Stefna að byggingu fyrir kynslóðir menntskælinga og eldra fólks

Brákarhlíð fasteignafélag í Borgarnesi auglýsir í Skessuhorni vikunnar forval þar sem óskað er eftir umsóknum frá verktökum sem vilja taka þátt í útboði á nýbyggingu fjölbýlishúss við Borgarbraut 63 í Borgarnesi. Á þeirri lóð stendur nú eldra íbúðarhús, oft kallað Sumarliðahús, en það verður rifið. Í forvalsgögnum er gert ráð fyrir að byggt verði fjögurra hæða íbúðarblokk auk kjallara og bílgeymslu. Í húsinu eru fyrirhugaðar 12 námsmannaíbúðir og 12 íbúðir fyrir almennan markað. Sótt var um byggingarleyfi fyrir húsinu á síðasta ári. Við umsóknina þá kom fram að á fyrstu hæð hússins eru fyrirhugaðar stúdíóíbúðir fyrir nemendur Menntaskóla Borgarfjarðar á veturna en á sumrin væri mögulegt að reka þar gististað. Á hinum þremur hæðum hússins er gert ráð fyrir fjórum íbúðum á hverri hæð, tvær þriggja herbergja íbúðir og tvær tveggja herbergja auk sameignar og svala. Hönnuður hússins er Gunnar Logi Gunnarsson.

Við undirbúning þessa verkefnis hafa starfað þétt saman forsvarsmenn Menntaskóla Borgarfjarðar og Hjúkrunar- og dvalarheimilisins Brákarhlíðar. Standa þessar stofnanir að fasteignafélaginu Brákarhlíð. Félagið hefur fengið til liðs við sig fyrirtækið Dynju en það sérhæfir sig í verkefnastjórnun byggingaverkefna. Í kjölfar forvals stendur til að velja 4-5 verktaka til þátttöku í útboði um byggingu hússins. Forvalsgögn verða afhent á vef Dynju frá og með 28. maí, en umsóknum skal skila eigi síðar en 5. júní nk. klukkan 14.

*Húsinu hefur verið valinn staður á lóðinni Borgarbraut 63 í Borgarnesi þar sem Sumarliðahús stendur nú.*

Auglýsa forval vegna byggingar fjölbýlishúss í Borgarnesi

Stefna að byggingu fyrir kynslóðir menntskælinga og eldra fólks

Stefna að byggingu fyrir kynslóðir menntskælinga og eldra fólks