Bæjarhátíðin „Á góðri stund í Grundarfirði“ fer fram dagana 24. – 28. júlí og verður því mikið um að vera í Grundarfirði. Hjónin Ásthildur Elva Kristjánsdóttir og Jóhann Jón Ísleifsson eru í stjórn hátíðarfélagsins sem ber hita og þunga af dagskránni.

„Það verður mikið um að vera en dagskráin byrjar strax á miðvikudaginn með krakkabíói í Sögumiðstöðinni,“ segir Ásthildur í stuttu spjalli við Skessuhorn. „Það ættu allir að geta fundið eitthvað við sitt hæfi þessa helgi,“ bætir Jonni við en á fimmtudeginum verða tónleikar í kirkjunni og svo tónlistarfjör í sundlauginni um kvöldið. „Á föstudaginn verður liðakeppni í kubb og svo grillveisla á kirkjutúninu þar sem BMX Bros og íþróttaálfurinn láta sjá sig.“ Um kvöldið verða svo tónleikar í húsakynnum Djúpakletts.

Á laugardeginum er svo nóg um að vera en þar má nefnia golfmót, dorgveiðikeppni, markað, froðugaman, súpusölu og margt fleira. „Það verður nóg um að vera alla helgina og eina sem þarf að gera er að koma með góða skapið með sér,“ segja þessi heiðurshjón að endingu.

Bryndís Ásmunds og Elítan loka svo laugardagskvöldinu með dansleik í húsakynnum Djúpakletts. „Á laugardeginum verður líka knattspyrnuleikur á Grundarfjarðarvelli þar sem Reynir Hellissandi mætir Mídasi í 5. deild karla,“ bætir Jonni við þannig að það verður nóg um að vera. Þá er bara að vona að veðurguðirnir verði hátíðargestum hliðhollir um næstu helgi.

*Núverandi stjórn Hátíðarfélagsins, f.v. Amelía Rún Gunnlaugsdóttir, Þorkell Máni Þorkelsson, Atli Geir Jóhannsson, Ásthildur Elva Kristjánsdóttir og Jóhann Jón Ísleifsson.*

Á góðri stund í Grundarfirði um næstu helgi