Rætt við aðstandendur Brákar- og Hinseginhátíðar Vesturlands

Um næstu helgi, dagana 27. – 30. júní, verða Brákarhátíð og Hinseginhátíð Vesturlands haldnar með pompi og prakt í Borgarnesi. Brákarhátíð ættu flestir lesendur að kannast við en hún hefur verið haldin um árabil. Hinseginhátíð Vesturlands fagnar sínu fjórða ári en í ár munu hátíðirnar tvær sameinast í eina stóra hátíð og verður öllu til tjaldað. Skessuhorn náði fyrir helgi tali af þremur skipuleggjenda hátíðarinnar; systrunum Lilju Hrönn og Lindu Björk Jakobsdætrum frá Hollvinasamtökum Borgarness og Guðrúnu Steinunni Guðbrandsdóttur, forseta Hinsegin Vesturlands.

Sterkari saman

Aðspurðar hvernig það hafi komið til að hátíðirnar væru sameinaðar í ár svara þær: „Við vorum mjög buguð eftir Hinseginhátíðina á Akranesi í fyrra og staðráðin í að taka okkur pásu í ár. En svo jöfnuðum við okkur á þreytunni og þá fannst okkur við ekki geta sleppt því að halda hátíðina í ár, svo við ákváðum að athuga með samstarf og það gekk upp,“ segir Guðrún og systurnar taka í sama streng. „Við vorum einmitt líka mjög buguð eftir hátíðina í fyrra, svo kom Gunna á fund og stakk upp á samstarfi og ég fann bara hvernig ég gat loksins andað ofan í maga,“ segir Lilja og Linda bætir við; „þetta var bara besta hugmynd ever, myndi ég segja!“

Allt samfélagið tekur þátt

Þessi jákvæða orka hefur haldist frá fyrsta fundi en samstarfið og undirbúningur hátíðarinnar hefur gengið framar vonum. „Það er alltaf erfitt að fá mannskap í að halda svona hátíðir, svo það munar svo miklu að vera fleiri, til dæmis í því að sækja um styrki og annað,“ segir Guðrún. Lilja og Linda taka undir og bætir Lilja því við að samtals séu þau sjö í nefndinni en auk nefndarinnar leggja félög og fyrirtæki einnig hönd á plóg. „Við gætum t.d. aldrei haldið ball án fótboltans, svo er körfuboltinn með sitt, líka Kvenfélagið og Björgunarsveitin Brák. Já og öll fyrirtækin á svæðinu, flest fyrirtæki með veitingasölu verða með einhverja viðburði. Þetta er bara algjör stemning! Maður er þakklátur fyrir að búa í samfélagi þar sem maður getur leitað eftir stuðningi, það eru allir tilbúnir til að hafa gaman saman.“ Þær stöllur eru furðu rólegar, að eigin sögn, miðað við hve stutt er í herlegheitin. „Það er allt svo vel undirbúið,“ segir Guðrún, „þetta verður keyrsla í vikunni en allt gengur svo vel og hefur gengið vel hingað til.“

Eitthvað fyrir öll

Dagskráin hefst með sundlaugardiskói á fimmtudag og lýkur með Regnbogamessu í Borgarneskirkju á sunnudag. Þess á milli ætti hver að finna eitthvað við sitt hæfi en frisbeegolf, kajaksigling, leiktæki og loppumarkaður er dæmi um það sem hægt er að finna sér til skemmtunar. Hápunktur helgarinnar er þó vafalaust hinsegingangan en þar sameinast allir hátíðargestir, heimafólk sem og aðrir, og ganga í takt – eða öllu heldur dansa – frá Grímshúsi í Brákarey að Hjálmakletti en þar tekur gleðidagskrá á sviði við. Lilja, Linda og Gunna hvetja íbúa Vesturlands til að skreyta húsin sín og garða í öllum regnbogans litum og hafa gaman saman um helgina. Þær bæta því við að öll geti verið með vagn eða hóp í göngunni og er skráning enn opin og má finna skráningarform á facebook síðu Hinsegin Vesturlands.

Varðandi skráningu í gleðigöngu; Sjá nánar hér

Dönsum í takti

Rætt við aðstandendur Brákar- og Hinseginhátíðar Vesturlands

Rætt við aðstandendur Brákar- og Hinseginhátíðar Vesturlands