Samkvæmt tölum Hagstofunnar voru skráðar gistinætur í apríl mánuði á Íslandi þrettán prósentum færri en á sama tíma í fyrra, þrátt fyrir að komum ferðamanna til landsins hafi fjölgað um sex prósent fyrstu fjóra mánuði ársins. Á mælaborði Ferðamálastofu má sjá að heildarfjöldi hótelherbergja á Vesturlandi og Vestfjörðum í apríl var 920 talsins og var eingöngu 30% nýting herbergja í apríl mánuði og voru langflestar nýttar af Íslendingum. Jóhannes Þór Skúlason, framkvæmdastjóri Samtaka ferðaþjónustunnar, nefndi í viðtali við Bylgjuna í síðustu viku að þróunin væri í raun að fara í öfuga átt, en þeir ferðamenn sem hafa verið að koma reynast hafa stytt dvöl sína. Það sé þvert gegn hagsmunum greinarinnar. Þá eru vísbendingar um að landið sé orðið dýrt að sækja heim og sé jafnvel að verða undir í samkeppni við önnur lönd.

Nokkur hótel hér á Vesturlandi hafa nú þegar brugðist við og lækkað verð á gistingu. Önnur eru með vetrarverð í boði þrátt fyrir að komin sé háönn ferðasumarsins. Þetta er gert til að mæta þeim afbókunum sem nokkuð hefur verið um fyrir sumarið og næsta haust. Afbókanir hafa jafnvel borist með mjög svo stuttum fyrirvara að undanförnu sem að sjálfsögðu er bagalegt.

*Margrét Björk Björnsdóttir, fagstjóri áfangastaða- og markaðssviðs SSV. ljósm: SSV*

Margrét Björk Björnsdóttir, fagstjóri áfangastaða- og markaðssviðs SSV, nefndi í spjalli við blaðamann að viðkomufarþegum væri alltaf að fjölga, þ.e. þeim sem staldra við á Íslandi í stuttan tíma á leið sinni milli Ameríku og Evrópu. Hún segir að það útskýri þá þróun að meðaltals dvalarlengd gesta í landinu hefur verið að styttast. Vissulega væri það hagur allra ef gestir stoppuðu lengur í heimsókn sinni hingað til lands. „Hvað varðar hlutfallsnýtingu gistingar á Vesturlandi þá þarf að taka tillit til þess að Vesturland og Vestfirðir eru alltaf spyrt saman í samantektartölum Hagstofunnar, en það eru mjög mismunandi aðstæður og umferð ferðafólks innan þess stóra svæðis. Einnig eru mismunandi aðstæður á svæðum hér innan Vesturlands sem gerir það að verkum að meðaltalstölur fyrir allan vesturfjórðung landsins eru ekki að gefa raunsanna mynd af herbergjanýtingu.“

Margrét Björk nefndi einnig að Vestlendingar hafa fundið fyrir mikilli aukningu í dagsferðum inn í landshlutann samhliða ört vaxandi framboði af gistingu á höfuðborgarsvæðinu. Þar hafa stór og öflug ferðaþjónustufyrirtæki verið að byggja hótel þar sem gestum er boðið upp á dagsferðir út frá höfuðborgarsvæðinu. Í lokin nefnir Margrét Björk að starfsfólk í ferðaþjónustu á Vesturlandi, líkt og annars staðar í landinu, hafi áhyggjur af afpöntunum ferðafólks. Að einhverju leyti megi skýra það af fréttaflutningi um allan heim frá því í haust af eldgosum á Reykjanesi og því væri mjög mikilvægt að farið verði í víðtæka kynningu og markaðssetningu sem gæfi raunsanna mynd af áfangastaðnum Íslandi.

hig

Búist við að erfitt ferðasumar fari í hönd