Það bættist í veitingaflóruna í Stykkishólmi á laugardaginn en þá var matarvagninn Agnið Streetfood opnaður við höfnina. Baldur Úlfarsson og hans fjölskylda keyptu vagninn og nafnið en hafa gert breytingar á matseðli. „Við munum bjóða upp á taco, pítur og hamborgara en kjötið í hamborgarana og píturnar kemur úr héraði og svo erum við með gellur héðan úr Breiðafirði sem við djúpsteikjum og setjum í taco. Við mælum hiklaust með því,“ segir Edda Baldursdóttir í samtali við Skessuhorn. „Pabbi er kokkur og við hin erum öll áhugakokkar og ætlum að vera í þessum rekstri öll saman; foreldrar mínir, ég og maðurinn minn og bróðir minn og mágkona. Við opnum um hádegi og lokum um kl. 20.30 á kvöldin. Svona verður þetta í sumar eða út ágúst hjá okkur. Við erum öll í annarri vinnu svo við ætlum aðeins að sjá til hvort við náum að hafa eitthvað opið í september, það kemur í ljós þegar nær dregur hausti hvað við gerum,“ segir Edda.