„Lítum svo á að góð félagsaðstaða eldri borgara sé sjálfsögð grunnþjónusta“ – segir bæjarstjórinn

Nýverið var Landsfundur eldri borgara (LEB), haldinn í Reykjavík. Um 160 fulltrúar frá 55 aðildarfélögum LEB áttu þar seturétt. Innan vébanda félagsins eru um 37 þúsund eldri borgarar sem hafa m.a. það markmið að berjast fyrir bættum kjörum hér á landi. Aðstaða til félagsstarfs eldri borgara félaga var einnig rædd á fundinum. Almennt kvartaði fólk í eldri borgara félögum undan bágri aðstöðu til að sinna félagsstarfi sínu. Kallaði það eftir að sveitarfélög styðji betur við starf eldri borgara. Auðvitað er það ekki algilt að aðstaðan sé slæm eða jafnvel engin. Samkvæmt heimildum Skessuhorns voru fulltrúar eins félags sem skáru sig úr hvað þetta snerti; báru sig einkar vel yfir þeim aðbúnaði sem sveitarfélagið leggur þeim til. Þetta var Félag eldri borgara í Snæfellsbæ. Svanhildur Pálsdóttir fráfarandi formaður félagsins sagði á fundinum að það væri ekki hægt annað en að hæla Snæfellsbæ fyrir hversu vel hefði verið búið að félagsaðstöðunni. Þar hafi Kristinn Jónasson bæjarstjóri farið fremstur í flokki.

Eins og fram hefur komið í Skessuhorni var nýtt félagsheimili Félags eldri borgara í Snæfellsbæ formlega tekið í notkun 1. febrúar á þessu ári. Við sama tilefni var húsinu gefið nafnið Höllin, en nafngiftin er ekki út í hött. Byggt var 500 fermetra hús miðsvæðis á besta stað við Ólafsbraut í Ólafsvík. Þar er aðgengi mjög gott. Tíðindamenn Skessuhorns brugðu sér bæjarferð í síðustu viku og fengu að skoða Höllina. Með blaðamanni í för var Áskell Þórisson sem situr í stjórn nýs félags eldri borgara í Hvalfjarðarsveit og fyrrum ritstjóri Bændablaðsins. Hlýlega var tekið á móti gestum af forsvarsmönnum félagsins og Kristni bæjarstjóra. Gestunum voru sýnd öll átta rýmin í húsinu. Óhætt er að segja að aðstaðan sé fyrsta flokks.

*Höllin við Ólafsbraut í Ólafsvík. Ljósm. mm*

Einingar reistar og tengdar saman

Höllin í Ólafsvík er byggð úr alls sex húseiningum sem Snæfellsbær keypti notaðar af Hjallastefnunni. Einungunum var raðað saman, byggður tengigangur, reist þak og húsið klætt að utan. Vel var gætt að loftun og öllum frágangi til að fyrirbyggja vandamál vegna húsmyglu. Húsin byggði SG hús á Selfossi fyrir rúmlega áratug síðan og er innan dyra bæði hlýtt og notalegt. Öflugar varmadælur á húsgaflinum eru nýttar til upphitunar, en eins og flestir vita er ekki hitaveita í Ólafsvík. Einingarnar sem mynda umgjörð hússins voru áður nýttar sem leikskóli í Öskjuhliðinni í Reykjavík. Reyndar keypti Snæfellsbær fleiri einingar í sömu viðskiptum og eru þær notaðar til stækkunar á grunnskólanum á Lýsuhóli og leikskólanum í Ólafsvík, auk þess sem golfklúbburinn fær eitt húsanna til afnota.

*Svanhildur Pálsdóttir, Sigrún Harðardóttir, Ómar Lúðvíksson og Kristinn Jónasson eru hér stödd í Rjóðrinu. Ljósm. áþ*

Hússtjórn mótar reglurnar

Kristinn Jónasson bæjarstjóri útskýrir fyrirkomulagið og kostnaðinn við byggingu Hallarinnar. „Bæjarstjórn Snæfellsbæjar lofaði því fyrir síðustu bæjarstjórnarkosningar að farið yrði í byggingu nýs húss fyrir félag eldri borgara. Auðvitað voru einhverjir sem trúðu ekki að staðið yrði við loforðið, en það er nú svo að við setjum ekki slíkt fram nema ætla að standa við það. Ákveðið var að Snæfellsbær byggði myndarlegt félagsheimili fyrir okkar eldra fólk. Bærinn greiðir allan kostnað við húsið, innréttingar og húsgögn, en afhendir það svo Félagi eldri borgara til afnota. Við komum ekki nálægt rekstrinum sem slíkum og skiptum okkur í raun ekki af því sem hér fram fram. Félag eldri borgara og hússtjórn Hallarinnar mótar reglur um notkun hússins og mér sýnist það vera að takast prýðilega. Heildar kostnaður Snæfellsbæjar við húsið, með öllu sem í því er, er um 150 milljónir króna, eða um 300 þúsund krónur á fermetra, sem verður að teljast vel sloppið,“ segir Kristinn. Bæði húsið og húsgögn sem keypt voru í það eru fengin í gegnum fyrirtæki sem heitir Efnisveitan. Það er eins konar miðlunarsíða þar sem fyrirtæki og stofnanir bjóða notaðan en heillegan varning til sölu. Gaman er að geta þess að mörg þeirra húsgagna sem eru í Höllinni koma úr Alþingishúsinu við Austurvöll, en þar var mikið mublerað upp þegar ný skrifstofubygging fyrir þingmenn var tekin í notkun fyrr á þessu ári.

