Heildartekjur einstaklinga á Íslandi voru rúmar 9,2 milljónir króna að meðaltali árið 2023, eða um 770 þúsund krónur á mánuði. Þetta kemur fram á vef Hagstofunnar. Það er rúm 10% hækkun frá fyrra ári. Sé horft til verðlagsleiðréttingar er raunhækkunin um 1,3%. Miðgildi heildartekna var um 7,6 milljónir króna á ári, sem samsvarar því að helmingur einstaklinga var með heildartekjur yfir 636 þúsund krónum á mánuði. Meðaltal atvinnutekna var um 6,4 milljónir, meðaltal fjármagnstekna rétt tæplega ein milljón króna og meðaltal annarra tekna um 1,9 milljónir. Heildartekjur eru samtala atvinnutekna, fjármagnstekna og annarra tekna.