Þess er nú minnst að liðin eru fimmtíu ár frá því fyrrum Akraborg og nú skólaskipið Sæbjörg var smíðað. Á vef Landsbjargar er frásögn um skipið og sögu þess. Gripið er niður í hana:

Það var mikið um dýrðir 8. júlí 1974 í höfninni í Los Cristianos á Tenerife þegar skipið hóf siglingar á nýrri áætlunarleið til San Sebastian. Skipið var smíðað í Þrándheimi fyrir Fred. Olsen Express og var nefnt Benchijigua við afhendingu þess 25. júní. Það ár annaði það ekki lengur flutningaþörfinni og var það því sett á nýja áætlunarleið milli Correlejo og Playa Blanca einnig á Kanaríeyjum og þá nefnt Betancuria. Ekki gekk vel með þær siglingar og því var skipið selt útgerðarfélaginu Skallagrími hf. á Akranesi árið 1982 til siglinga milli Akraness og Reykjavíkur. Var það þá nefnt Akraborg eftir forverum sínum.

Við opnun Hvalfjarðagangnanna í júlí 1998 lögðust ferjusiglingarnar af yfir flóann og gaf ríkisstjórn Íslands, sem þá var eigandi skipsins, Slysavarnafélaginu Landsbjörgu skipið til nota fyrir starfsemi Slysavarnaskóla sjómanna. Var skipið afhent félaginu við hátíðlega athöfn á Akranesi 12. júlí og þá nefnt Sæbjörg. Leysti hún af hólmi eldri Sæbjörgu sem áður hafði verið varðskipið Þór en það skip var komið til ára sinna, þá orðið 47 ára gamalt. Var skipinu siglt til Akureyrar tveimur dögum síðar þar sem því var breytt, hjá Slippstöðinni hf., til nota sem skólaskip.

Fyrsta námskeiðið um borð í nýju Sæbjörgu hófst 6. október 1998 og í kjölfarið efldist starfsemi skólans til mikilla muna. Allt fram til ársins 2015 var skipinu siglt á hafnir landsins til námskeiðahalds yfir sumarmánuðina en síðan hefur það legið í Reykjavíkurhöfn. Tugþúsundir hafa sótt mikinn fjölda námskeiða sem skólinn býður upp á og hefur fylgt mikil gæfa skipinu og starfsemi þess alla tíð. Í heiminum eru í dag skráð 289 skólaskip og vermir Sæbjörgin 60. sæti listans.

*Frá sjósetningu skipsins í Þrándheimi 1974.*

*: Frá eigendaskiptunum 1998. F.v. Lára Helgadóttir varaforseti SVFÍ, Þorvaldur Guðmundsson skipstjóri, Hilmar Snorrason skipstjóri og Óskar Ólafsson skipstjóri.*

Fyrrum Akraborg og nú Sæbjörg 50 ára