rúntinn,“ spyr Eggert, en ferðamaður á Arnarstapa beið þar eftir tösku sinni sem hefur verið týnd í viku. Bjarni Guðmann hefur verið að aðstoða Eggert í sendibílaþjónustunni í sumar en annars eru Eggert og Daníel Örn Eyþórsson einu föstu starfsmenn Borgarnes skutlunnar. „Hann Daníel er búin að vera hér og þetta væri ekki hægt ef hann væri ekki með mér í þessu. Hann er að sunnan en er samt toppnáungi,“ segir Eggert og hlær. „Hann Daníel er eiginlega það besta sem hefur komið fyrir þennan rekstur. Hann var áður að vinna hjá Júlla Jóns, hann er tengdasonur Simba héðan úr Borgarnesi og ég er þvílíkt heppinn að hafa hann með mér,“ segir Eggert þegar síminn hringir hjá honum, en það gerist reyndar jafnft og þétt allan daginn.

Heilbrigð samkeppni

Við skellum okkur upp í einn af sex sendiferðabílum Eggerts, spennum beltin og keyrum af stað, með eina ferðatösku og einn lítinn pakka með í för. Við keyrum inn hjá Steypustöðinni i Borgarnesi með pakkann og stór samkeppnisaðili er hinum megin þjóðvegar. Er mikil samkeppni eða rígur á milli? „Nei, það myndi ég ekki segja. En smá samkeppni er nauðsynleg fyrir samfélagið. Ég hef lagt upp með það frá byrjun að einbeita mér að skutla þessum smáhlutum, varahlutum í bíla og þess háttar til og frá Borgarnesi. Þetta hefur gengið framar vonum hjá mér og eru þetta að verða fimm ár sem ég er búin að vera í þessu,“ segir Eggert.

*Ferðamaðurinn ánægður að fá töskuna sína.*

Gígantískan áhuga á vöruflutningum

„Ég stefndi að því frá því ég lítill tittur að gera út bíla. Alltaf langað að keyra og áhuginn á vöruflutningum hefur ávallt verið gígantískur. Ég byrjaði hjá Einari Páli Péturssyni þegar ég var 17 ára. Það var svakalegur góður skóli hjá honum og ég bý að því í dag að hafa verið hjá honum. Þarna lærði maður að standa á eigin fótum, að peningarnir vaxa ekki á trjánum og það var rosalega gott að vinna hjá honum. Undir restina á rekstrinum hjá Einari stóð til að ég myndi kaupa bíl og fara að keyra hjá honum en það datt upp fyrir,“ nefnir Eggert þegar við nálgumst Lyngbrekku á Mýrum. „Ég varð 30 ára nú í janúar síðastliðnum og hef verið að keyra síðan ég var 17 ára. Ég er búinn að vera í þessu í góðan tíma og það var einhver sem sagði við mig um daginn að ég væri búinn að vera lengur í vöruflutningum heldur en gömlu karlarnir,“ segir Eggert og hlær dátt.

*Sendibílafloti Borgarnes skutlunnar, allt Bensar. Ljósm: EEÓ.*

Mikill Borgnesingur

Við nálgumst afleggjarann á Álftártungu þegar við hefjum tal okkar á rekstri Borgarnes skutlunnar. „Fyrst og fremst er ég að þjóna Borgarnesi og Borgarfirði, íbúum í sveitinni og síðast en ekki síst fyrirtækjunum í Borgarnesi. Við búum vel af því í Borgarnesi hversu öflug þessi minni fyrirtæki eru. Mér finnst geggjað hvað er mikið um að vera í Borgarnesi, hversu öflug fyrirtækin eru og hvað íbúar í Borgarnesi og Borgarfirði eru að nýta þjónustuna sem er í boði hér í héraðinu. Ég er allavega gríðarlega stoltur og þakklátur yfir hversu vel fyrirtækin hafa tekið Borgarnes skutlunni,“ nefnir Eggert. Hann stoppar í vegarkanti til að taka niður punkta í Costco-stílabókina sem hann hefur hjá sér í bílnum. Við erum nú komnir nálægt Barnaborgum en blaðamaður spyr hvort mikið sé um að þurfi að skutla töskum ferðamanna á Snæfellsnesið? „Það er mjög mikið um þetta, ótrúlega mikið. Þetta er í hverri viku að taska týnist í flugi en þurfi svo að komast til eiganda síns eftir að hún kemur í leitirnar. Í síðustu viku til dæmis fór ég með tösku norður á Blönduós fyrir ferðamann sem þar var staddur. Það kemur ávallt eitthvað uppá og því þarf maður að vera tilbúin að fara í slíkar ferðir,“ nefnir Eggert.