Virkja fleiri til þátttöku

Í hússtjórn Hallarinnar fyrir félag eldri borgara eru þær Svanhildur Pálsdóttir, Sigrún Harðardóttir og Kristín Bjargmundsdóttir. Ómar Lúðvíksson var svo nýlega kosinn formaður félagsins. Þau tóku öll á móti gestum og sýndu aðstöðuna. „Það kom í ljós á nýlega afstöðnum fundi Landssambands eldri borgara að við vorum í raun eina félagið sem var að hrósa sveitarfélaginu sínu fyrir hvernig staðið hefur verið að uppbyggingu félagsaðstöðunnar hérna í Snæfellsbæ. Þessi rúmgóða og notalega aðstaða hefur síðan orðið til þess að fjölgað hefur í félaginu hjá okkur, en félagsmenn eru nú um 150. Húsið er rúmgott og gæti rúmað helmingi fleiri félagsmenn ef út í það væri farið. Okkur er nú að takast að fá með okkur í félagsstarfið fólk sem jafnvel hefur verið eitt heima hjá sér og fáa hitt. Við erum því þakklát fyrir hversu vel hefur verið staðið að þessu,“ segir Svanhildur.

*Í hússtjórn Hallarinnar eru f.v. Kristín Bjargmundsdóttir, Svanhildur Pálsdóttir og Sigrún Harðardóttir. Þær móta nú starfsemina sem fram fer í húsinu.*

Starfsemin

Í Höllinni er opið frá klukkan 13-16 alla daga en á miðvikudögum á veturna hittast eldri borgarar í félagsheimilinu Klifi. „Hingað kemur fólk, jafnvel bara í kaffi og til að spjalla, en það er fjölbreytt félagsstarf; handavinna og smíðar sem hér fer fram,“ segja þær Svanhildur, Sigrún og Kristín. Þær ganga um húsið og sýna gestum starfsemina sem enn er verið að móta. Alls eru átta rými til tómstundastarfs sem öll bera sitt heiti. Í Hreiðrinu er prjónað og létt handavinna; í Rjóðrinu er bútasaumur; í Listaskemmunni er mótaður og brenndur leir, gler, tiffanis og skartgripagerð; í Hrútakofanum eru tæki og tól til smíða og útskurðs; á Sólvöllum er spilaaðstaða, púsl og æfingaaðstaða fyrir tónlistarflutning; í Morgunstund (stundum nefnt Bölmóðsstaðir af æringjunum), er fundaaðstaða fyrir þá morgunhressu, en hjartað í húsinu er kaffistofan en eldhúsið er búið öllum búnaði fyrir bakstur og aðra matseld. Tengigangur í miðjunni er síðan rúmgóður og hugsaður fyrir stærri samkomur.

„Við erum að reyna hér að skapa jákvætt og notalegt andrúmsloft. Hér er ekki þráttað um pólitík en rætt um heima og geima eins og gengur. Hér á fólk að geta fundið eitthvað við sitt hæfi og hér skipuleggjum við félagsstarfið og fjáraflanir,“ útskýrir Svanhildur og nefnir að nú styttist í ferð félagsins til Færeyja í byrjun júní, en á vegum þess er töluvert ferðast saman.

Konurnar í hússtjórninni segja að mikil eftirspurn sé frá öðrum sveitarfélögum og landshlutum að fá að skoða þessa aðstöðu í Höllinni. „Hingað koma heilu rúturnar af gestum og þeir koma víða að. Þessi glæsilega aðstaða hefur spurst vel út. Þá er að aukast áhugi fólks úr nágrannabyggðum okkar hér á Snæfellsnesi að slást í hópinn með okkur í handavinnunni og slíku. Það er bara jákvætt.“

*Sigrún með efnisstranga sem verða nýttir í bútasaum.*

Bætir samfélagið

Kristinn bæjarstjóri segir að endingu að hugmyndafræðin með uppbyggingu félagsaðstöðu fyrir eldri borgara sé einföld í hans huga: „Við sem sveitarfélag viljum vera samkeppnisfær í þeirri þjónustu sem hér er í boði. Hlutverk sveitarstjórnar er að móta samfélag þar sem öllum líður vel og á það jafnt við um skólana fyrir börnin sem og starf eldri borgara. Hluti af því að samfélög geti blómstrað er að eldra fólki líði vel og hér vilji það búa áfram eftir að starfsævinni lýkur. Svo má ekki gleyma hlutverki afa og ömmu í uppeldinu. Þetta fólk er í baklandinu, tekur að sér að sækja í leikskólann, passa og allt það sem að uppeldi barna lýtur og því er góð félagsaðstaða fyrir eldra fólk í raun lykilþáttur í heilbrigði sveitarfélaga og bætir samfélagið okkar. Við lítum alla vega þannig á málið,“ segir Kristinn bæjarstjóri.

*Jón Guðmundsson er m.a. að vinna með nautshorn í Hrútakofanum. Pússar þau, brennir rúnaletur og skreytir með silfri.*

*Bolli og undirskál sem Jón Guðmundsson hefur gert.*

Mikil ánægja með Höllina í Ólafsvík – umfjöllun og myndasyrpa

„Lítum svo á að góð félagsaðstaða eldri borgara sé sjálfsögð grunnþjónusta“ – segir bæjarstjórinn

„Lítum svo á að góð félagsaðstaða eldri borgara sé sjálfsögð grunnþjónusta“ – segir bæjarstjórinn