KV og Kári áttust við í 3. deild karla í knattspyrnu í gærkvöldi og var leikurinn á KR-velli í Frostaskjóli. Fyrir leik voru Káramenn með tíu stig eftir fimm leiki og KV með þrjú stig og með fjóra tapleiki í röð á bakinu.

Það var ekki boðið upp á fallegan fótbolta í fyrri hálfleik enda aðstæður erfiðar vegna veðurs og var hífandi rok og rigning sem þýddi að erfitt var að hafa stjórn á boltanum. Liðin fengu þó nokkur færi sem fóru öll forgörðum og staðan markalaus í hálfleik.

Káramenn komu af miklum krafti inn í seinni hálfleikinn og Hektor Bergmann Garðarsson fékk dauðafæri strax í byrjun sem hann náði ekki að nýta en aðeins nokkrum mínútum síðar var hann aftur á ferðinni og í þetta skiptið brást honum ekki bogalistin. Þór Llorens Þórðarson sendi boltann fyrir á Hektor sem var rétt fyrir utan vítateiginn, hann fór með boltann áfram og setti hann snyrtilega í fjærhornið. Staðan 0-1 Kára í vil en skömmu síðar fór rautt spjald á loft og það á leikmann Kára. Máni Berg Ellertsson fór þá í tæklingu, fylgdi henni vel eftir og fór óvart með fótinn nálægt bringu og andliti leikmanns KV og líklegast var ekki erfitt fyrir dómarann að lyfta því rauða. Þjálfari KV gerði í kjölfarið sóknarsinnaðar skiptingar en einum færri gerðu Káramenn sér lítið fyrir og skoruðu annað mark á 62. mínútu. Þar var að verki fyrirliðinn Sigurjón Logi Bergþórsson sem fór fyrir sínum mönnum og kom þeim í góða stöðu. Hann fékk boltann á miðjunni, sólaði leikmann KV upp úr skónum og skaut síðan föstu skoti í nærhornið, alveg út við stöng og ansi vel að verki staðið. Eftir markið komust heimamenn lítt áleiðis, Kári hélt boltanum innan liðsins eins og hægt var og unnu að lokum sannfærandi sigur, lokatölur 0-2 fyrir Kára og þeir skelltu sér á toppinn, þó líklegast tímabundið, því sjöttu umferðinni lýkur um helgina með þremur leikjum.

Eins og staðan er núna eru Kári, Víðir og Árbær í 1. til 3. sæti með 13 stig og Augnablik og Magni eru í 4.-5. sæti með 12 stig en hafa spilað einum leik minna. Deildin er orðin tvískipt því í 6.-10. sæti eru Sindri, ÍH, KFK, Hvíti riddarinn og Elliði, öll með 6 stig, og neðstu tvö liðin eru KV sem er með 3 stig og KV er með aðeins eitt. Næsti leikur Kára er gegn ÍH næsta fimmtudag í Akraneshöllinni og hefst klukkan 19.15.

Kári kominn á toppinn eftir góðan sigur á KV