Mikil hátíðardagskrá var í Snæfellsbæ í síðustu viku í tilefni þess að sveitarfélagið heldur upp á 30 ára afmæli sitt. Snæfellsbær varð til við fjögurra sveitarfélaga árið 1994 þegar sameinuð voru Ólafsvíkurkaupstaður, Neshreppur utan Ennis, Breiðavíkurhreppur og Staðarsveit. Blaðamaður Skessuhorns náði tali af Kristni Jónassyni bæjarstjóra Snæfellsbæjar, en sjálfur hefur hann gegnt stöðu bæjarstjóra samfleytt frá árin 1998. En fyrst, hvaða breytingar hafa orðið á sveitarfélaginu frá því þegar Kristinn tók við starfi bæjarstjóra?

Öflugt og fjölbreytt samfélag

„Heilt yfir þá erum við orðin miklu öflugra samfélag og fjölbreytni hefur aukist. Á liðnum þrjátíu árum höfum við lagt áherslu á að gera samfélagið þannig að fólk vilji búa og starfa í því. Þó alltaf sé erfitt að telja upp, án þess að gleyma mikilvægum þáttum, ætla ég að nefna að við byggðum nýtt íþróttahús árið 2000 sem breytti miklu. Við gerðum gervigrasvöll, stækkuðum leikskólana, við sameinuðum grunnskólann árið 2004 og aldurskiptum honum sem var mikið framfaraskref. Við byggðum nýtt hjúkrunarheimili, byggðum hús fyrir starf eldri borgara, settum upp glæsilega útiaðstöðu við sundlaugina í Ólafsvík og endurbyggðum sundlaugina á Lýsuhóli auk þess sem við höfum byggt upp hafnaraðstöðu í öllum höfnum okkar, svo eitthvað sé upp talið,“ segir Kristinn. En hvað er hann þakklátastur fyrir eftir þennan tíma? „Ég hef verið afar heppinn með samstarfsfólk í bæjarstjórn í gegnum tíðina. Ég hef líka verið einstaklega heppinn með starfsfólk, þá bæði stjórnendur og almenna starfsmenn, og frábæra íbúa, án þeirra væri Snæfellsbær ekki þar sem hann er í dag. Það hefur verið einstakt tækifæri fyrir mig að hafa fengið að vera meginhlutann af þessum tíma sem sveitarfélagið hefur verið til við stjórnun þess,“ segir hann.

Stórar stoðir

Fjölbrautaskóli Snæfellinga var stofnaður árið 2004 og byggt yfir hann í Grundarfirði. Skólinn hefur gjörbreytt stöðu fólks til að sækja nám, en einnig var Snæfellsjökulsþjóðgarður stofnaður árið 2001. „Þjóðgarðurinn var mikið gæfuspor fyrir svæðið og er hann að eflast á hverju ári. Segja má að hann sé einn að okkar stóru stoðum. Samsetning íbúa hefur breyst töluvert og í dag erum við samfélag íbúa af fjölbreyttum uppruna. Við byggðum íbúðakjarna fyrir fólk með fötlun, við fórum í samstarf um umhverfismál með Earth Check og svo hafa samgöngur gjörbreyst. Nú eru allir stofnvegir komnir með bundið slitlag og ýmsir farartálmar verið lagaðir. Ferðaþjónustan hefur eflst mikið í Snæfellsbæ, hér er öflugt lista- og menningarstarf og hér er í boði fjölbreytt og öflugt íþróttastarf,“ bætir bæjarstjórinn við.