Sami grunnur en oft aukaferðir

Tal okkar beinist því næst af skipulagi í svona rekstri. „Í grunninn erum við alltaf með þessar áætlunarferðir. Við förum af stað á morgnanna klukkan átta úr Borgarnesi og förum svo úr Reykjavík klukkan 12 aftur í Borgarnes. Við erum með fastar viðkomur í Reykjavík fyrir fyrirtækin heima í Borgarnesi en stundum breytist skipulagið. Í gær til dæmis vorum við með 22 bretti úr Borgarnesi, frá hinum og þessum fyrirtækjum, en á morgun verð ég á ferðalagi á Suðurnesjum en við höldum ávallt þessum áætlunarferðum,“ segir Eggert. „En eins og ég nefndi við þig áðan þá kemur alltaf eitthvað uppá, hvort að það sé iðnaðarmann sem vantar tengi fyrir heitan pott eða einhver verslun sem vantar nýjan posa til dæmis. Þá förum við í það og síðan koma upp aukaferðir hingað og þangað, upp í sveitir eða í sumarhúsahverfin, þannig að það er engin lognmolla hér sjáðu til,“ segir Eggert.

Allir og amma líka

Síminn hringir og Eggert ræðir málin um sendingu sem hefur ekki skilað sér á áfangastað. Hann hringir nokkur símtöl og kemst að því að villa hafi komið upp hjá viðkomandi fyrirtæki og engir pakkar verið sendir frá því þennan dag. Eggert er meðal fljótustu manna að pikka inn símanúmer. Hafa komið upp mörg vandamál við afhendingu hjá Borgarnes skutlunni? „Nei, það er nú hægt að telja það á fingrum annarrar handar. Það er ávallt einhver ástæða fyrir því ef bíllinn er seinn, eins og núna á sumrin til dæmis. Þá eru fjölmargir sumarstarfsmenn að vinna og þá erum við lengur að sækja pakka. Það er bara þannig, því miður að það bætist oft 3-5 mínútur aukalega á þessum afhendingarstöðum yfir sumartímann. En aðallega er þessi Reykjarvíkur umferð sem er orðinn slæm. Við erum til dæmis að fara úr Borgarnesi klukkan 08.00 til að við sleppum við umferðarteppurnar sem eru í Reykjavík á morgnana og erum að fara úr Reykjavík klukkan 12.00 til að sleppa þaðan. Ef við fáum fyrirspurn um að skjótast svo aftur í Reykjavík þá getur það tekið lengri tíma en á hinum venjulega áætlunartíma. Þessi umferð líka á milli Borgarness og Reykjavíkur er að verða eitthvað annað dæmi. Mér finnst ég oft vera bara fyrir í umferðinni en samt er ég að keyra á löglegum hraða. Síðan eru þessi símar sem eru að trufla fólk allt of mikið. Taktu eftir þessu í Reykjavík! Þar eru allir og ömmur þeirra líka með símann uppi á ljósunum,“ nefnir Eggert.

Frídagar

Við nálgumst Arnarstapa á Snæfellsnesi og ferðamaðurinn sem týndi tösku sinni fyrir viku síðan er mættur til að taka á móti sínum gersemum. Eggert hoppar út og afhendir töskuna og við gerum okkur klára að keyra til baka í Borgarnes. En hvernig eru frídagarnir hjá Eggerti? „Ég get sagt þér það að ég reyni að taka alveg frí um helgar. Á laugardögum reyndar fer ég á skrifstofuna, helli upp á kaffi og þá fer ég að viðhalda bílunum. Skipta um olíu og slíkt en reyni að vera búinn um hádegið. Eftir það þá reyni ég að gera eitthvað með fjölskyldunni. Það gengur aldrei upp held ég að vera vakinn eða sofinn í þessum rekstri alla daga allt árið. Ég og Daníel tölum mikið saman, erum með lista fyrir hvern dag og erum í stöðugum samskiptum. Skipulagið er gott hjá okkur, það er engin tölva á bak við neitt hjá okkur og er þetta eins mannlegt og hægt er,“ segir Eggert og brosir.

Framtíðin

Nú eru tveir fastir starfsmenn hjá fyrirtækinu, en hvar sér Eggert fyrirtækið eftir fimm ár, næst þegar Skessuhorn tekur viðtal við hann? „Það verður vonandi komin ein aukamanneskja með okkur í reksturinn en eins og staðan er í dag er ég mjög sáttur. Ég er eins og ég sagði við þig áðan, mjög þakklátur öllu fólkinu og fyrirtækjum í Borgarnesi, því svona heilt yfir erum við Borgfirðingar alveg toppfólk. Þetta er þjónustuhérað og er ég það heppinn með það að fjölmörg fyrirtæki nota Borgarnes skutluna, fyrir það er ég gríðarlega þakklátur,“ segir Eggert að lokum.

Fyrst og fremst að þjónusta Borgfirðinga

Farið á rúntinn með Eggerti Emil Ólafssyni á Borgarnes skutlunni

Farið á rúntinn með Eggerti Emil Ólafssyni á Borgarnes skutlunni