Rætt við Ólafíu Kristjánsdóttur húðflúrara og listakonu í Borgarnesi

US

Ólafía Kristjánsdóttir er meðal þekktustu húðflúrara á landinu en fjölmargir heimsækja stofuna hennar í Borgarnesi. Hún og eiginmaður hennar, Andri Már Margrétarson og dóttir þeirra Díana Andradóttir, hafa komið sér vel fyrir í Borgarnesi. Ólafía er ættuð frá Ísafirði og hóf ung að aldri að prófa sig áfram í að húðflúra. „Ég keypti svínsbóg í Bónus en þá var ég búin að kaupa mér tattúvél. Ég var í kringum 17-18 ára gömul en ég gerði ekki mikið meira með þetta þá. Ég mæli ekki með því að gera slíkt því þetta var ógeðslegt,“ segir Ólafía og hlær. Hún hóf að starfa sem húðflúrari árið 2012 í Reykjavík og náði fljótlega að vekja mikla athygli.

*Eitt af verkum Ólafíu, Kári Stefánsson kominn á handlegg.*

Skrifað í skýin

„Við bjuggum um tíma á Akranesi og vorum oft að koma hingað í Borgarnes í sund með dóttur okkar og töluðum oft um það hversu fallegur bærinn hér er og heillandi. Við fluttum svo frá Akranesi í Reykjavík og vorum búin að kaupa okkur þar. Við vorum að taka úr kössum og ég að hengja upp mynd á vegg þegar við hugsuðum um hversu gott það hafi verið að vera svona út á landi. Við byrjuðum að skoða markaðinn svona til gamans og sáum þetta hús á vefnum, með frábæru útsýni og auka íbúð fyrir fyrirtækið og við drifum okkur í Borgarnes og fengum að skoða húsið. Það má segja að þetta hafi verið skrifað í skýin, því það gerðust ákveðnir hlutir sem gerðu það að verkum að við enduðum hér í Borgarnesi,“ segir Ólafía. Hjónin voru ekki lengi að koma sér fyrir í Borgarnesi. „Kjallarinn hér var bara tilbúin fyrir mig og ég þurfti næstum því bara að stinga í samband og byrja. Andri byrjaði að vinna hjá Borgarbyggð í íþróttamiðstöðinni og dóttir okkar byrjaði á leikskólanum Uglukletti. Mér finnst fínt að vera niðri í kjallaranum heima, ógeðslega feimin á meðan Andri er svona týpa að hann talar við alla. Ég fel mig stundum bak við hann og segi ekki neitt en svona erum við,“ segir Ólafía og hlær.

Erlendir aðilar sækja flúr í Borgarnes

Ólafía er mikil listakona en inni á stofu hennar eru fjölmörg glæsileg listaverk af dýrum og fólki. En hversu vinsæll húðflúrari er Ólafía? „Það er fólk að koma víða héðan frá Íslandi til mín. Ég er með fólk sem er að koma allsstaðar að af landinu og það gista sumir hér í Borgarnesi.“ Hún er einnig að fá erlenda gesti á stofuna sína. „Það eru að koma aðilar hingað frá Bandaríkjunum, Evrópu og frá Skandinavíu og er ég mjög þakklát og hamingjusöm fyrir það hversu mikið er að gera hjá mér. Það er alltaf nóg að gera og þetta er allskonar fólk sem eru að koma í stólinn hjá mér. Ég er aðallega að vinna í stærri verkum og þá er fólk að koma einu sinni og upp í tíu sinnum, til að klára verkin. Þetta virðist alltaf vera að vinda upp á sig og er ég heppin að vera með stóran hóp fastakúnna,“ segir Ólafía.

Ísland er að mestu leyti svart og grátt

Hefur Ólafía orðið vör við aukningu eða er áhugi á húðflúri að minnka? „Mér finnst áhuginn hafi verið að aukast. Það er ávallt sama eftirspurnin en síðan koma svona tískubylgjur. Nú er til dæmis í tísku þessi fíngerðu litlu tattú en ég er búin að fá mikið af fyrirspurnum um þau. Ég held að það sé allt í gangi núna í heimi húðflúrara, mikið af nýjum stofum og nýjum flúrurum sem eru að koma með nýtt handbragð og því held ég að allir gætu fundið flúrara við sitt hæfi. En annars er Ísland voðaleg mikið svart og grátt frekar en litir. Þessi bransi er eins og hver annar með það að gera, allt er breytingum háð,“ bætir Ólafía við.

Leiðsögn mikilvæg

En er auðvelt að hefja feril sem húðflúrari í dag? „Sko, þetta er í rauninni ekki það mikið mál, eiginlega of lítið mál. Þetta er ekki lögvernduð iðngrein eða þannig en þú þarft að hafa heilbrigðisleyfi og að mínu mati, þá þarftu að koma þér inn á stofu og fá leiðsögn. Það er mjög mikilvægt. En í dag er hægt að kaupa sér fínar vélar og gerviskinn til að æfa sig og því er greið leið fyrir fólk að byrja. Þetta mun held ég eiga eftir að aukast enn meir,“ segir hún. Fjölskyldan er full tilhlökkunar að eiga heima í Borgarnesi. „Við erum komin til að vera. Dóttir okkar á eftir eitt ár á leikskólanum Uglukletti, Andra líður vel í sínu starfi og okkur líður mjög vel hérna. Við hlökkum til framtíðarinnar hér í Borgarnesi,“ segir Ólafía að lokum.

Byrjaði ung að flúra

Rætt við Ólafíu Kristjánsdóttur húðflúrara og listakonu í Borgarnesi

Rætt við Ólafíu Kristjánsdóttur húðflúrara og listakonu í Borgarnesi