Rætt við mæðginin Guðrúnu Helgu Árnadóttur og Jón Árna Gylfason um líf ungs afreksíþróttamanns

Jón Árni Gylfason er 16 ára afreksíþróttamaður í Borgarnesi en hann hefur verið valinn í U-16 ára landslið Íslands í körfuknattleik, sem tekur þátt í Norðurlandamóti í Finnlandi nú í byrjun júlí og keppir síðar á Evrópumóti í Makedóníu í ágúst. Auk þess hefur Jón Árni verið síðastliðin þrjú ár í liði sem nefnist Icelandic All Star, nú IAS, en það lið keppir fyrir hönd Íslands á Evrópumóti félagsliða. Liðið var upprunalega valið með skýrslur KKÍ til hliðsjónar um tíu öflugustu leikmenn landsins. Jón Árni hefur á þessu ári farið þrjár ferðir með IAS liðinu en þeir komust alla leið í úrslitakeppni félagsliða í apríl en fyrirhugað eru fleiri ferðir með IAS liðinu næsta vetur. En þessari miklu þátttöku fylgir sömuleiðis mikill kostnaður sem beita þarf útsjónarsemi til að brúa.

Við lifðum nánast í bílnum

Jón hefur æft og spilað með Skallagrími í Borgarnesi öll sín ár og hefur háleitt markmið: „Ég ætla mér að fara út eftir tvö ár, annað hvort til Ameríku eða til Evrópu en það hafa opnast fleiri gluggar, þegar kemur að því að fara út til náms eða í afreksbúðir. Á Evrópumótum félagsliða og á mótunum með íslenska landsliðinu eru útsendarar liða víða úr Evrópu og frá Ameríku, þannig að það er mikilvægt fyrir mig að fara með liðunum út og sýna hvað í mér býr,“ segir Jón þegar blaðamaður sest niður með honum og móðir hans, Guðrúnu Helgu Árnadóttur. Jón fór í þrjár ferðir með IAS liðinu og U-15 ára landsliði Íslands í fyrra auk þess sem hann æfði og spilaði fyrir hönd Skallagríms. „Við vorum á ferðinni alla daga jafnvel og þá var bara borðað í bílnum. Ein æfingatörnin stóð yfir í sex vikur samfleytt og keyrðum við þá á hverjum degi í Garðabæinn á æfingar. Ég var búinn að undirbúa vikuskammt af mat, við lifðum bara í bílnum og borðuðum á ferðinni,“ segir Guðrún.

*Jón Árni með íslenska landsliðinu. Ljósm. ghá*

Mikill einbeiting

Jón er sjálfur þessa dagana að æfa í Borgarnesi en auk þess er hann að vinna á Grillhúsinu í Borgarnesi. „Ég er að fara á vakt núna á eftir og verð yfir helgina á vakt,“ sagði hann þegar blaðamaður ræddi við þau mæðgin fyrir helgi. „Þess á milli er ég niðri í íþróttahúsi að skjóta körfubolta, lyfta lóðum og hreyfa mig. Skipulagðar æfingar landsliðsins hefjast svo núna 20. júní,“ segir hann.

Kostnaður leikmanns í U-16 landsliði Íslands og IAS liðinu er áætlað að muni kosta 1,6 milljón króna á þessu ári. „Það voru fimm leikmenn Skallagríms í fyrra sem voru í landsliðsverkefnum en Jón er núna eini leikmaðurinn sem er að fara í þessi verkefni. Við erum nú að einbeita okkur að því að fjármagna þetta ár, allar þessar ferðir, en Jón missir úr vinnu allan júlí og ágúst mánuð vegna keppnisferða og æfinga með landsliðinu og svo bætist við verkefni IAS í haust. Við erum saman í þessu verkefni; við tvö, og mér líður stundum eins og við séum meðleigjendur, þar sem við erum að vinna saman og að reyna að ná okkar markmiðum,“ segir Guðrún. Þau hafa nú tekið að sér að sinna styttri verkefnum til fjáröflunar upp í þann kostnað sem þarf að leggja út fyrir íþróttina, svo sem að vinna í veislum og á viðburðum.

Lítið annað sem kemst að

Guðrún er að vinna hjá Landbúnaðarháskóla Íslands á Hvanneyri, sem þjónustufulltrúi í fullu starfi, en auk þess tekur hún að sér önnur verkefni. „Ég vinn aðra hverja helgi á Hótel Hilton en auk þess er ég að taka að mér einkaveislur, þar sem ég og Jón sjáum um allt. Aukavinnan mín fer nánast ósnert inn á söfnunarreikninginn hans Jóns Árna en það kemur mjög lítið mótframlag frá Körfuknattleikssambandi Íslands í þessi verkefni. Kostnaður við landsliðsverkefni sumarsins verða sléttar 700.000 krónur fyrir utan kostnað við akstur á æfingar, vasapening, skó og svo framvegis. Það er reyndar lítið hægt að skammast út í KKÍ vegna þess að ríkið er ekki að styrkja starfið nægilega mikið og hefur upphæðin frá ríkinu til KKÍ ekki hækkað síðastliðin fimm ár,“ segir Guðrún.

En hvað annað kemst að í lífi þeirra mæðgina? „Staðreyndin er sú að það er fórnarkostnaður, þó ég líti í raun ekki á það þannig. Við vorum vön því að fara í skemmtileg ferðalög, skíðaferðir og sumarfrí en við erum búin að eiga samtal um að fjármagnið leyfir ekki bæði á meðan á þessu tímabili stendur og einbeitingin er nú sett í að að sinna körfuboltaferðunum. Við erum bara í þessu verkefni og það kemst ekkert annað að á meðan á því stendur. Ég er með samviskubit yfir að rækta ekki vinahópinn minn, vera ekki duglegri að heimsækja annað fólk, en svona er þetta. Við erum með einbeitinguna hérna, hjá okkur,“ segir Guðrún.

*Jón í leik með Icelandic All Star liðinu. Ljósm. ghá*

Öflugt teymi

Jón og Guðrún mynda mjög öflugt teymi og hafa marga bolta á lofti. „Við erum nú að fara í fyrirtæki til að athuga áhuga þeirra fyrir að styrkja Jón fyrir komandi keppnisferðir en einnig munum við sjá um veitingar og verðum við með ýmsan varning til sölu á Varmalandsdögunum, sem haldnir verða um næstu helgi, 14.-16. júní. Þar seljum við fatnað, pestó, súpu og brauð, Chili con Carne og eitthvað fleira verður þarna hjá okkur. Við höfum tekið góða pásu í eldamennsku heima þó það sé ótrúlega kósý að búa til mat og selja í fjáraflanir. Jón Árni var orðinn þreyttur á að vakna við chili lykt alla morgna af hægeldaða chiliinu! Honum fannst komið nóg þegar dagarnir voru orðnir tíu í röð vegna mikillar sölu. En nú tökum við smá törn fyrir Varmalandsdagana. Við lifum lífinu í lausnum en ekki vandamálum og meðan heilsan er í lagi, þá brettum við upp ermarnar og brosum, er það ekki Jón,“ spyr Guðrún og saman hlæja þau að verkefnunum, hún og Jón Árni.

Þeir sem hafa áhuga á að styðja við Jón Árna í starfi hans er bent á styrktarreikning: 0326-13-110018. Kt: 040908-2180

hig