Ferðaþjónusta fyrirferðarmikil

Í Snæfellsbæ er mikil náttúrufegurð og er Snæfellsjökulsþjóðgarður nú kominn með þjónustumiðstöð á Hellissandi. En hvernig var ferðaþjónustan þegar Kristinn hóf störf árið 1998? „Það var töluverð ferðaþjónusta á svæðinu þó hún sé í dag miklu meiri en þá. Það hefur verið mikil uppbygging í greininni og það segir sig sjálft að fjöldi ferðamanna hefur aukist mikið hjá okkur eins og á landinu öllu. Eins og ég kom að áður þá hefur verið mikil uppbygging í gistingu og veitingaaðstöðu. Fjöldi þeirra sem starfa við ferðaþjónusta hefur margfaldast. Þjóðgarðurinn skiptir líka miklu og er hann mikið aðdráttarafl og sú uppbygging sem í honum er hjálpar okkur mikið við að taka á móti ferðamönnum. Það hefur verið mikil uppbygging innviða á svæðinu á áningarstöðum, nýjum og eldri, gerðir hafa verið göngustígar, útsýnispallar og bílastæði og gönguleiðir merktar. Markaðs- og kynningarstarf hefur mikið verið eflt á svæðinu í samstarfi sveitarfélaga. Það er gaman að segja frá því að á liðnu ári komu um hundrað þúsund gestir í Gestastofuna á Malarrifi og Þjóðgarðsmiðstöðina á Hellissandi og tæplega 500 þúsund heimsóttu þjóðgarðinn. Það er sagt að svæði sem stofnar þjóðgarð megi búast við að fjöldi ferðamanna aukist um allt að 400% og er það raunin hjá okkur,“ segir Kristinn.

Sjávarútvegurinn okkar undirstaða

Nú er sjávarútvegur stór atvinnuvegur í sveitafélaginu, en auk þess landbúnaður og ferðaþjónusta. Sér Kristinn fyrir sér aðra atvinnuþætti eflast í framtíðinni? „Sjávarútvegurinn er mikilvægur fyrir okkur og segja má að hann sé okkar undirstaða. Við erum með öflug sjávarútvegsfyrirtæki og almennt öflugan sjávarútveg. Hér er verið að landa um 40 þúsund tonnum á ári sem er mikið í ekki stærra samfélagi. Eins og ég hef komið að áður þá er ferðaþjónustan alltaf að eflast og er það mín trú að hún haldi áfram að vaxa enda eru hér mikil tækifæri. Því miður þá á landbúnaðurinn undir högg að sækja en ég vona nú samt að hann haldi sinni stöðu hjá okkur og veikist ekki meira en orðið er. Ég er að sjá fyrir mér að hlutir sem tengjast menningu og listum muni eflast í samfélaginu og það skiptir miklu máli fyrir öll samfélög. Hér er að fjölga fólki sem hefur atvinnu sína í þeim geira og auðgar það okkur öll og samfélagið verður mun áhugaverðara,“ segir Kristinn.

Snæfellsbær næstu tíu ár

En hvernig sér Kristinn bæjarstjóri Snæfellsbæ eftir tíu ár? „Hvar Snæfellsbær verður eftir tíu ár er ekki gott að segja, en það er mín trú að við verðum áfram með öflugan sjávarútveg, ferðaþjónustan verður enn öflugri og að við höfum náð að byggja og styrkja innviði samfélagsins þannig að hér sé eftirsóknarvert að búa. Grunnþættir eins og almenn þjónusta við íbúana verði eins og best verður á kosið þannig að fólk kjósi að búa á svæðinu. Við erum þessa dagana að stækka húsnæðið á Lýsuhóli sem mun bæta aðstöðuna mikið bæði fyrir leik- og grunnskólastarfið þar. Við erum að stækka enn og aftur húsnæði leikskólans í Ólafsvík. Þá höfum við verið og erum í miklum viðhaldsframkvæmdum á okkar skólahúsnæði. Við erum ekki með nein frekari plön á næstu árum um nýbyggingar en að sjálfsögðu er alltaf verið að laga og endurbæta þannig að starfsemin þjóni sínu hlutverki sem best á hverjum tíma,“ segir Kristinn.

Snæfellsbær fagnar 30 ára afmæli um þessar mundir