AFS fræðslusamtökin undirbúa komu næstu skiptinema

Alþjóðlegu fræðslusamtökin AFS hófu starfsemi sína hér á landi fyrir rúmum 70 árum þegar átta íslenskir skiptinemar sóttu nám til Bandaríkjanna. Síðan þá hefur starfið vaxið og dafnað og fara nú 100-200 nemar árlega til dvalar erlendis og koma að sama skapi um 30-40 erlendir nemar hingað til lands. Um þessar mundir eru samtökin í óða önn við að udirbúa næstu skiptingar en í ágúst er von á 26 nemum frá 15 löndum. Samtökin leita að sjálfboðaliðum víðs vegar um land til að búa nemunum heimili hjá sér í 3-10 mánuði, en nemarnir eru á aldrinum 15-18 ára og fara ýmist í framhaldsskóla eða jafnvel í 10. bekk í grunnskóla. Sólveig Vilhjálmsdóttir, deildarstjóri hjá AFS, segir reynsluna að taka að sér skiptinema afar dýrmæta, bæði fyrir nemann og fósturfjölskylduna.

Dýrleif frá Ekvador

„Auðvitað hreyfir það við venjum fólks að fá ungling inn á heimilið sem talar ekki íslensku, talar jafnvel ekki ensku heldur og kemur úr allt annarri menningu, en þá reynir á aðlögunarhæfni og þolinmæði bæði fjölskyldunnar og nemans,“ segir Sólveig í samtali við Skessuhorn. Sjálf fór hún út í skiptinám fyrir 36 árum. „Á móti kemur þá er það afar gefandi að kynnast nýjum einstaklingi og nýjum menningarheimi í gegnum hann, og eignast um leið fjölskyldu erlendis.“ Sólveig segir að í kjölfarið myndist mjög oft vinskapur á milli fjölskyldna nemans sem endist jafnvel ævilangt. „Núna í haust er t.d. stúlka frá Ekvador að koma til landsins en pabbi hennar kom hingað sem skiptinemi fyrir 20 árum. Hann bjó hjá konu á Akureyri sem heitir Dýrleif og nú er 16 ára stúlkan, sem heitir einmitt Dýrleif eftir henni, að koma sem skiptinemi og mun búa hjá „ömmu“ sinni.“

Reynt að miðla eftir áhugasviði

Eins og áður segir kemur skiptinemahópur frá 15 mismunandi löndum í ágúst. Má þar nefna nema frá Frakklandi, Ítalíu, Færeyjum og Grænlandi. Sólveig segir krakkana sem fara út á land aðlagast mjög vel og jafnvel betur en þau sem fara til Reykjavíkur. Þau taki virkan þátt í samfélaginu, t.d. í leikfélagi, skólakór eða öðru. „Við hvetjum þau líka til að nýta sína styrkleika í því sem þau hafa áhuga á. Til dæmis hefur ein stúlka áhuga á hestum og er hún þá á bóndabæ fyrir utan Selfoss. Hún tekur fullan þátt í öllu þar og fer svo með skólabíl í skólann. Önnur býr í Hafnarfirði því hún vildi fara á leiklistarbraut í FG, svo við reynum að miða búsetu og skóla út frá áhugasviði viðkomandi,“ segir Sólveig.

Að kynnast framandi menningu

Í gegnum tíðina hafa þónokkrir skiptinemar dvalið á Vesturlandi og líkað vel en undanfarin ár hefur verið minna um slíkar heimsóknir. „Við erum með tvo nema í Búðardal og þau eru alsæl, einnig höfum við verið með nema í Rifi og á Akranesi sem einnig voru mjög ánægð með sína dvöl.“ Sólveig hvetur íbúa á Vesturlandi til að bætast í sjálfboðaliðahópinn og bendir áhugasömum á að hafa samband við sig í gegnum tölvupóst eða heimasíðu AFS á Íslandi. „Hver og einn nemandi fær tengilið á vegum AFS sem er stuðningur fyrir bæði nemann og fjölskylduna en einnig eru námskeið haldin fyrir báða hópa til undirbúnings þess sem koma skal.“ Þá segir Sólveig að Vesturland vanti góða nema og auðvitað vilja samtökin geta boðið fleiri nemum að dvelja á fallegu Vesturlandinu.

Aðspurð hvað sé mest krefjandi og gefandi við að fá skiptinema til sín, segir Sólveig það vera að hafa þolinmæði fyrir aðlögunartímanum. „Maður les börnin sín og veit hvað þau vilja eða vilja ekki en þarna ertu komin með óskrifað blað og þarft að læra inn á viðkomandi. Nemarnir þurfa líka að finna sitt hlutverk innan fjölskyldunnar en þeim hættir til að vera svo kurteis í upphafi. Það sem er svo mest gefandi er að kynnast nýjum einstaklingi og á vissan hátt læra inn á menningu viðkomandi; læra menningarlæsi og um leið eignast fjölskyldu erlendis.“

Allar nánari upplýsingar má finna á afs.is

Vestlendingum býðst að taka á móti skiptinemum

AFS fræðslusamtökin undirbúa komu næstu skiptinema

AFS fræðslusamtökin undirbúa komu næstu skiptinema