Það var þétt setið í húsakynnum Hjálmakletts í Borgarnesi í gær en þar fór fram kynning og umræður um gerð nýs rammaskipulags fyrir Brákarey í Borgarnesi. Guðveig Lind Eyglóardóttir, forseti sveitarstjórnar, kynnti verkefnið og fór yfir ferli síðustu ára, til að mynda frá íbúafundi árið 2019 þar sem fram kom vilji íbúa til að sjá blandaða byggð í Brákarey með þjónustu og afþreyingarvalkostum. Helga Margrét Friðriksdóttir tók svo við orðinu og sá um fundarstjórn kvöldsins. Róbert Aron Róbertsson kynnti starfsemi fasteignafélagsins Festis og verkefnið í Brákarey en það var svo Þorsteinn Ingi Garðarsson verkefnastjóri sem fór yfir helstu tillögur að nýju rammaskipulagi.

*Yfirlitsmynd af mögulegri Brákarey, verði tillagan framkvæmd*

Aðdráttarafl fyrir ferðamenn og upplifun fyrir íbúa

Aðstandendur rammaskipulagsins lýstu sig hæstánægða með þá tillögu sem kynnt var á fundinum og telja hana vera aðdráttarafl fyrir ferðamenn um leið og hún sé upplifun fyrir íbúa. Tillagan felur í sér að gert verði nýtt deiliskipulag fyrir alla Brákarey og að hjarta Brákareyjar verði á norðurhluta eyjunnar: skjólgott og sólblítt miðbæjartorg fyrir bæjarbúa og gesti til að koma saman. Umhverfis torgið verði annars vegar hótel og hins vegar verslun og þjónusta á jarðhæð og íbúðir á efri hæðum. Þá var tekið fram að byggðin yrði ekki háreist, heldur þétt og skjólgóð í kringum torgið. Á suðurhluta eyjunnar er tillaga um 15 hófleg einbýlishús sem falla inn í umhverfið og að lokum yrði baðlón á vesturhluta eyjunnar. Undir torginu er gert ráð fyrir bílakjallara fyrir um 80 bíla með innkeyrslu hægra megin við brúna sem áfram verður einbreið.

*Hjarta Brákareyjar: torgið, sem yrði upplifun fyrir íbúa og aðdráttarafl fyrir ferðafólk*

*Verslun og þjónusta yrði á jarðhæðum, íbúðir á efri hæðum*

Ýmist fallegt eða fráleitt

Bæjarbúar og aðrir fundargestir voru misánægðir en á meðan mörg voru ánægð með áætlunina fannst öðrum hugmyndirnar fráleitar. Það fyrsta sem brann þó á bæjarbúum var spurningin um kostnað og tíma. Stefán Broddi, sveitarstjóri, gat ekki lofað neinu varðandi tímaáætlun öðru en því að niðurrifið í eyjunni tæki um 9-12 mánuði og áætlaði hann að sá kostnaður yrði um 3-400 milljónir sem félli á byggingaraðila. Hann fullyrti þó að bæjarfélagið myndi ekkert greiða fyrir uppbygginguna en legði vissulega til vinnuafl. Ánægja íbúa fólst að mestu leyti í því að til stæði að gera breytingar á svæðinu og að hönnunin væri falleg og smekkleg. Óánægjan fólst m.a. í því að tillögurnar væru óraunhæfar fyrir veðráttu og verslun í Borgarnesi sem og að tillögurnar virtust frekar sniðnar að ferðamönnum en íbúum bæjarins. Baðferð í lónið myndi t.d. líklega kosta á annað hundrað þúsund fyrir fjölskylduna og ekki væri hægt að ganga um suðurhluta eyjunnar nema á lóðum einbýlishúsaeigenda. Þá voru einnig gerðar athugsaemdir um að hugmyndirnar um veitingastaði og verslun væru ansi háleitar og úr takti við raunveruleikann.

Mikilvægt að bæjarbúar vilji sjálfir sækja svæðið

Fundargestir spurðu ekki eingöngu spurninga, heldur komu líka með gagnlegar ábendingar. Margar þeirra voru keimlíkar, eins og þær að mikilvægt sé að bæjarbúar séu hafðir með í ráðum við hönnun svæðisins, því til þess að torgastemming myndist og verslun og veitingasala þrífist á svæðinu þurfa bæjarbúar að hafa áhuga á að verja tíma þar. Þá mætti einnig endurskoða hugmyndina um baðlónið, þar sem baðlón væru orðin eins og refabú fyrri tíðar og fór ekki vel fyrir þeim, einnig væru þau greinilega ekki ætluð bæjarbúum. Þá komu einnig ábendingar um að áætlun um veitingahúsarekstur væru háleitar og að hönnunin væri greinilega gerð með hástétt og ferðafólk í huga en ekki almenning. Aðstandendur tillögunnar ítrekuðu að um frumhönnun væri að ræða og að engar skuldbindingar hafi verið gerðar. Að lokum stóð Hlynur Þór, veitingamaður í Grímshúsi, upp og bauð bæjarbúum til sín í Grímshús í Brákarey í dag, föstudag, á milli kl. 15 og 18 til að upplifa stemminguna í Brákarey og halda áfram umræðum um framtíð hennar.

*Róbert Aron, Framkvæmdastjóri Festis, kynnti fyrirtækið og önnur verkefni Festis*

*Þorsteinn Ingi Garðarsson, verkefnastjóri, kynnti tillöguna*

*Líflegar umræður sköpuðust í kjölfar kynningarinnar, hér leggur Magnús Scheving til málanna*

*Hlynur, veitingamaður í Grímhúsi, býður Borgnesingum í Grímshús í Brákarey í dag kl. 15-18 til að halda umræðum áfram*

hig/bb

Líflegar umræður á kynningu nýs rammaskipulags fyrir Brákarey