Stjórn Ferðafélags Borgarfjarðar og stjórn Hjólreiðafélags Vesturlands sendu nýverið bréf til sveitarstjórnar Borgarbyggðar með áskorun um að beita sér fyrir því að gerður verði stígur fyrir gangandi og hjólandi umferð á brúna yfir Borgarfjörð. „Fyrir nokkru voru gerðir ágætir göngu- og hjólastígar að brúnni sitt hvorum megin en þeir eru lítið sem ekkert nýttir þar sem stíginn yfir brúna sjálfa vantar. Á brúnni eru tvær akgreinar fyrir bílaumferð en ekki gert ráð fyrir annarri umferð en akandi. Umferðarhraðinn á brúnni er það mikill að flestir veigra sér við að fara gangandi eða hjólandi þar yfir,“ segir í erindi félaganna.