Síðasta fimmtudag fór fram afhending á fyrstu íbúðunum til útleigu í fjölbýlishúsinu á Dalbraut 6 á Akranesi en alls er 31 íbúð í húsinu; 21 tveggja herbergja íbúð og tíu þriggja herbergja íbúðir, auk bílakjallara. Leigufélag aldraðara hses. er byggingaraðili hússins og eru íbúðirnar ætlaðar til leigu fólki sem er 60 ára og eldra.

Lýsti yfir vonbrigðum með leiguverð

Á fundi velferðar- og mannréttindaráðs Akraneskaupstaðar, sem fram fór í nóvember á síðasta ári, kom fram að samkomulag milli Akraneskaupstaðar og Leigufélags aldraðra væri í burðarliðnum um útleigu íbúða í fjölbýlishúsinu á Dalbraut 6. Akraneskaupstaður lagði í byrjun fram stofnframlag til að leiga yrði hagstæðari en ella í húsinu. Á fundinum komu fram upplýsingar um áætlað leiguverð íbúðanna sem lagt var fram til kynningar og umræðu í ráðinu. Velferðar- og mannréttindaráð lýsti yfir vonbrigðum með það leiguverð sem Leigufélag aldraðra upplýsti um í leiguíbúðum fyrir aldraðra að Dalbraut 6. Vísaði velferðar- og mannréttindaráð til upplýsinga um samanburð við fermetraverð annarra leigufélaga en það fermetraverð sem Leigufélag aldraðra stillti fram væri töluvert hærra en annarra óhagnaðar- og hagnaðardrifinna leigufélaga. Fram kom í lok fundargerðar að velferðar- og mannréttindaráð hvatti Leigufélag aldraðra til að endurskoða leiguverðið og að það yrði til samræmis við leiguverð annarra óhagnaðardrifinna leigufélaga með starfsemi á Akranesi.

*Séð yfir bakgarðinn. Fjær sést í hluta hússins við Þjóðbraut 5.*

Löng bið

Í apríl árið 2021 var fyrsta skóflustungan tekin að þessu nýja 31 íbúðar fjölbýlishúsi á lóðinni þar sem vöruhús ÞÞÞ stóð áður og samkvæmt upphaflegri áætlun átti húsið að vera tilbúið haustið 2022. Talsverð seinkun hefur orðið á verkinu og var aðalástæðan sú, samkvæmt heimildum Skessuhorns, að hönnunargalli var í upphafi verksins sem olli töfunum. Í nóvember í fyrra voru verklok áætluð í mars á þessu ári en núna í lok júní er húsið loks allt tilbúið. Talsverð óánægja hefur verið hjá væntanlegum leigjendum með þessa seinkun og sumir þurft að bíða í meira en ár að fá leigu í húsinu og litlar upplýsingar fengið um stöðu mála.

Fólk er að flytja inn

Jóhann G. Ásgrímsson stjórnarformaður Leigufélagsins segir að búið sé að afhenda 20 íbúðir frá því fyrir helgi og er vinna nú í gangi með þessar íbúðir sem eftir eru til leigu. „Við höfum verið í góðu samstarfi við Akraneskaupstað og Húsnæðismálastofnun og það samstarf verið mjög jákvætt. Við höfum gefið okkur tíma í að leysa ákveðin vandamál sem komu upp í ferlinu, við vorum ekki sátt við hvernig málin þróuðust en við tókum skynsamlega á þeim að ég held,“ segir Jóhann.

Alsæll íbúi

Blaðamaður Skessuhorns fékk leyfi að kíkja í heimsókn hjá Sólveigu Ásgeirsdóttir Hausler á föstudaginn. Hún var í óða önn að flytja inn í tveggja herbergja íbúð á fjórðu hæð sem er efsta hæðin og var Solla, eins og hún er yfirleitt kölluð, afar ánægð með nýju íbúðina. Íbúðin væri björt og falleg og útsýnið afar gott af svölunum sem Solla sagðist ætla að nýta sér vel og oft.

Leigufélag aldraðra er húsnæðissjálfseignarstofnun sem byggir hagkvæmar íbúðir til útleigu fyrir eldri borgara og starfar samkvæmt lögum um almennar íbúðir. Lögin gera ráð fyrir bæði hagkvæmni í byggingu en einnig stofnframlögum frá ríki og sveitarfélagi til að leiga verði hagstæðari en ella. Lögin gera sömuleiðis ráð fyrir ákveðnum viðmiðunum í tekjum og eignum hjá væntanlegum leigjendum.

Fyrstu íbúðirnar á Dalbraut 6 afhentar