Skessuhorn fór á stúfana og kíkti miðvikudaginn 15. maí niður á bryggju á Arnarstapa. Nokkur fjöldi ferðamanna var gangandi um svæðið en niðri á bryggju voru hafnarstarfsmenn að störfum. Einn strandveiðibát hafði rekið upp á sker og sat þar fastur en strandveiðisjómaðurinn á bátnum var komin út og kallaði „halló!“ hátt og snjallt. Annar strandveiðibátur kom þá að og kannaði aðstæður. Brátt voru þeir báðir komnir í biðröðina eftir löndun.

Bátarnir voru í röðinni, sátu eins og á baðkari og biðu karlarnir í rólegheitunum eftir að komast að bryggju til að landa dagsskammtinum. Hafnarstarfsmenn voru með hraðar hendur við löndunina og greinilegt að tækni og reynsla við krana og lyftara var þar á ferð. Bátarnir voru svo bundnir hver við annan, allt smúlað og rafgeymar settir í hleðslu. Gluggar voru hreinsaðir, kosturinn yfirfarinn fyrir næsta dag og einn hundur dreginn upp með einu fiskikarinu.

Nokkrir strandveiðifélagar voru komnir saman til að spjalla um veiði dagsins. „Það koma allir hingað rétt fyrir sex að morgni og þá förum við út, einn í einu. Þetta er kerfi sem er búið að vera í nokkurn tíma en hér áður fyrr var þetta töluvert meira bras. Einn bátur fór þá kannski um fjögur leytið. Hann var kannski við bryggjuna og þá þurfti hann að binda alla hina bátana aftur svo að þá ræki ekki upp í fjöru. Þetta var alveg heljarinnar vesen en þetta er kerfi sem er að svínvirka,“ heyrðist á tali þeirra. Þessir sjóarar voru þeir Magnús, Helgi og Jóhannes. Spjall þeirra barst síðan í það hvernig fisk þeir hafi fengið, hversu lengi þeir voru á stýminu út á miðin og svo framvegis. „Ég fer nú að gera mig kláran í að fara upp þessa blessuðu brekku,“ segir Helgi og hinir félagarnir hlæja. Sjómaðurinn sem kom til aðstoðar félaga sínum á skerinu röltir af stað. Þá er kallað: „Ætlar unglingurinn bara að hlaupa upp brekkuna! Voru einhver björgunarlaun?“ Það er hlegið. Á meðan er haldið áfram að landa myndarlegum þorski í frábæru veðri í hinni ægifögru höfn á Arnarstapa.

*Einn strandveiðibátur nálgast bát sem hafði rekið upp á sker.*

*Bátur kemur inn í höfnina, úr löndunarbiðröðinni.*

*Hafnarstjórinn snar í snúningum á lyftaranum.*

*Magnús, Helgi og Jóhannes spjalla um daginn og veginn.*

*Þorski af öllum stærðum var landað þennan dag.*

Dagstund á Arnarstapa